29 جاستاعى نوزيما ەرگاشيەۆانىڭ ايتۋىنشا، اۋداندىق اكىمشىلىكتەگى نارازىلىقتى ول الدىن الا جوسپارلاعان. جەرگىلىكتى بيلىك ونى تىڭداۋدان باس تارتقان سوڭ، كەلىنشەك وسىنداي قادامعا بارعان.

"مەنى اكىمنىڭ ايەلدەر ءىسى جونىندەگى ورىنباسارى قابىلدادى. ماعان كومەكتەسۋدىڭ ورنىنا، ولار مەنىمەن قاتال سويلەستى. سول كەزدە مەن: "سەندەر ءبىزدىڭ ارىزىمىزدى تىڭدامايسىڭدار، وندا مەن نارازىلىق رەتىندە ءوزىمدى ورتەيمىن"، - دەدىم. سومكەمدە وتتىق پەن بوتەلكەگە قۇيىلعان جانارماي بار ەدى. مەن ونى قولىما قۇيىپ، وت قويدىم. ول جانا باستاعاندا، بوتەلكە قولىمنان ءتۇسىپ كەتىپ، ەدەن جانا باستادى. مەن اياعىممەن وتتى باسقاندا، وتتىق جارىلىپ كەتتى. مەن ەسىمنەن تانىپ قالدىم"، - دەدى نوزيما ەرگاشيەۆا.

وقيعا كۋاگەرىنىڭ ايتۋىنشا، نوزيماعا جەدەل مەديسينالىق جاردەم شاقىرتىلعان. ونىڭ قولى كۇيىپ قالعان.

15 جەلتوقساندا قيبراي اۋداندىق اكىمدىگىنىڭ جەتەكشى مامانى حولمۋرود راببانايەۆتىڭ ايتۋىنشا، كەلىنشەك ءوزىن ەمەس، ءماجىلىس زالىن ورتەگىسى كەلگەن. شەنەۋنىك ونىڭ بۇل ارەكەتىن گازعا قارىزدى تولەگىسى كەلمەگەندىگىمەن بايلانىستىردى.

نوزيما تابيعي گازعا قارىزى 7 ميلليون 200 مىڭ سۋم (شامامەن 870 دوللار) بولعانىن راستادى. ءبىراق ول سول كۇنى اكىمشىلىككە ماتەريالدىق كومەك سۇراپ بارعانىن ايتتى.