كەشەلى –بەرى ۆەنەسۋەلادا وپپوزيسيا مەن پرەزيدەنت مودۋرونىڭ جاقتاستارى كوشەگە شىقتى. ۇلتتىق اسسامبلەيانىڭ باسشىسى حۋان گۋايدو وپپوزيسيانىڭ قولداۋىمەن ءوزىن پرەزيدەنت ەتىپ جاريالادى. ولار قازىرگى پرەزيدەنت مودۋروعا قىسىم كورسەتىپ جاتىر. ەل ءىشى ەكىگە ءبولىندى: ءبىرى مودۋرونى، ەكىنشىلەرى گۋايدونى جاقتايدى. قاقتىعىستان 23 ادام قازا تاپقان. ىشكى تارتىسقا سىرتقى كۇش تە اسەر ەتىپ جاتقانى انىق. تەك الاڭدايتىن ءبىر نارسە بار: كاراكاس كوشەلەرى قانعا بويالماسا، بولدى. حۋان گۋايدونى اقش، كانادا، برازيليا، ارگەنتينا، كولۋمبيا، پەرۋ، چيلي مەن ەكۆادور، سونىمەن قاتار ەۋرووداققا مۇشە ەلدەر تولىق قولداپ وتىر. ال مودۋروعا دەم بەرىپ وتىرعاندار–رەسەي، جۇڭگو جانە تۇركيا.

–يمپەراليستەردىڭ زۇلىمدىق وشاعى اقش ءبىزدىڭ ەلدى قۇلدىققا سالۋدى كوزدەپ وتىر. سوندىقتان ولاردىڭ ايتقانى بولمايدى، –دەپ مالىمدەمە جاساعان مودۋرو ولاردى 72 ساعاتتىڭ ىشىندە  ەلدەن كەتۋدى تالاپ ەتتى. ءبىراق اقش بيلىگى كەشە ولاردىڭ ءبىرقاتارىن قاۋىپسىزدىك ءۇشىن الىپ كەتەتىنىن ءمالىم ەتتى. ۇلتتىق اسسامبلەيانىڭ باسشىسى گۋايدونى جاقتاعان اق ءۇي ونى زاڭدى پرەزيدەنت رەتىندە تانىدى. ءتىپتى اقش-تىڭ مەملەكەتتىك حاتشىسى مايك پومپەو مودۋرونى «ەلدىڭ بۇرىنعى باسشىسى» دەپ تە اتاپ جىبەردى. سوعان قاراعاندا، اقش مودۋرونىڭ بيلىك باسىندا قالعانىن قالامايدى. بۇعان قاتىستى رەسەيدىڭ سىرتقى ىستەر مينيسترلىگى ءوز كوزقاراسىن ءبىلدىردى: «ۆەنەسۋەلاداعى جاعداي سىرتقى كۇشتەردىڭ ەل ىسىنە اشىق ارالاسىپ وتىرعانىن ايقىن كورسەتىپ وتىر. ولار ۆەنەسۋەلانىڭ تاۋەلسىزدىگى مەن دەربەستىگىنە قول سۇقتى، ەل پرەزيدەنتىن كۇشپەن قولمەن اۋىستىرۋعا ارەكەت جاسادى».

پرەزيدەنت مودۋرو بيلىكتىڭ قولدان سۋسىپ بارا جاتقانىن سەزسە كەرەك، رەسەيدەن اسكەري كومەك سۇرادى. ەگەر بۇل ىسكە رەسمي ماسكەۋ ارالاساتىن بولسا، وندا حالىقارالىق جاعداي ءتىپتى ۋشىعادى. سوندىقتان ازىرگە ءپۋتيننىڭ ەلى ءالىپتىڭ ارتىن باعىپ وتىر. ونىڭ دا سەبەبى بار. جالپى ۆەنەسۋەلا مايدانىنا رەسەيدىڭ قاتىسقانى ءتيىمدى مە؟

ءقازىردىڭ وزىندە ورىس ساراپشىلارى ءوز بولجامىن ايتىپ جاتىر. بۇدان شىعاتىن قورىتىندى: رەسەي كاراكاس مايدانىنا ارالاسپاۋى ءتيىس. ءبىراق بارىنشا مودۋرونى بيلىكتە قالدىرۋعا تىرىسادى. بۇل مۇمكىن نارسە مە؟ ونسىز دا رەسەي سيرياداعى سوعىسقا قىرۋار قارجىسىن جۇمسادى. سوندىقتان ەندى «ۆەنەسۋەلادا ىسىنە» اسكەري كۇشپەن ارالاسۋعا مۇمكىندىگى دە جوق، اسكەري قۋاتى دا جەتىسپەيدى. بۇل جەردە اقش كۇشتى. اق ءۇي جالعىز ەمەس. ونىڭ جانىندا قولدايتىن 20-عا جۋىق وداقتاستارى بار.

ونىڭ ۇستىنە ۆەنەسۋەلادا جاعداي قيىن. حالقى كەدەي، تۇرمىس اۋىر. وتكەن جىلى 70 مىڭنان استام ۆەنەسۋەلا حالقى برايزيليانىڭ رورايما شتاتىنا زاڭسىز كوشتى. سوندىقتان كورشىلەس ەلدەردىڭ بارلىعى دا مودۋرونىڭ پرەزيدەنتتىك بيلىكتەن كەتكەنىن قالايدى. پەرۋ مەن كولۋمبيا دا جاڭا پرەزيدەنتتى جاقتايتىنىن ءمالىم ەتتى. دەمەك، مودۋرونىڭ بيلىگىنەن ءمان كەتتى. ەل حالقى ەكىگە ءبولىندى. اقش پرەزيدەنتى دونالد ترامپ ەگەر قانداي دا ءبىر ەل مودۋروعا  اسكەري جاعىنان قولداۋ كورسەتەتىن بولسا، اقش قاراپ قالمايتىنىن ەسكەرتتى. ءبىراق ماسەلە اسكەري كۇشپەن شەشىلمەۋى ءتيىس. ازىرگە جاعدايدىڭ قالاي ءوربيتىنىن ايتۋ قيىن. مودۋرو قىسىمنان سالدارىنان پرەزيدەنتتىكتەن كەتەدى نەمەسە ەلدە ازامات سوعىسى باستالۋى مۇمكىن. قالاي ايتقاندا دا، لاتىن امەريكاسىنداعى رەسەيشىل ەل قيىن جاعدايدا قالدى. ازىرگە ارميا مودۋرونىڭ جاعىندا، ەگەر ولار پرەزيدەنتىن  قورعاۋدان باس تارتسا، وندا ءبىتتى.

نەگىزى، بۇل ىشكى ساياسي تەكەتىرەس قانا ەمەس، الپاۋىت ەل مۇددەلەرىنىڭ قاقتىعىسى بولىپ وتىرعانىن دا اشىق مويىنداۋىمىز كەرەك.