كاراكاستا ءالى تولقۋ جالعاسىپ جاتىر. شيەلەنىسكەن جاعدايدىڭ قالاي اياقتالارىن ءالى ەشكىم بىلمەيدى. ءبىر ەلدە  – ەكى پرەزيدەنت.

وپپوزيسيا وكىلى، ۇلتتىق اسسامبلەيانىڭ باسشىسى گۋايدونى اقش، ارگەنتينا، پاراگۆاي، كولۋمبيا، برازيليا، كانادا، پەرۋ، چيلي، ەكۆادور، كوستا-ريكا،  گرۋزيا جانە ءبىرقاتار ەۋروپا ەلدەرى مويىندادى. 
ال  ۋرۋگۆاي، بوليۆيا، مەكسيكا، جۇڭگو، تۇركيا، يران، سالۆادور، كۋبا جانە رەسەي بۇرىنعى سايلانعان باسشى نيكولاس مودۋرونى پرەزيدەنت رەتىندە تانىپ وتىر.

كەشە اقش اشىق قولداپ وتىرعان كانديدات گۋايدو «ۆاشينتونعا جاسىرىن بارىپ قايتتى» دەگەن اقپارات شىقتى.

نيكولاس مودۋرو ءوزىن ەكىنشى پرەزيدەنت رەتىندە جاريالاعان گۋايدونى جەكە كەزدەسۋگە شاقىردى.  ءبىراق ول كەزدەسۋگە  بارا قويادى دەۋ قيىن.

انگليانىڭ ءبىرقاتار بانكى ەلدە ساقتالعان مودۋرونىڭ 1،2 ميلليون دوللار التىن قۇيمالارىن بەرۋدەن باس تارتتى. ەندى دۇنيە جۇزىندە باسقا مەملەكەتتەردە تىعىلعان مودۋرونىڭ بايلىعى بۇعاتتالاتىن شىعار.

ءبىراق جۋرناليستەردىڭ الدىندا باسپا ءسوز ءماسليحاتىن وتكىزگەن مودۋرو كونستيتۋسيانىڭ ءار باپتارىنا توقتالىپ، ءوزىن ەلدىڭ پرەزيدەنتى ەكەنىن تاعى شەگەلەپ ايتتى.

ازىرگە ارميا مەن پوليسيا – نيكولاس مودۋرونىڭ جاعىندا.

كەشە Reuters اقپارات اگەنتتىگى رەسەي «الەمنىڭ «ىستىق نۇكتەلەرىندە» جۇرگەن ورىستىڭ 400 جالدامالى جەندەتىن  مودۋرونى قورعاۋ ءۇشىن ۆەنەسۋەلاعا جىبەردى» دەگەن اقپارات تاراتتى. الايدا رەسەي پرەزيدەنتىنىڭ باسپا ءسوز حاتشىسى دميتريي پەسكوۆ مۇنى جوققا شىعاردى. ءبىراق ءبىرقاتار باتىس ءباسپاسوزى بۇل اقپاراتتى راستاپ وتىر. ال انىعىنا كەلگەندە، وسىدان تورت-بەس كۇن بۇرىن نيكولاس مودۋرونىڭ پۋتينگە تەلەفون شالىپ، اسكەري كومەك سۇراعانى راس.

رەسەي ءباسپاسوزىنىڭ باسىم بولىگى ۆەنەسۋەلانى جاقتاپ، ماقالا جازۋدا. بۇل دا تۇسىنىكتى جاعداي. وسى ۋاقىتقا دەيىن ورىستار بۇرىنعى پرەزيدەنت ۋگو چاۆەس پەن مودۋرو جۇيەسىن ساقتاپ قالۋ ءۇشىن ۆەنەسۋەلا ەكونوميكاسىنا 17 ميلليارد دوللار قۇيدى دەگەن دەرەك بار. رەسەيدىڭ جانى شىعىپ جاتقانىنىڭ دا سىرى وسى.

ال  اقش قولداپ وتىرعان حۋان گۋايدو كىم؟ ول قاراپايىم وتباسىنان شىققان 35 جاستاعى ازامات. ستۋدەنت كەزىنەن بەلسەندى بولعان.اكەسى - ۇشقىش، اناسى - ءمۇعالىم. تۇرمىستىڭ اۋىرلىعىنان ول ۋنيۆەرسيتەتكە كەش تۇسەدى. بۇرىنعى پرەزيدەنت ۋگو چاۆەسكە قارسىلىق رەتىندە ستۋدەنتتەر قوزعالىسىن قۇرعان. 2009 جىلى  «حالىق ەركى» پارتياسىنىڭ كوسەمى  لەوپولد لوپەستى ۋگو چاۆەس بيلىگى 13 جىلعا سوتتاپ جىبەرگەننەن كەيىن ول پارتيانىڭ باسشىسى بولىپ سايلانادى.  ۆەنەسۋەلانىڭ ۇلتتىق اسسامبلەياسىن جىل سايىن ءبىر پارتيا كەزەكتەسىپ باسقارىپ وتىرادى. بيىلدان باستاپ، اسسامبلەيانى باسقارۋ «حالىق ەركىنىڭ» باسشىسى حۋان گۋايدونىڭ ەنشىسىنە تيگەن. ونىڭ باعىنا حالىق تولقۋى ۇلاسىپ، ەندى ءوزىن ول ەلدەگى ەكىنشى پرەزيدەنت ەتىپ جاريالادى.

...ال الەم كاراكاسقا كوز تىگىپ وتىر.