ەكى قۇجات تا بارلاۋ جونىندەگى كوميتەتتىڭ تاپسىرىسى بويىنشا ازىرلەنگەن، بۇرىن-سوڭدى جارىق كورمەگەن دايەكتەر بار دەپ حابارلايدى CNN. وندا رەسەي اقش-تاعى پرەزيدەنت سايلاۋىندا دونالد ترامپ جەڭىپ شىعۋى ءۇشىن ءىرى الەۋمەتتىك جەلىلەردى قولدانعانى ايتىلادى.

زەرتتەۋ اۆتورلارى رەسەيدىڭ ينتەرنەت زەرتتەۋلەرى اگەنتتىگى 2009 جىلى جەرگىلىكتى سايلاۋ كەزىندە العاشقى تاجىريبەلەرىن جۇزەگە اسىرا باستاعانىن اتاپ وتەدى. 2013 جىلى "ترولل فابريكاسى" اتالىپ كەتكەن اگەنتتىك Twitter ارقىلى اقش-تىڭ ساياسي ىسىنە ارالاسا باستايدى.

بىرتىندەپ بۇل كامپانياعا YouTube، Facebook جانە Instagram جەلىلەرىن دە تارتا باستايدى.

2016 جىلى اقش-تاعى پرەزيدەنت كامپانياسى كەزىندە رەسەي كونسەرۆاتيۆتى سايلاۋشىلاردى ميگرانتتار مەن قارۋ تاقىبىرىن العا تارتىپ، دونالد ترامپ قاتارىنا تارتا باستايدى. رەسەي اگەنتتەرى سول كەزدە افروامەريكالىق سايلاۋشىلاردى شاتاستىرۋ ءۇشىن ءتۇرلى حابارلامالار جىبەرگەن. اتاپ ايتقاندا، داۋىس بەرۋدىڭ ءتارتىبى جونىندەگى قاتە نۇسقاۋلار تاراتقان. ال ليبەرالدار، مۇسىلماندار، لاتىنامەريكالىقتار جانە ارداگەرلەر تۇراتىن ايماقتارعا سايلاۋعا بارماڭدار دەگەن ۇگىت جۇرگىزگەن. وسىلايشا ماسكەۋ امەريكالىق قوعامدى جىك-جىككە بولمەك بولعان دەيدى.

Washington Post بايانداما اۆتورىنىڭ ءبىرى اقش-تىڭ تەحنولوگيالىق كومپانيالارىن "تەز ارادا شارا قولدانبادى" دەپ ايىپتادى دەپ جازادى. ولار بيلىككە رەسەيدىڭ ارەكەتى جونىندەگى اقپاراتتى دەر كەزىندە بەرمەدى دەگەن.

اقش ينتەرنەت زەرتتەۋلەرى اگەنتتىگىنە قارسى قىلمىستىق ءىس قوزعادى. ارنايى پروكۋرور روبەرت ميۋللەر ترامپتىڭ سايلاۋالدى شتابى سايلاۋعا كيلىگۋ ءۇشىن رەسەيمەن قانداي دا ءبىر كەلىسىمگە كەلدى مە، جوق پا، انىقتاۋعا تىرىسىپ جاتىر. ترامپ بولسا ەشقانداي كەلىسىم بولماعانىن ايتىپ، بۇل زەرتتەۋلەردى "جالماۋىز اۋلاۋ" دەپ اتاپ كەلەدى.