يندونەزياداعى ءسۋناميدىڭ سالدارىنان قازا تاپقانداردىڭ سانى 281-گە جەتتى. بۇل تۋرالى Straits Times باسىلىمى حابارلادى.

ال زارداپ شەككەندەر 1016-عا، ءىز-تۇسسىز جوعالعاندار 57-گە جەتتى.

سۋنامي تولقىنى وتكەن سەنبىدە جەرگىلىكتى ۋاقىتپەن ساناعاندا ساعات 21.27-دە يندونەزيانىڭ باتىسىنداعى زوند بۇعازىنىڭ جاعالاۋىندا ورىن الدى. جۇزدەگەن ءۇي مەن عيمارات سۋ استىندا قالدى.

سۋناميدەن قيراعان ءۇي

مەملەكەت بيلىگىنىڭ حابارلاۋىنشا، تولقىن اناك-كراكاتاۋ جانارتاۋىنىڭ اتقىلاۋى سالدارىنان كوتەرىلۋى مۇمكىن. ال يندونەزيادا ازىرگە سۋنامي جايلى الدىن-الا ەسكەرتۋ جۇيەسى قاراستىرىلماعان.

يندونەزيانىڭ گەولوگيالىق قىزمەتى تابيعات اپاتىنىڭ 2 مينۋت 12 سەكۋندقا سوزىلعانىن حابارلادى. سونىمەن قاتار حالىقتىڭ كراتەر ماڭىنا 2 شاقىرىمعا دەيىن جاقىنداماۋىن تالاپ ەتتى.

الەۋمەتتىك جەلىدە تولقىننىڭ Seventeen روك-گرۋپپاسى ءان ايتىپ تۇرعان ساحنانى شايىپ كەتكەنى تۋرالى ۆيدەوسى تارالىپ جاتىر. كەيىن توپ ءانشىسى باسيست، گيتاراشى جانە توپتىڭ مەنەدجەرى قازا تاپقانىن حابارلادى، ال تاعى ەكى ادام مەن ءبىرىنىڭ ايەلى جوعالىپ كەتكەن.

سۋناميدەن قاتتى زارداپ شەككەندەردىڭ - ءبىرى بانتەن پروۆينسياسىنداعى پاندەگلانگ وكرۋگى. ءدال وسى اۋداندا قالانىڭ ۇلتتىق ساياباعى مەن دەمالىس ورىندارى ورنالاسقان.

قۇتقارۋشىلار ءقازىر اناك-كراكاتاۋ جانارتاۋى مەن سۋنامي اراسىنداعى بايلانىستى زەرتتەپ جاتىر.

سۋناميدەن قاشقان حالىق مەشىتتەردى پانالادى

جانارتاۋ سوڭعى رەت 2018 جىلدىڭ ماۋسىمىندا اتقىلاعان ەكەن.

العاشىندا جاي عانا سۋاستى جانارتاۋى بولعان اناك-كراكاتاۋ ءجيى بەلسەندىلىگىنىڭ ارقاسىندا اينالاسىنا جاڭا ءبىر ارال قالىپتاستىردى. جانارتاۋ تەڭىزدەن 300 مەتر بيىكتە ورنالاسقان.

اناك-كراكاتاۋ جانارتاۋى، فوتو شىلدەدە تۇسىرىلگەن

اناك-كراكاتاۋ جانارتاۋى، فوتونى وتكەن سەنبىدە ويستەين لۋند تۇسىرگەن

1883 جىلى جانارتاۋ اتقىلاعاندا كۇل باعانى 20 شاقىرىمعا دەيىن جەتىپ، كۇركىرەگەن داۋىسى اۆستراليادان ماۆريكياعا دەيىن ەستىلگەن.

يندونەزيادا سۋنامي ءجيى بولىپ تۇرادى. ەسكە سالا كەتسەك، 2018 جىلدىڭ قىركۇيەگىندە سۋلاۆەسي ارالىنداعى جەر سىلكىنىسى، ودان كەيىن سۋناميگە ۇلاسقان اپاتتان ەكى مىڭعا جۋىق ادام قازا تاپقان.

سۋنامي تولقىنى ۇيلەردى قيراتىپ، كولىكتەردى اۋداردى

2004 جىلدىڭ جەلتوقسانىندا ءۇندى مۇحيتى جاعالاۋىندا بولعان جەر سىلكىنىسىنىڭ سالدارىنان 228 مىڭ ادام قازا تاپقان، سوققى يندونەزياعا دا اۋىر ءتيدى.