«نۇر وتان» پارتياسىنىڭ مەملەكەتتىك تىلدەگى #NurOtanPikir جاڭا پىكىرتالاس الاڭى ءوز جۇمىسىن باستادى. تۇساۋكەسەر وتىرىس «تاۋەلسىزدىگىمىزدىڭ رۋحاني نەگىزدەرى» تاقىرىبىنا ارنالىپ، وندا ەلدىكتىڭ تىرەكتەرى، ۇلتتىق مادەنيەت پەن رۋحانياتتىڭ جانە مەملەكەتتىك ءتىلدىڭ دامۋى سياقتى وزەكتى ماسەلەلەر تالقىلاندى. ءىس-شاراعا «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ، پارلامەنت ءماجىلىسىنىڭ دەپۋتاتى نۇرتاي سابيليانوۆ، بەلگىلى ساياساتتانۋشى ايدوس سارىم، «كيەلى قازاقستان» عىلىمي-زەرتتەۋ ورتالىعىنىڭ باسشىسى بەرىك ءابدىعالي ۇلى جانە گارۆارد ۋنيۆەرسيتەتىنىڭ تۇلەگى، قوعام قايراتكەرى شىڭعىس مۇقان قاتىستى. وتىرىستى عالىم، حالىقارالىق تۇركى اكادەمياسىنىڭ پرەزيدەنتى، «ەگەمەن قازاقستان» رەسپۋبليكالىق گازەتى» اق-نىڭ باسقارما ءتوراعاسى دارحان ءقىدىرالى جۇرگىزدى.
قازىرگى تاڭدا «نۇر وتان» پارتياسى ءوز قىزمەتىن جاڭعىرتۋ جولىندا ءبىرقاتار تىڭ باستامالاردى قولعا الىپ، جۇيەلى جۇمىس ىستەپ كەلە جاتقانى بەلگىلى. سونىڭ ناتيجەسىندە كوپتەگەن يگى ىستەر جۇزەگە اسىرىلىپ جاتىر. پارتيا تاراپىنان وزەكتى ماسەلەلەردى تالقىلاپ، ولاردىڭ وڭ شەشىلۋىنە ىقپالىن تيگىزەتىن الاڭدار قولعا الىنا باستادى. ءقازىردىڭ وزىندە پارتيانىڭ #NurOtanTrends جانە #NurOtanTalks دەگەن پىكىرتالاس الاڭدارى تۇراقتى تۇردە جۇمىس ىستەپ تۇر. ول جەرلەردە نەگىزىنەن ەكونوميكالىق، ساياسي تاقىرىپتار، ستراتەگيالىق باستامالاردى جۇزەگە اسىرۋ جولدارى، جاڭا باستامالاردىڭ تيىمدىلىگى سياقتى وزەكتى ماسەلەلەر تالقىلانادى.
ال جۇمىسى جاڭادان باستالىپ جاتقان #NurOtanPikir كلۋبىندا حالقىمىزدىڭ رۋحاني قۇندىلىقتارىن دارىپتەۋ، تاريحي سانانى جاڭعىرتۋ، سول ارقىلى ۇلتتىڭ ساناسىن وياتۋ، مەملەكەتتىك ءتىل مەن مادەنيەتىمىزدى ودان ءارى دامىتۋ، تاۋەلسىزدىگىمىزدى نىعايتۋ سياقتى ۇلتتىق ماسەلەلەر تالقىلاناتىن بولادى. سول سەبەپتى دە بۇل الاڭنىڭ جۇمىسى تەك قازاق تىلىندە جۇرگىزىلەدى. سونداي-اق ءقازاقتىلدى ورتادا ءجيى كوتەرىلىپ جۇرگەن ماسەلەلەرگە قوعامنىڭ نازارىن اۋدارۋ دا جاڭا پىكىرتالاس الاڭىنىڭ نەگىزگى مىندەتتەرى بولىپ سانالادى.
وتىرىستا العاش بولىپ ءسوز العان «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ بۇل باستامانىڭ ماقساتى قازاقستاندىق قوعامدى تولعاندىرىپ جۇرگەن وزەكتى رۋحاني ماسەلەلەردى زاماناۋي فورماتتا تالقىلاپ، ولاردى شەشۋدىڭ ءتيىمدى جولدارىن قاراستىرۋ ەكەنىن ايتتى. سونداي-اق ول قاتىسۋشىلاردى تاۋەلسىزدىك مەرەكەسىمەن قۇتتىقتاپ، بۇل كۇننىڭ ۇلتىمىز ءۇشىن ماڭىزدىلىعىن اتاپ ءوتتى.
– ءبىز بۇگىنگى زامان فورماتىندا حالقىمىزدىڭ رۋحاني قۇندىلىقتارىن دارىپتەۋ، تاۋەلسىزدىگىمىزدى نىعايتۋ مەن ۇلتتىق كودىمىزدى ساقتاپ قالۋ سياقتى ماڭىزدى ماسەلەلەردى تالقىلاۋ ءۇشىن وسىنداي جوبانى قولعا الدىق. بۇل باعىتتا «نۇر وتان» پارتياسى كوپ جۇمىستار اتقارىپ جاتىر. ءبىز بۇل ماسەلەلەردى تالقىلاپ قانا قويماي، ناقتى ناتيجە بەرىپ جاتقان بىرنەشە جوبالاردى جۇزەگە اسىرۋدامىز، – دەدى ماۋلەن اشىمبايەۆ.
«نۇر وتان» پارتياسى ءتوراعاسىنىڭ ءبىرىنشى ورىنباسارى جاستاردىڭ بويىندا قۇندىلىقتار جۇيەسى مەن تاريحي سانانى قالىپتاستىرۋ قاجەت ەكەنىنە توقتالىپ، بارلىق قازاقستاندىقتاردى ەلىمىزدىڭ ەڭ باستى مەرەكەسى – تاۋەلسىزدىك كۇنىن تويلاۋعا ءوز ۇلەستەرىن قوسۋعا شاقىردى. سونداي-اق ماۋلەن اشىمبايەۆ تاۋەلسىزدىكتى ساقتاپ، قوعامدا دۇرىس قۇندىلىقتاردى قالىپتاستىرۋ ىسىنە دە كوڭىل ءبولدى.
جالپى العاندا ءبىرىنشى كەزدەسۋ مەملەكەت باسشىسىنىڭ «ۇلى دالانىڭ جەتى قىرى» ماقالاسىندا باياندالعان ستراتەگيالىق ماقساتتاردى ىسكە اسىرۋ مۇمكىندىگىنە ارنالدى. پىكىرتالاسقا قاتىسقان پارلامەنت ءماجىلىسىنىڭ دەپۋتاتى نۇرتاي سابيليانوۆ وزەكتى ماسەلەلەردى قوزعايتىن وسىنداي الاڭنىڭ ماڭىزدىلىعىن اتاپ ءوتتى. دەپۋتات قاتىسۋشىلاردى جاستارعا تاۋەلسىزدىككە قول جەتكىزۋىمىزدىڭ ماڭىزدىلىعىن تەرەڭىرەك تۇسىندىرۋگە شاقىردى.
تاريحشى، ساياساتتانۋشى، «كيەلى قازاقستان» عىلىمي-زەرتتەۋ ورتالىعىنىڭ باسشىسى بەرىك ءابدىعالي ۇلى بۇگىنگى زامان جاستارىنىڭ قوعامدىقتان گورى جەكە باستارىنىڭ مۇددەلەرىنە قاتتى كوڭىل بولەتىنىن ايتتى. ول تاريحي سانانى قالىپتاستىرۋ، ىشكى ءتۋريزمدى دامىتۋ مەن قازاقستاننىڭ كيەلى جەرلەرىن قاستەرلەۋدى ۇيرەتۋ ارقىلى قالىپتاسقان احۋالدى وزگەرتۋ قاجەت دەپ ەسەپتەيدى.
ساياساتتانۋشى، قوعام قايراتكەرى ايدوس سارىم تاريحقا وتكەن كۇندەردىڭ جىلناماسى مەن ناقتى اتاقتى تۇلعالاردىڭ ءومىر بايانى ارقىلى عانا قاراماي، ونى سانانى قالىپتاستىرۋداعى مىقتى مەحانيزمگە اينالدىرۋدى ۇسىندى.
قوعام قايراتكەرى، گارۆارد ۋنيۆەرسيتەتىنىڭ تۇلەگى شىڭعىس مۇقان بولسا، جاستاردىڭ اراسىندا جۇرتتىڭ بارىنە تۇسىنىكتى قاراپايىم تىلدە ماڭىزدى يدەولوگيالىق ماسەلەلەر توڭىرەگىندە اقپاراتتىق جۇمىس جۇرگىزۋ كەرەك ەكەنىن تىلگە تيەك ەتتى. ونىڭ ايتۋىنشا، كەز-كەلگەن مەملەكەتتىك جانە يدەولوگياعا جاۋاپتى قىزمەتكەر ماقساتتى اۋديتوريا ءۇشىن بۇگىنگى زامان ۇلگىسىندە ماڭىزدى ماسەلەلەردى دۇرىس جەتكىزە ءبىلۋى ءتيىس.
كەزدەسۋگە قاتىسۋشىلار مەملەكەت باسشىسىنىڭ «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» باعدارلامالىق ماقالالارىنىڭ ەلىمىزدى رۋحاني جاڭعىرتۋداعى تەمىرقازىق نىسانا بولىپ تابىپ تابىلاتىنىن ايتتى. «رۋحاني جاڭعىرۋ» شەڭبەرىندە جۇزەگە اسىرىلعان جوبالار ءوزىنىڭ ماڭىزدىلىعى مەن تيىمدىلىگىن كورسەتتى. ال، جاڭا ماقالا رۋحاني جاڭعىرۋ ۇدەرىسىنىڭ قيسىندى جالعاسى بولىپ تابىلادى.
ايتا كەتەيىك، #NurOtanPikir الاڭىنىڭ وتىرىسى پارتيانىڭ جوعارىدا اتالعان وزگە دە پىكىرتالاس كلۋبتارىنىڭ جيىنى سياقتى Facebook الەۋمەتتىك جەلىسىندە تىكەلەي ەفيردەن كورسەتىلدى.
