ءوز تۋىسىنان ءزابىر كورگەن سەمەيلىك جەتىم جىگىت مال سوڭىنا سالىنىپ، ودان قالسا وزگەلەرگە جالشىلىققا جىبەرىلگەن. بالا كەزىندە "اقىل-ەسى دۇرىس ەمەس" دەپ تانىلعان جارىمجان بالاعا اپاسى قامقورلىق جاساۋدىڭ ورنىنا، قورلىق كورسەتىپتى. ءقازىر مىڭعىرعان مالمەن ءومىرىن وتكىزگەن جاس جىگىت اپكەسىن پانالاپ وتىر. بۇل تۋرالى ەۋرازيا ءبىرىنشى ارناسى حابارلادى.

ەسەنبەك راحمەتوۆ اتا-اناسىنان ەرتە ايرىلىپ، 15 جاسىندا جەتىم قالعان. ونى قاينار اۋىلىنداعى ناعاشى اپاسى اسىراپ الىپتى. الايدا، العاشىندا "ەش جاماندىق كورمەيسىڭ" دەپ ۋادەنى ۇيىپ-توككەن تۋىسى بالانى لەزدە اۋرۋلار قاتارىنا قوسىپ، انىقتاما جاساتىپتى. وسىلايشا، اياق استى ەسى دۇرىس ەمەستەر قاتارىنا قوسىلعان بوزبالا قىستاقتا مال باعىپ، مالايدىڭ  قامىتىن ارقالاعان. 

“قاشقاندا ەجىك اپام ءوزى دەمالىسقا جىبەرمەدى. مامىردان باستاپ ءوزىم حابارلاستىم تالاي. ءبىراق جىبەرمەدى. 4-5 اي ءوتتى، ۇندەگەن جوقپىن. سونىمەن كەتۋگە تۋرا كەلدى. دەمالىسقا جىبەرمەسە كىم شىدايدى وعان 1 جىل؟ 280 مىڭدى اعاما قايتادان قايتار قارىزىڭدى جاۋىپ بەرەم. مىنا اپام اقشامدى وتەپ بەرسە بولدى”، – دەيدى قۇلدىقتا بولعان جىگىت ەسەنبەك راحمەتوۆ.

ەسەنبەكتىڭ سوزىنشە مال باعۋمەن بار ۋاقىتى وتسە دە، وعان بەرىلەتىن تيىن-تەبەندى ناعاشى اپاسى الىپ جۇرگەن. ءتىپتى ۇستىنە كيەر ءجونى ءتۇزۋ كيىمى جوق ەكەنىن ايتادى. بىلتىر 2 ءىرى قارانى ۇرلاتىپ، قوجالىققا 280 مىڭ تەڭگە قارىز بولىپ قالعان. ال وزگە قىستاقتىڭ ادامدارى تالاپ ەتىپ كەلگەندە، اپاسى جەتىم جىگىتتىڭ ءوزىن ساۋدالاعان. "مالدىڭ قۇنىن وسىنىڭ ءوزىن جۇمساپ وندىرىڭدەر" دەگەن كورىنەدى. الايدا جالشىلىقتان جاۋىر بولعان ەسەنبەك  جاقىندارىنا قاشىپ قۇتىلىپتى. ءبىراق، ناعاشى اپايى "مەن جاقسىلىقتان باسقا جاساعانىم جوق" دەپ ازار دا بەزەر بولدى.

"ءوزىمنىڭ تۋىستىق پارىزىمدى وتەپ وتىرمىن. باسقا ەشقانداي نيەتىم جوق. قايتا بۇلاردى ومىرگە تالپىندىرىپ، كوزىن اشىپ وتىرمىن. اكە-شەشەسى بار كەزدە دە وقىماعان. 280 مىڭ دەگەندى بىلمەيمىن. كەرىسىنشە، مەن ولاردى كيىندىردىم، تاماق بەردىم، سۋ بەردىم. باسقا ەشنارسەنى بىلمەيمىن" – دەيدى ەسەنبەكتىڭ ناعاشى اپاسى ەلشاربان احمەتوۆا.

ال ەسەنبەكتىڭ تۋعان اپكەسى ىنىسىنە مۇگەدەكتىگى ءۇشىن تولەنەتىن مەملەكەتتىك كومەكتى ءالى ناعاشى اپايى ەلشاربان احمەتوۆانىڭ يەمدەنىپ وتىرعانىن ايتادى. ەسەنبەك ۇيىنە قانشا بارعانمەن، ءتولقۇجاتىن قايتارماي اۋرە-سارساڭعا ءتۇسىرىپ ءجۇر ەكەن. پوليسيا بولسا ءۇنسىز. "تەكسەرۋ جۇمىستارى ءجۇرىپ جاتىر" دەپ سىلتاۋ ايتۋمەن قۇتىلاتىن كورىنەدى.

“ول تەك اقشا ءۇشىن ۇستادى. بۇعان كومەك ءۇي بەرىلەدى، اقشا بەرىلەدى. سونىڭ ءبارىن ءوزى العىسى كەلدى. بۇل بالانى قاراعان جوق. ءبارىبىر قىستاققا جىبەرىپ، ايلىعىن ءوزى الىپ وتىردى. بىزگە تامىزدا قاشىپ كەلگەنىندە كارتوچكاسىن بىردەن بۇعاتتاپ تاستادىق. ول كىسنىڭى قولىندا پاسپورت بولعاندىقتان اشىپ الىپتى. ءسويتىپ جينالعان 4 ايدىڭ اقشاسىن الىپ الدى” – دەيدى ەسەنبەكتىڭ اپكەسى شولپان قۇسايىنوۆا.

ەسەنبەكتىڭ تۋعان اپكەسى دەنى ساۋ باۋىرىن "اۋرۋ" دەپ، جۇمىسقا جەككەنى ءۇشىن تۋىسقانى الشاربان احمەتوۆاعا وكپەلى. قارا جۇمىسقا سالعانى بىلاي تۇرسىن، اش-جالاڭاش قالدىرعان دەيدى. ونىڭ تاپقان اقشاسىن قالتاسىنا باسىپ وتىر دەپ ناليدى. 

“اتالعان تۇلعا بويىنشا كەلەتىن بولساق، ەندى ول زاڭمەن بەلگىلەنەدى. سودان كەيىن ارنايى كوميسسيا قارايدى. ارينە ەگەر تاعى باسقا تۋىستارى تابىلىپ، سول وزىنە ءوتىنىش جاساپ وسىعان ءبىر ىقىلاس ءبىلدىرىپ جاتسا ول زاڭمەن قارالىپ، ءتيىستى جاڭاعى قۇزىرلى ورگاندارمەن كەلىسە وتىرىپ، ماسەلە شەشىلەدى” – دەيدى قالالىق جۇمىسپەن قامتۋ جانە الەۋمەتتىك باعدارلامالار مەن ازاماتتىق حال اكتىلەرىن تىركەۋ ءبولىمى باسشىسىنىڭ ورىنباسارى ازامات قۇرمانعالييەۆ.

جاۋاپتى ورگان وكىلدەرى بۇل ماسەلەنىڭ ۇزاققا سوزىلماي شەشىلەتىنىنە سەنىمدى. ەگەر اقىل-ەسى كەم دەپ تابىلعان تۇلعانىڭ وزگە دە جاناشىرلارى تابىلا تۇرىپ، قامقورلىققا الۋدان باس تارتسا، ول مەملەكەتتىڭ قاراماعىنا ءوتۋى ءتيىس دەگەن شەشىمدى العا تارتتى. ال جاسى ەندى 22-گە كەلگەن جاس جىگىت ءبىلىم الىپ، شاڭىراق قۇرۋدى ارماندايدى.