ناتو ۇيىمىنا دا قارسىلاس، باسەكەلەس كەرەك. ول ارينە، ەڭ الدىمەن – رەسەي. رەسەيسىز ناتو-عا قيىن. ويتكەنى ءقازىر الەمدە  سولتۇستىك اليانسقا قارسى تۇرار كۇش جوق. سوندىقتان دا ناتو-نىڭ ايقاسار قارسىلاسى تەك قانا رەسەي مەملەكەتى بولىپ تۇر.  

ءسرۋ-دىڭ بۇرىنعى باسشىسى ديەۆيد پەترەۋستىڭ ويىنشا، «قىرعي-قاباق سوعىستان» كەيىن جاعداي تۇراقتالدى. كەڭەس وداعى قۇلادى. ءبىراق كەشەگى كۇنگە دەيىن ناتو-نىڭ قالاي بولماعى دا ۇلكەن ماسەلە بولىپ تۇردى. ويتكەنى سسرو كەلمەسكە كەتكەننەن كەيىن بۇرىنعىداي ساياسي جاعداي شيەلەنىسىپ، تەكەتىرەس ورشىگەن جوق. تەك كەيىنگى جىلدارى عانا الەمدىك ارا سالماق قايتادان بولىنىسكە تۇسە باستادى. وعان باستى سەبەپ – رەسەي».

ديەۆيد پەترەۋستىڭ سوزىنە سەنسەك، «ءقازىر انىعىن ايتقاندا، ناتو ۇيىمىنا نەگىزىنەن اقش ۇلكەن كومەك كورسەتىپ وتىر. قارجىلىق جاعىنان قولداۋ كورسەتىپ وتىرعان دا – سولار. ءبىراق دونالد ترامپ رەسەي ليدەرىنە كەلگەندە ءالى دە جۇمساقتىق تانىتۋدا. ولاي ەتۋگە بولمايدى. ءقازىر الەمگە جان-جاقتان ءقاۋىپ ءتونىپ جاتىر. جۇڭگو، رەسەي جانە يسلام ەكسترەميستەرىنىڭ قاتەرى دە كۇشەيە تۇسۋدە».

دەرەككە جۇگىنەر بولساق، 2012 جىلى پول  برودۆەلل ورتالىق بارلاۋ قىزمەتىنىڭ باسشىسى ديەۆيد پەترەۋستەن زاڭسىز بالا تاپقانىن ءمالىم ەتكەننەن كەيىن ول قىزمەتىنەن كەتكەنى بەلگىلى.

ءسرۋ-دىڭ بۇرىنعى باسشىسىنىڭ «پۋتين ناتو ءۇشىن №1 سىيلىق بولدى» دەپ وتىرعانى بەكەر ەمەس. 1991 جىلى كەڭەس وداعى قۇلاعاننان كەيىن سرۋ اسكەري باسەكەلەستىكپەن ەمەس، ەكونوميكالىق بارلاۋ قىزمەتىمەن اينالىسىا كەتتى. ال ءقازىر ناتو ۇيىمىنا مۇشە ەلدەر ءۇشىن №1 جاۋ رەسەي بولىپ وتىر.

راسىندا دا اقش پرەزيدەنتى دونالد ترامپ 2018 جىلدىڭ قاراشا ايىندا سويلەگەن سوزىندە «ناتو اسكەري ۇيىمىنا مۇشە ەلدەر بولىنەتىن قارجىنى تاعى دا ارتتىرىپ، ءتورت پايىزعا جەتكىزۋ كەرەك» دەپ مالىمدەمە جاساعانى بەلگىلى.  ءقازىر ءار ەلدىڭ اسكەري ۇيىمعا بەرىلەتىن قارجىسى 2 پايىز شاماسىندا عانا ەكەنىن ايتا كەتكەن ءجون.

ەۋروپا مەن اقش-تىڭ جانە ناتو ۇيىمىنىڭ رەسەيدەن سەسكەنەتىندەي ءجونى بار. بۇل ۇرەي  اسىرەسە، رەسەيدىڭ قىرىمدى اننەكسيالاۋى مەن دونباسس اۋماعىنا   اسكەر كىرگىزۋىنەن كەيىن ارتا ءتۇستى. اقش-تىڭ ەۋروپاداعى قۇرلىق اسكەرلەرىنىڭ باسشىسى گەنەرال-لەيتەنانت فرەدەريك بەن حودجەس «كرەمل ناتو-نىڭ اراسىنا ىرىتكى سالىپ، ۇيىمدى اسكەري قيمىلسىز-اق جويعىسى كەلەدى»، –دەپ مالىمدەگەنى بار...