باقسىنىڭ ەمىنەن كەيىن كوز جۇمعان مارقۇم جىگىتتىڭ تۋىستارى ەمشىگە قارسى ءىس قوزعالعانىنا قارسى. ءداستۇرلى مەديسينادان شيپا بولماعاندىقتان، اقىل-ەسىنىڭ اۋىتقۋىنان ءۇش جىلداي قينالعان 28 جاستاعى جىگىتتى جاقىندارى باقسىعا ءوز ەرىكتەرىمەن اكەلىپتى. الايدا ناۋقاس 4 كۇن بۇرىن بەلگىسىز جاعدايدا قايتىس بولدى دەپ جازادى Qamshy.kz اقپارات اگەنتتىگى "الماتى" تەلەارناسىنىڭ دەرەگىن نەگىزگە الىپ.

پوليسيانىڭ دەرەگىنشە، شامالعان اۋىلىنىڭ تۇرعىنى اۋىر دەنە جاراقاتىنان قايتىس بولعان. الايدا،  ەمشى جىگىتتىڭ دەنەسىندەگى جاراقاتتاردى بۇرىن دا بايقاعانىن ايتادى. ەكزورسيزم سەانسى، ياعني "كىسى دەنەدەن جىن قۋۋ كەزىندە قايتىس بولدى" دەگەن ايىپ شىندىققا جاناسا ما؟ تەرگەۋ يزولياتورىنان قولحاتپەن شىققان باقسىنى مارقۇمنىڭ تۋىستارى نەگە ايىپقا تارتقىسى جوق؟ 

"اللا قۇر قالدىرماس. سوندىقتان مۇنى اللانىڭ بۇيرىعىنا، تاعدىردىڭ جازۋىنا قالدىرايىق. جاقسىلىق ەمەس، مەن سەزەمىن، جاقسىلىق ەمەس. مەن ءقازىر كىنالىمىن دە. سوندىقتان ەكى جىلدان ءتورت جىلعا شارتتى جازا الۋىم مۇمكىن، بولماسا ارمەن قاراي كەتىپ قالارمىن"، — دەيدى ەمشىنىڭ ءوزى.

ءتورت بۇركىت، ءۇش تازىسىن سەرىك ەرتكەن ابدىكارىم قۇسبەگىلىك ونەرىمەن وڭىرگە تانىمال. ۇيىندەگى ماقتاۋ قاعازدارى مەن كۋبوكتارى ۇلتتىق سپورتقا قوسقان ەڭبەگىنە وراي بەرىلگەن. 63 جاسىندا "جىن كىرگەن جاندى ەمدەيمىن" دەپ باسى داۋعا قالعان قۇسبەگى بىرنەشە كۇن قامالعان سوڭ، بۇگىن قولحاتپەن بوستاندىققا شىعىپتى.

"ءيا، قولىن بايلاپ الىپ كەلەدى. سولاي الىپ كەتەدى. كۇندىز، تاڭەرتەڭ اكەلەدى. ءبىر ساعاتتاي ەمدەيدى، سودان قايتىپ كەتەدى"، — دەپ ءمان-جايدى بايانداپ ءوتتى قۇسبەگىنىڭ ايەلى.

ەم سۇراعانعا دەم بەرۋ قاسيەتى بار قۇسبەگى ەم-دوم كەزىندە دۇعادان وزگە، قامشى، ءمۇيىز سىندى زاتتاردى قولدانادى ەكەن. قاسقىر مەن تۇلكى تەرىسى ىلىنگەن شاعىن بولمەنىڭ قابىرعاسىنداعى قىزعىلت ءتۇس – 28 جاستاعى تۇرار ورازالييەۆتىڭ قانى.

"تىنىشتالماي، باسىن قابىرعاعا سوقتى، ءبىراق كۇدىككە ىلىنگەنىمە وكىنبەيمىن. اۋىرعان جاندى جاقىندارى بايلاپ، قولىن كىسەندەپ اكەلىپ، جارتى ساعات ەم سالعان سوڭ، الىپ كەتەتىن. جەتىنشى كۇنگە قاراعاندا ەسىن جيناپ، جاقسارىپ قالعان ەدى"، — دەيدى قۇسبەگى.

ال جىگىتتىڭ تۋىستارى تۇراردى ۇيدە بايلاپ ۇستاعاندارىن، ول ءوزىنىڭ ساۋساعىن دا شاپقانىن، كولىكتىڭ استىنا دا جۇگىرگەنىن باياندادى.

"ايتۋىنشا،  جاتقان كەزدە اۋزىما ءبىر نارسە كىرىپ كەتتى دەدى. سودان قاراڭعى بولمەگە قاشا بەرەتىن بولدى. قاتارعا قوسىلمايتىن بولدى. بىرەۋلەر جىن دەدى، بىرەۋلەر دۋالاعان دەدى. ءبىرتۇرلى بولىپ كەتتى"، — دەدى مارقۇم ورازالييەۆتىڭ اعاسى امانتاي.

قابىرعاسى كۇلدىرەپ قايتىس بولعان جىگىتتى جاقىندارى تالعارداعى جۇيكە اۋرۋلارى اۋرۋحاناسىنادا جاتقىزعان. جانى جاي تاپپاعان جىگىت وزىنە بىرنەشە رەت قول جۇمساماق بولعان سوڭ، تۋىستارى ونى ۇيدە كىسەندەپ، كۇشپەن ۇستاپتى.

"وتىن شابامىن" دەپ قولىن شاۋىپ تاستاعان. سودان قاشىپ، شامالعان ستانسياسىنا كەتىپ قالدى. ودان ماشيناعا سالىپ، ۇزىناعاشقا الىپ كەلدى. مەن ۇزىناعاشقا بارىپ، قاسكەلەڭدەگى اۋرۋحاناعا اپاردىق. بىلمەيمىن عوي، جىن كىرسە، نەشە مولداعا باردى، جازىلمادى عوي. پسيحيكالىق اۋرۋعا شالدىققان با دەيمىن"، — دەدى مارقۇمنىڭ تۋىسى ەركەعالي ابدىعالييەۆ.

مارقۇمنىڭ تۋىستارى تىكەلەي كامەراعا تىلدەسۋگە قارسى بولدى. ءبىراق اۋىزەكى ايتۋلارىنا قاراعاندا، ولار مەديسينادان مەدەت تاپپاعان سوڭ، باۋىرلارىن قىرىقتان استام ەمشى مەن مولداعا اپارىپ ەمدەتكەن. الايدا، جىگىتكە ەم دە، ەس تە كىرمەي، ءومىرىنىڭ سوڭى وسىلاي وكىنىشپەن اياقتالعان.

"بۇركىتشى كىنالى ەمەس، تاعدىرى سولاي بولدى. سوندىقتان الداعى ۋاقىتتا سوڭعى رەت اپارىپ ەمدەتكەن باقسىنى سوتتا بارىنشا اقتاپ الۋعا تىرىسامىز، وعان وكپە، رەنىشىمىز جوق"، — دەستى.