ءبىر دوسىمدى ىزدەپ استاناداعى اعىلشىن ءتىلىن وقىتاتىن ورتالىققا باردىم. ۋاقىتىنان بۇرىن بارىپ 15-20 مينۋتتاي كۇتۋگە تۋرا كەلدى. سول ارالىقتا بايقاعانىم ءتىل ۇيرەنەمىن دەگەن جاستار وتە كوپ. ورتاشا ەسەپپەن ايىنا 20-25 مىڭ تەڭگەدەن تولەيدى. ءبىر جىلدان استام ۋاقىت ۇزدىكسىز قاتىسىپ جۇرگەندەر دە بار. جالپى جاستاردىڭ شەت ءتىلىن ۇيرەنۋى قۋانتارلىق جاعداي.
ورتالىقتىڭ ىشىندە وتىرىپ جاسى 40-45 شاماسىنداعى تاشكەنتتىڭ وزبەگىمەن تانىستىم. قازاقستاندا ءتورت جىلدان استام ۋاقىت ەڭبەك ەتىپ ءجۇر. ءۇي جوندەۋ جۇمىستارىن (ەۆرورەمونت) جۇرگىزەدى ەكەن. الگى وزبەگىمىز ءتورت جىلدا ءبىر اۋىز قازاقشا ۇيرەنبەگەن. ورىسشاسى جاقسى. قازاقستاندا ورىس ءتىلىنىڭ ارقاسىندا نان تاۋىپ ءجۇر. ءبىراق الدىنا قويعان ماقساتى — 1 جىلدا اعىلشىن ءتىلىن ۇيرەنىپ اقش-قا كەتۋ. سول ءۇشىن استانادا تاپقان اقشاسىنىڭ ءبىر بولىگى مەن ۋاقىتىن اعىلشىن ءتىلىن ۇيرەنۋگە جۇمساۋعا بەل بۋىپتى.
مەنى ويلاندىراتىنى مىناۋ: تۇركيادا، اقش-تا وقىدىم. ول جاقتا تاكسيست بولۋ ءۇشىن دە، رەمونت جاساۋ ءۇشىن دە تۇرىك نە اعىلشىن ءتىلىن ءبىلۋىڭ كەرەك. سەبەبى قىزمەت بارىسىندا تاپسىرىس بەرۋشىمەن بايلانىس ورناتاتىن باسقا ءتىل جوق. قالاساڭ دا، قالاماساڭ دا ۇيرەنەسىڭ. ءوزىڭ ءۇشىن ۇيرەنۋگە تالپىناسىڭ. قوعام سونداي. تالاپ سونداي. الەمدە ادام قۇقىعىن قورعاپ، دەموكراتيانى تۋ ەتىپ جۇرگەن ەل — اقش. ءبىراق دۇنيەنىڭ ءار تاراپىنان قانشا ۇلت وكىلى كەلسە دە، نيۋ-يوركتە نان تابۋ ءۇشىن 4 جىلدا اعىلشىنشا ءوزى-اق سايراپ شىعادى. تۇركيادا تۇرىك ءتىلىنىڭ قانشالىقتى ماڭىزدى ەكەنى ايتپاي-اق تۇسىنىكتى. ول تۇگىلى كورشى وزبەكستانعا بارىپ دۇكەنشىمەن ورىسشا سويلەسسەڭ، وزبەكشە جاۋاپ بەرەدى. تاشكەنتتە بولعاندا باسىمنان وتكەن سوڭ بىلەمىن...
ال بىزدەگى بەيشارا جاعدايدى قاراڭىزشى! ءبىز تۇگىلى شەتتەن كەلگەن جۇمىسشىلارعا دەيىن قازاقستاندا قازاق ءتىلىن كەرەك قىلماي، بىرنەشە جىل جۇمىس ىستەپ، اقشا تاۋىپ، تاشكەنتتە قالعان وتباسىنا قارجى اۋدارىپ، اقش-قا كەتۋ ءۇشىن استانادا اعىلشىن ءتىلىن وقىپ، قازاق ءتىلىن بىلمەي-اق قازاقستاندا وزدەرىن جايلى سەزىنىپ ءجۇر. شەتتەن كەلگەن جۇمىسشىلارعا دا قازاقستاندا نان تابۋ ءۇشىن قازاق ءتىلىنىڭ كەرەگى جوق بولعانى عوي.
نەگىزى ءبىزدى باسقارىپ وتىرعان كەشەگى كوممۋنيستەر تاربيەلەپ وسىرگەن بۇگىنگى بيلىكتىڭ ءبىر مىنەزى — "تىم دالاقپاي". كوممۋنيستەر "ورىستىڭ ءتىلى — ۇلى ءتىل" دەپ ميلارىنا جاقسىلاپ قۇيعان بولۋى كەرەك ءالى كۇنگە مەملەكەتتىك ءتىلدى بوساعادا ۇستاپ كەلەدى. ورىس ءتىلى دە، اعىلشىن ءتىلى دە كەرەك. ۇيرەنسە ءار ازاماتتىڭ وزىنە جاقسى. ءبىراق، وزگە ءتىلدى ۇيرەنۋ، شەت ءتىلدى قازاقستاندا قولدانۋ قازاق ءتىلىنىڭ ەسەبىنەن جۇرگىزىلمەۋى كەرەك. ءبىزدىڭ "دالاقبايلار" سونى تۇسىنبەي ءجۇر عوي. مەنىڭ ويىمشا قازاقستاندا تۇراتىن بارلىق ۇلت وكىلدەرى ءبىر تىلدە سويلەمەي، مەملەكەتتىك ءتىلىمىز ءوز شىنايى مارتەبەسىن الماي قازاقستان xالقى ەشقاشان ءبىرتۇتاس بولمايدى. مەن ءوز ەلىمدە، ءوزىمنىڭ انا ءتىلىمنىڭ بيىكتە بولعانىن قالايمىن. مۇنى ىسكە اسىرا الماعان بيلىكتىڭ ەل تىزگىنىن ۇستايتىن ۋاقىتى دا، ساعاتى دا ساناۋلى بولاتىن شىعار. بۇل سالادا رەفورما مەن وزگەرىستىڭ قاجەت ەكەننىن ۋاقىت ءوزى-اق دالەلدەپ كەلەدى. سەبەبى شىدامنىڭ دا شەگى بار!
Bauyrzhan Serikbayev-تىڭ facebook-تاعى پاراقشاسىنان
