الەۋمەتتىك جەلىدە ارۋجان سايننىڭ قايىرىمدىلىق قورى داۋ استىندا قالدى. مۇنىڭ سەبەبى – ونىڭ قورىندا قىزمەت اتقاراتىن ادام 1986 جىلعى جەلتوقسان وقيعاسىنا بەلسەنە قاتىستى. الايدا قازاق جاستارىمەن بىرگە بولعان جوق، كەرىسىنشە ولاردى جانشىپ، ساباعانداردىڭ قاتارىندا بولدى. وسىعان بايلانىستى كاسىپكەر مارات تولىباي Facebookتەگى پاراقشاسىندا پىكىر ءبىلدىرىپتى. كاسىپكەردىڭ ورىس تىلىندە جازىلعان پىكىرىن قازاقشاعا اۋدارىپ بەرۋدى ءجون كوردىك. 

"ارۋجان سايننىڭ قول استىنداعى قىزمەتكەرى جايلى بىلگەن قازاقستاندىقتار ورە تۇرەگەلدى، سايننان ونداي قىزمەتكەردى جۇمىستان شىعارۋىن تالاپ ەتتى. الايدا ارۋجان بۇلاي ىستەۋگە قارسى، سەبەبى الگى ادام قور ءۇشىن ءارى ەلىمىزدەگى قامقورسىز بالالار ءۇشىن كوپ جاقسىلىق جاساعان.

بۇعان شامدانعان الەۋمەتتىك جەلى بەلسەندىلەرى ارۋجان سايننىڭ قورىنا قارسى كۇرەسۋگە كوشتى. ال كەيبىر تانىمال بلوگەرلەر ارۋجان سايندى سىناۋشىلاردىڭ وزدەرىن سىناپ تاستادى. ايتۋلارىنشا، ولار – تەك الەۋمەتتىك جەلىدە باتىر، شىنىندا، ارۋجان ساين جاساعان جاقسىلىقتىڭ ءبىرىن دە جاساي المايدى. ونى سىناۋعا بولمايدى-مىس.

ەگەر قاتەلەسكەن تۇسىم بولسا، تۇزەپ جىبەرىڭىزدەر، مارحابات!

مەنىڭ كوزقاراسىم مىناداي:

ارۋجان ساين – راسىندا، بۇگىنگى زاماننىڭ بەلدى تۇلعاسى. ەلىمىزدىڭ كىشكەنتاي ازاماتتارى مەن ازاماتشالارى ءۇشىن قولىنان كەلگەنىنىڭ ءبارىن جاسادى، سولاردىڭ قۇقى ءۇشىن كۇرەستى. سول سەبەپتى دە ول ەلى ءۇشىن «تەرەزا انا» اتانعان ادام.

ءبىراق، ەرەن ەڭبەگى ءۇشىن ادامنىڭ قاتەلىگىن كەشىرە سالۋ كەرەك دەگەن قاعيداعا ءوز باسىم قارسىمىن. ەلەستەتىپ كورىڭىزشى، كومپانيانىڭ ءبىر قىزمەتكەرى جۇمىسقا كۇندە كەشىگىپ كەلەدى، جينالىستارعا قاتىسپايدى، مەزى بولعان باستىعى ەشتەڭە دەي المايدى، سەبەبى الگى قىزمەتكەر كومپانيا ءۇشىن مول ەڭبەك سىڭىرگەن. نە بولماسا، "زاڭ بارشاعا ورتاق" دەپ كونستيتۋسياعا قول قويادى، تەك ءبىر ادام ءۇشىن ول زاڭ جۇرمەيدى، سەبەبى، ول  مەملەكەت ءۇشىن تەر توككەن. مۇنداي جاعدايلاردىڭ بولۋى مۇمكىن بە؟

مەنىڭشە، ەشقانداي قۇرمەت، ەڭبەك ادام بالاسىن تارتىپتەن تايدىرماۋى ءتيىس. كەرىسىنشە، ول ادام قوعامعا ۇلگى. ماسەلەن، وتانى ءۇشىن ادال قىزمەت ەتكەن ماحاتما گاندي اۋىز تولتىرىپ ايتۋعا تۇرارلىق تۇلعا، الايدا ولە - ولگەنشە ءوزى جاساپ العان پرينسيپتەردەن باس تارتقان جوق.

مۇندا دا سولاي. ارۋجاننىڭ ەڭبەگى ەرەن، "ءبىراق بۇل ونى سىناۋعا بولمايدى" دەگەن ءسوز ەمەس قوي.

سوندىقتان، مەن ءدال ءقازىر ارۋجاندى سىناماقپىن. ونىڭ ارەكەتى مۇلدەم دۇرىس ەمەس. تاۋەلسىزدىك ءۇشىن كۇرەسكەن جاستاردى توقتاتقىسى كەلىپ، قىسىم كورسەتكەنىن ماقتان تۇتقان اداممەن بىرگە قىزمەت ەتۋ بىلاي تۇرسىن، قونى رعاۋدىڭ ءوزى ابەستىك. ونداي قىزمەتكەردەن بويدى بارىنشا اۋلاق ۇستاۋ كەرەك. "ايتپەگەندە، ارۋجاننىڭ دا كوزقاراسى قىزمەتكەرىنىڭ كوزقاراسىمەن بىردەي" دەگەن ويلار تۋىندايدى.

بۇعان قوسا، ارۋجان سايننىڭ قورىنا قارسى شىعۋدى قولدامايمىن. بالالارعا كومەك قاشان دا قاجەت.

قورىتا كەلە، مىنانى ايتقىم كەلەدى.

قوردىڭ «قۇرمەتتى» قىزمەتكەرى 1986 جىلعى ارەكەتىنە وكىنىپ، حالىقتان كەشىرىم سۇراسا يگى. ەگەر ميتينگىگە شىققان ستۋدەنتتەردى كۇرەكپەن ساباعانى ءۇشىن ءوز-وزىن ءارى قاراي ماقتان تۇتسا، حالىقتىڭ قارعىسىنا قالماي، ەڭ بولماعاندا، ارۋجان سايننىڭ قورىنان ءوز ەركىمەن كەتسىن. 1986 جىلى بويىندا بولماعان مەيىرىمدىلىك پەن جىگەردى بۇگىن تانىتسا، كەرەمەت بولار ەدى".

مارات تولىبايەۆ، كاسىپكەر

Facebook-تەگى پاراقشاسىنان الىندى