مانەرلەپ سىرعاناۋشى دەنيس تەننىڭ ءولىمى تۋرالى قورىتىندىنى جازعان سوت-مەديسينالىق ساراپشى الماتىدا جۇما كۇنى ءوتىپ جاتقان باستى سوت تالقىلاۋىندا ءسوز سويلەدى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

ساراپشى ءازيز يبراحيموۆتىڭ ايتۋىنشا، سپورتشى پىشاق جاراقاتىنان كوپ قان جوعالتۋدىڭ سالدارىنان كوز جۇمعان.

"ساراپتاما بارىسىندا دەنيس تەننىڭ ەكى پىشاق جاراقاتىن العانى بەلگىلى بولدى. ميى ءىسىپ، ىشكى ورگاندارىنىڭ قانازدىعىنا ۇشىراعان. 17:00-دە كوز جۇمعانى تىركەلگەن"، — دەپ مالىمەت بەردى يبراحيموۆ.

"مۇنداي جاراقات العان ادامنىڭ ءتىرى قالۋى مۇمكىن بە؟" دەگەن ادۆوكاتتىڭ سۇراعىنا ساراپشى "جوق دەپ ناقتى ايتا المايمىن، ءار ادامنىڭ اعزاسى ءارتۇرلى" دەپ جاۋاپ بەردى.

"كەي جاعدايدا ادام العاشقى مينۋتتا شوك الۋى مۇمكىن. جابىرلەنۋشىنىڭ باسىنان وتكەن جاعدايدى الساق، جاراقاتى سالدارىنان تەز قان جوعالتقان"، — دەدى يبراحيموۆ.

سوتتا مەديسينالىق-كريمينالدىق ساراپتاما جۇرگىزگەن مامان ارتەم كۋربانگالييەۆ جاۋاپ بەردى. ساراپشىنىڭ ايتۋىنشا، ول مانەرلەپ سىرعاناۋشىنىڭ كيىمدەرى مەن تەرى بولىكتەرىن قاراعان ەكەن.

"ەكى پىشاق جاراقاتىن العان، ءبىرىنىڭ ۇزىندىعى 9 سانتيمەتر، ەكىنشىسى – 4 سانتيمەتر"، — دەپ مالىمەت بەردى كۋربانگالييەۆ. الايدا مامان كۇدىكتىلەردىڭ دەنيس تەنگە قالاي پىشاق سالعانى تۋرالى ناقتى ايتا المادى.

-"دەنيس تەننىڭ جاراقاتىنا قاراعاندا ادام ارتىنان نەمەسە وڭ جاعىنان پىشاق سالعان بولسا كەرەك. الايدا مەنىڭ پايىمداۋىمشا، الدىڭعى جاعىنان مۇنداي پىشاق جاراقاتىن تەك سولاقاي ادام عانا جاساي الادى. ال ارت جاعىنان وڭقاي ادام پىشاق سالعان بولۋى مۇمكىن"، — دەپ اتاپ ءوتتى كۋربانگالييەۆ.

جۇما كۇنى 11 قاڭتاردا الماتى قىلمىستىق ىستەر بويىنشا مامانداندىرىلعان اۋدانارالىق سوتىندا تانىمال مانەرلەپ سىرعاناۋشى دەنيس تەننىڭ ولىمىنە قاتىستى باستى سوت تالقىلاۋى ءوتىپ جاتىر. 38 تومنان تۇراتىن قىلمىستىق ءىس 13 جەلتوقساندا سوتقا جەتكەن. سوتتالۋشىلار – ارمان قۇدايبەرگەنوۆ، نۇرالى قياسوۆ جانە جانار تولىبايەۆا. "قۇدايبەرگەنوۆ پەن قياسوۆ كىسى ءولتىردى" دەپ ايىپتالسا، تولىبايەۆاعا قىلمىس تۋرالى حابارلاماعانى ءۇشىن ايىپ تاعىلعان.

سوت وتىرىسى بارىسىندا وقيعا تۋرالى جاڭا دەرەكتەر انىقتالۋدا. ءۇش كۇدىكتى دە كىناسىن مويىندامايدى. جابىرلەنۋشى تاراپ دەنيس تەننىڭ تاپسىرىسپەن ولتىرىلگەنىن العا تارتادى.

دەنيس تەننىڭ ءولىمى

دەنيس تەن 25 جاسىندا كولىك ۇرىلارىنىڭ قولىنان اجال قۇشتى. 2018 جىلدىڭ 19 شىلدەسىندە دەنيس Lexus كولىگىن الماتى ورتالىعىندا تۇراققا قويىپ، مەيرامحاناعا كىرەدى. شىققان كەزدە كولىگىنىڭ ايناسىن ۇرلاپ جاتقان ەكى جىگىتتى كورىپ، ولارمەن قاقتىعىسقا تۇسكەن. ۇرىلاردىڭ ءبىرى سپورتشىنىڭ اياعىنا پىشاق سۇعىپ جىبەرەدى. ەكى ساعاتتان سوڭ دەنيس تەن كوپ قان جوعالتۋ سالدارىنان اۋرۋحانادا كوز جۇمدى.