الماتىدا قازاقستاندىق مانەرلەپ سىرعاناۋشى دەنيس تەننىڭ ولىمىنە ايىپتى تانىلعان ءۇش كۇدىكتىگە سوت ۇكىمى شىقتى، دەپ حابارلايدى Qamshy.kz اقپارات اگەنتتىگى  Sputnik قازاقستان سايتىنىڭ دەرەگىن نەگىزگە الىپ. 

الماتى قالاسىنىڭ قىلمىستىق ىستەر بويىنشا مامانداندىرىلعان اۋدانارالىق سوتىندا ءتوراعالىق ەتۋشى سۋديا كەڭشىلىك ءابدىلدينوۆ نۇرالى قياسوۆتى 18 جىلعا، ارمان قۇدايبەرگەنوۆتى 18 جىلعا، ال اياعى اۋىر جانار تولىبايەۆانى 4 جىلعا باس بوستاندىعىنان ايىردى.

"نۇرالى قياسوۆ قازاقستان رەسپۋبليكاسىنىڭ قىلمىستىق كودەكسى 192-بابى 2ء-بولىمىنىڭ 2-تارماعى (قاراقشىلىق)، 99-بابى، 2ء-بولىمى 7،8-تارماقتارى (كىسى ءولتىرۋ) بويىنشا قىلمىس جاساعانى ءۇشىن ايىپتى دەپ تانىلسىن، 18 جىلعا باس بوستاندىعىنان ايىرىلىپ، قىلمىستىق-اتقارۋ جۇيەسىنىڭ جوعارى قاۋىپسىزدىك دەڭگەيىندەگى مەكەمەگە قاماۋعا الىنسىن.

ارمان قۇدايبەرگەنوۆ قازاقستان رەسپۋبليكاسىنىڭ قىلمىستىق كودەكسى 188-بابى 2ء-بولىمى 2-تارماعى (ۇرلىق)، 192-بابى 2ء-بولىمى 1،4-تارماقتارى(قاراقشىلىق)، 99-بابى 2ء-بولىمى 7-تارماعى (كىسى ءولتىرۋ) بويىنشا ايىپتى دەپ تانىلسىن جانە جازا رەتىندە 18 جىلعا باس بوستاندىعىنان ايىرىلىپ، قىلمىستىق-اتقارۋ جۇيەسىنىڭ جوعارى قاۋىپسىزدىك مەكەمەسىنە قاماۋعا الىنسىن.

جانار تولىبايەۆا قىلمىستىق كودەكستىڭ 434-بابى (قىلمىس تۋرالى حابارلاماۋ)، 188-بابى 2ء-بولىمى 1-تارماعى (ءبىر توپ اداممەن الدىن الا كەلىسىپ ۇرلىق جاساۋ) بويىنشا ايىپتى دەپ تانىلسىن جانە جازا رەتىندە 4 جىلعا باس بوستاندىعىنان ايىرىلىپ، قىلمىستىق-اتقارۋ جۇيەسىنىڭ ورتاشا قاۋىپسىزدىك مەكەمەسىنە قاماۋعا الىنسىن"، — دەپ سۋديا ۇكىمدى وقىدى.