شوقىنىپ كەتپەڭىزدەر!
الدىمىزدا حريستيان ءدىنى وكىلدەرىنە تيەسىلى كرەششەنيە، ياعني "سۋعا ءتۇسۋ ارقىلى كۇنادان تازارۋ" ءدىني ءراسىمى كەلە جاتىر. مۇنىڭ ءبىزدىڭ قازاق حالقىنا جانە بارشا مۇسىلمان قاۋىمىنا مۇلدەم قاتىسى جوق.
وكىنىشكە قاراي، بۇعان دەيىن وسى شوقىنۋ راسىمىنە حريستياندىقتارمەن قاتار ءوزىمىزدىڭ كەيبىر قازاق باۋىرلارىمىز دا اسا بەلسەندىلىكپەن قاتىسىپ، قاڭتاردىڭ ايازىندا قارا سۋعا شومىلىپ جۇرگەنىن كوردىك. ەستەرىڭىزدە بولسىن، ەگەر ول جەرگە باسقا دىندىلەرگە ەلىكتەپ، "وسىلاي جاساسام، كۇنادان ارىلادى ەكەنمىن" دەپ بارساڭىز، اداسقانداردان بولاسىز. ودان اللا ساقتاسىن! سەبەبى، بۇلار «شىنىندا، اللا دەگەن – ءماريام ۇلى يسا» دەپ اداسقان قاۋىمنىڭ وكىلدەرى. بۇل – ادامنىڭ ەمەس، اللا تاعالانىڭ ياعني، قۇران ءسوزى. ەگەر دەنەڭىزدى شىنىقتىرۋ ماقساتى بولسا، باسقا كۇنى بارىڭىز.
اللانىڭ ەلشىسى، سوڭعى پايعامبارىمىز مۇحاممەد (سالاللاھۋ عالايھي ۋاسسالام) ءبىر حاديسىندە "كىمدە كىم ءبىر قاۋىمعا ەلىكتەسە، ول سولاردان" دەپ ايتادى. ال حريستياندىقتاردىڭ بۇل كۇندەرى جاپپاي سۋعا ءتۇسۋىنىڭ ءمانى نەدە؟ قىسقاشا باياندايىق.
وبلىستىق ءماشھۇر ءجۇسىپ ورتالىق مەشىتىنىڭ باسپا ءسوز حاتشىسى امانتاي تويشىباي ۇلىنىڭ سوزىنشە، «كرەششەنيە» ءسوزى گرەك تىلىنەن اۋدارعاندا «باتۋ» دەگەن ماعىنانى بىلدىرەدى. ولاردىڭ سەنىمدەرى بويىنشا، وسى كۇندەرى جەر بەتىندەگى بارلىق سۋ اتاۋى جاڭارىپ تازارادى-مىس. ياعني، شىركەۋ اكەيى سۋعا بەلگىلى دۇعالاردى ايتىپ، ايقىشتى (كرەست) باتىرادى. وسىدان كەيىن ول سۋ كيەلى اتانىپ، سوعان شومىلعان كىسى رۋح تازالىعى مەن ءتان تازالىعىنا قول جەتكىزەدى ەكەن.
ال ەندى ويلاڭىزدار، تازا سۋ ادام دەنەسىنىڭ كىرىن كەتىرۋى مۇمكىن، ءبىراق "كۇناسىز، پاك" قىلىپ شىعارادى دەگەندى ەشقانداي ساناعا سىيدىرۋ، كوڭىلگە قوندىرۋ مۇمكىن ەمەس.
اعايىندار، مۇسىلماندار، قۇلدىڭ قۇداي الدىنداعى پارىزى ول نارسە ەمەس. اللاعا جاققىڭىز كەلسە، كاليماعا ءتىل كەلتىرىڭىز، ماڭدايىڭىزدى ساجدەگە تيگىزىپ، زەكەت بەرىڭىز. ورازا ۇستاپ، قاجىلىق پارىزىن وتەڭىز. مۇسىلماننىڭ مىندەتى – وسى!
تىلەۋبەردى ساحابا
پىكىر قالدىرۋ