"ديماشتا ءبىر تىلسىم كۇش بار..." بۇل ءسوزدى تانىمال رەسەيلىك كومپوزيتور يگور كرۋتوي كرەملدەگى كونسەرتتەن كەيىن ايتقان. يگور كرۋتوي ايتقان تىلسىم كۇش سول، ديماش ءوز جانكۇيەرلەرىمەن كوسموس ارقىلى تىلدەسە الادى. ديماشتىڭ داۋىسىنا الەمدەگى ميلليونداعان، ءتىپتى ميللياردتاعان ادامداردىڭ عاشىق بولۋىنىڭ سەبەبى دە وسى تىلسىم كۇشپەن بايلانىستى شىعار كىم ءبىلسىن؟! لوندونداعى كونسەرتتىڭ ۆيدەوسى جاريالاننان كەيىنگى پىكىرلەر بۇل ءسوزدىڭ تۇپ-توركىنىن تۇگەل ءتۇسىندىردى. اتالمىش كونسەرتكە جانكۇيەرلەردىڭ كەيبىرى 12 ساعات ەرتە كەلگەن. ولاردىڭ بار ويى ديماشتى جاقىننان كورۋ بولدى.  ديماشتىڭ ونەرىنە تابىنعان شەتەلدىك جانكۇيەرلەردىڭ قىزىقتى ءارى تاڭعالارلىق وقيعالارىن Qamshy.kz اقپارات اگەنتتىگى وقىرمان نازارىنا ۇسىنادى.

"ولەر الدىندا ديماشتى كورسەم، ارمانىم جوق"

ديماشتىڭ كونسەرتىنە  ەگدەلەۋ ەكى قارت كەلدى. ايەلدىڭ جاسى - 69-دا بولسا، قاريا -  75 جاستا. ولاردىڭ دەنساۋلىعى اسا ءماز ەمەس ەكەنى بايقالدى. ءبىراق ولار ديماش ءۇشىن يتاليادان ات ارىلتىپ كەلگەن. ولار «ديماشتى ءوز كوزىمىزبەن كورىپ، داۋىسىن ءوز قۇلاعىمىزبەن ەستىپ، ومىردەن وتسەك»، دەپ ارماندايدى. ەكەۋى دە اۋىر دەرتكە شالدىققان. الايدا ولەر الدىندا ديماشتى ءبىر كورۋ ءۇشىن كونسەرتكە كەلگەن. جاسى كەلگەن ايەل كەلە جاتىپ مەترودا قۇلاپ قالدى. وعان جاڭا اياق كيىم الىپ بەردى، ايتپەسە، ول كونسەرتتى كورە الماس ەدى. ولار لوندونداعى كونسەرت باستالماس بۇرىن ساعات 14:30-دان باستاپ كەزەككە تۇردى. لوندونداعى كونسەرت كەرەمەت بولدى! الايدا الگى ايەل ۇشاقپەن كەرى قايتىپ بارا جاتقاندا ەسىنەن تانىپ قالدى.  جەدەل جاردەم كەلگەن سوڭ ايەل ەسىن جيدى. كەيىن ايەلدىڭ فيزيكالىق جانە ەموسيانالدىق تۇرعىدان قاتتى شارشاعانى انىقتالدى. بۇل تۋرالى Youtube جەلىسىندە «Samal Mir» اتتى قولدانۋشى جازعان.

"ديماش مەنى ولىمنەن اراشالاپ قالدى"

«مەنىڭ قاسىمدا جاس ليتۆالىق ايەل تۇردى. تىم جۇقا كەيىنگەندىكتەن قاتتى توڭىپ قالعانى بايقالدى. مەن ونى جىلىتتىم. كەيىن ول ءوزىنىڭ باسىنان وتكەن ەرەكشە وقيعاسىن ايتىپ بەردى. ليتۆالىق ايەل ءبىراز ۋاقىت بۇرىن سۇيىكتى ادامىنان ايرىلعان. ورنى تولماس قايعىنى ەڭسەرە الماي، ول سۇيىكتىسىنىڭ ارتىنان كەتكىسى كەلىپ، سۋيسيد جاساماق بولادى. الايدا ديماشتىڭ ارقاسىندا، ونىڭ كەرەمەت داۋسىنىڭ ارقاسىندا ولىمنەن امان قالعان. ديماشتىڭ اندەرى ليتۆالىق ايەلدىڭ جان جاراسىنا ەم بولدى. ول جىگىتىنىڭ ءولىمىن سانالى تۇردە  قابىلدادى، ارى قاراي ءومىر سۇرۋگە دەگەن قۇشتارلىعى ارتتى. ديماشتىڭ داۋسى ءبىر ادامدى ولىمنەن اراشالاپ قالاتىنداي قۇدىرەتتى! ءيا، ونىڭ داۋسىندا ەرەكشە تىلسىم كۇش بار. ونىڭ اندەرى، ونىڭ داۋسى ادامنىڭ جان جاراسىن ەمدەي الادى»، - دەپ جازدى Ibrogimova اتتى Youtube جەلىسىن قولدانۋشى.

"ديماش مەنىڭ ءومىرىمدى تۇبەگەيلى وزگەرتتى"

ديماشتىڭ فرانسياداعى جانكۇيەرى روزي ءوزىنىڭ قولىنا ديماشتىڭ قۇرمەتىنە ارنايى تاتۋيروۆكا سالدىرعان. 35 جاستاعى روزي جەكە كلينيكادا حاتشى بولىپ قىزمەت جاسايدى. ەڭ العاش رەت ديماشتى پاريجدەگى گالا-كونسەرتتە كورگەن.

«بۇل 2017 جىلدىڭ 7 قازانى بولاتىن. مەن بۇل كۇندى ەشقاشان ۇمىتپايمىن. ونىڭ داۋسىن ەستىگەن ساتتە ءوز قۇلاعىما ءوزىم سەنبەدىم. ونىڭ ءانىن ەستىگەن كەزدە ءوزىمدى اسپان الەمىندە قالىقتاپ جۇرگەندەي سەزىندىم. كەيىن 2018 جىلى ديماشتىڭ ەسىمىن كيريلليسا تۇرىندە قولىما جازدىردىم. سەبەبى، جىگىتىم  -قىزعانشاق. ول مەنىڭ قولىمدا نە دەپ جازىلىپ تۇرعانىن تۇسىنبەيدى. اراعا ءبىراز ۋاقىت سالىپ مەن ديماشپەن كەزدەسۋ ءۇشىن كانن فەستيۆالىنە باردىم. سول كەزدە جاڭا جاقسى ءبىر يدەيا كەلدى»،- دەيدى روزي.

 كەيىن قازاقستان تۋىنىڭ نەگىزگى نىشاندارى، ديماشتىڭ اۆتوگرافى مەن «جانىم سول» دەگەن ءسوزدى جازدىرعان. روزيعا «جانىم سول» دەگەن ءسوزدىڭ ماعىناسى ۇناعان ەكەن.

«مەنىڭ ديماشقا دەگەن سەزىمىمدى ايتىپ جەتكىزە المايمىن. ونى سونداي قاتتى جاقسى كورەمىن. سەبەبى ول ءومىرىمدى تۇبەگەيلى وزگەرتتى. ول مەنىڭ جانىمدى امان ساقتاپ قالدى دەپ ۇنەمى ايتامىن. سەبەبى، ديماشتى بىلمەي تۇرعان كەزىمدە ءومىرىمنىڭ ەشقانداي ءمان-ماعىناسى بولمادى. مەندە ەشقانداي ماقسات تا، ارمان دا بولمادى. ءقازىر مەنىڭ دوستارىم دا كوپ. ءومىرىم ماعىنالى بولا باستادى. ديماش جانە ونىڭ جانكۇيەرلەرى مەنىڭ ءومىرىمنىڭ ءبىر بولشەگىنە اينادى»، دەيدى روزي.

ديماشتىڭ تالانتىنتىنا ەشكىم شەك كەلتىرمەسى انىق. ول تالانتتى، دارىندى عانا ەمەس  ميللياردتاعان ادامداردىڭ اراسىندا دارالانىپ تۇراتىن ەرەكشە ادام. بۇل ب ا ق قازاققا بۇيىردى. باعالاي الساق، تەك قادىرلەي الساق بولعانى.