وتكەن جىلدىڭ 29 جەلتوقسانىندا بولعان اپاتتى وقيعا بۇكىل ەلدى ەسەڭگىرەتىپ كەتكەنى بەلگىلى. قاراشا حالىق پەن قازا تاپقان جانداردىڭ تۋىستارىنىڭ ەندىگى تىلەگى كىنالى ازاماتقا لايىقتى جازا تاعايىندالۋى. مۇنى ەل بولىپ ءبارى دە تالاپ ەتۋدە.
♦جانتۇرشىگەرلىك جول اپاتىندا قايتىس بولعان ءۇشىنشى ادام كىم؟
وسى وقيعانىڭ ءبىر قۇربانى دينارا حاميتوۆانىڭ تۋىستارىنان كىنالى تاراپتىڭ، ءتىپتى، كەشىرىم دە سۇراماعانى جايىندا جازعان بولاتىنبىز. قانشاما كۇن وتسە دە، جاعداي وزگەرمەگەن. ۇلى تەمىرلان حاسەنوۆكە حابارلاسىپ ءمان-جايدى سۇراعان ەدىك، ءالى كۇنگە دەيىن كىنالى تاراپتان بىردە-بىرى ونىمەن بايلانىسقا شىقپاپتى.
♦مارقۇم دينارانىڭ ءىنىسى: «بىزدەن ەشكىم كەشىرىم سۇرامادى...»
ال وقيعا بولعان كۇنى تاڭعى ساعات 5-تە مارقۇم شولپان ەلگەزەكوۆا، دينارا حاميتوۆا مەن ءتىرى قالعان ايزادا ساتىبالدييەۆا قايدا جول تارتقان ەدى؟
«اپات بولعان كۇنى شولپان اپكە، ايزادا اپكە جانە مەنىڭ انام ۇشەۋى شولپان ەلگەزەكوۆانىڭ ۇيىنە بارا جاتقان. ولار جاقسى ارالاساتىن قۇربىلار ەدى»، - دەيدى تەمىرلان.
دينارا حاميتوۆا ءوزىنىڭ وتباسىمەن قاتار تۋىستارىنا دا دەمەۋ بولعان ەكەن، ولارعا ۇنەمى قارجىلاي كومەك بەرىپ، قولداۋ كورسەتىپ وتىرعان.
مارقۇمنىڭ الەۋمەتتىك جەلىدەگى سوڭعى پوستىندا «بۇل مەنىڭ بالالارسىز قارسى الاتىن العاشقى جاڭا جىل بولماق» دەگەن سوزدەر بار. بەلگىلى بولعانداي، دينارا حاميتوۆا جاڭا جىل مەرەكەسى قارساڭىندا الماتىدا جالعىز ءوزى بولعان، ال ەت-جاقىن تۋىستارى كوكشەتاۋدا قارسى الۋدى جوسپارلاپ جۇرگەن ەكەن.
«انام جاڭا جىلدى وتباسىمەن بىرگە تۋعان-تۋىستارىنىڭ اراسىندا قارسى الۋدى قالاعان ەدى، ءبىراق سول ۋاقىتتا قارجىلاي ماسەلەلەر تۋىنداپ، ول كەلە المادى. سوندىقتان، انام بۇل مەرەكەنى قۇربىلارىمەن اتاپ ءوتۋدى جوسپارلاپ جۇرگەن»، - دەپ ايتىپ ءوتتى مارقۇمنىڭ ۇلى.
تەمىرلان 6 جاسقا تولعاندا اكەسىنەن ايىرىلعانىن ايتىپ بەردى. كەيىن اناسى ەكىنشى رەت تۇرمىسقا شىعىپ، قارىنداسى دۇنيەگە كەلگەن. الايدا، كۇيەۋىمەن اجىراسىپ كەتكەن.
«مەن 6 جاسىمدا اكەمنەن ايىرىلدىم، ەندى انام دا جوق. انامنىڭ قازا تاپقانىن ءبىرىنشى ەستىگەندە ءوزىمنىڭ جەتىم قالعانىمدى ءتۇسىندىم. ءبىراق مەن ەر اداممىن، ەرەسەكپىن. ال قارىنداسىما وبال بولدى، ول ءالى كىشكەنتاي، بۇل قازانى ول قالاي كوتەرەدى، بىلمەدىم. ول ۇنەمى اناسىنىڭ ەتەگىنە جارماسىپ جۇرەتىن ەركە ەدى، ءتىپتى، اجەتxاناعا جالعىز بارمايتىن، ەندى اناسى كەلمەسكە كەتتى. قارىنداسىمنىڭ جاعدايىنا قاتتى الاڭداۋلىمىن»، - دەپ كۇيىندى تەمىرلان.
قاپىدا اناسىنان ايىرىلعان تەمىرلاننىڭ ەندىگى قالاۋى – اپاتقا سەبەپكەر بولعان قىلمىسكەردىڭ لايىقتى جازاسىن الۋى.
«الماتىعا انامنىڭ دەنەسىن الىپ كەتۋگە كەلگەندە بىردەن سوتقا ارىز جازىپ كەتتىك. مەن ءوزىمنىڭ ەڭ اسىل بايلىعىمنان ايىرىلدىم. نە ىستەسەك تە، انام ورتامىزعا قايتىپ كەلمەيدى. دەگەنمەن مەن بۇل اپاتقا كىنالى قىلمىسكەردى زاڭ اياسىندا جازاعا تارتىلۋىن قالايمىن. بۇگىن ءۇش ادامنىڭ ولىمىنە سەبەپ بولدى، ەگەر ونى جاي عانا جاۋاپقا تارتىپ، لايىقتى جازاسىن بەرمەسە، بولاشاقتا تاعى باسقا ادامنىڭ ولىمىنە سەبەپكەر بولمايتىنىنا، بالالاردى تاعى اناسىز، انالاردى بالاسىز قالدىرمايتىنىنا كىم كەپىل؟!» - دەيدى تەمىرلان حاسەنوۆ.
پىكىر قالدىرۋ