الماتى وبلىسىندا ازاماتتىق نەكەدەگى كۇيەۋى ايەلىن بىرنەشە جەردەن پىشاقتاپ، ايۋاندىقپەن ءولتىرىپ تاستادى. تەرگەۋ مالىمەتىنشە، ەرلى-زايىپتىلار اراسىنداعى كيكىلجىڭ داستارحاننىڭ ۇستىندە باستالعان. اراققا سىلقيا تويىپ العان ولار سوزگە كەلىپ قالىپ، ارالارىندا داۋ-داماي تۋىنداعان. سول ساتتە اشۋعا بۋلىققان ەر ادام كەلىنشەگىنە پىشاق الا جۇگىرىپتى. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ حابارلايدى.

«مەن ونى قۋىپ جەتىپ، ىشىنەن ۇرۋدى ويلادىم. ءبىراق قولىمدا پىشاق بولعان ەكەن. سول پىشاقپەن بىرنەشە رەت ىشىنەن ۇرىپپىن، شامامەن قانشا رەت ۇرعانىم ەسىمدە جوق» - دەيدى كۇدىكتى. 

قايعىلى وقيعا قاراساي اۋدانىنا قاراستى جاڭاتۇرمىس اۋىلىندا بولعان. ەلدى- مەكەندەگى جەر ۇيلەردىڭ بىرىنەن كوپتەگەن پىشاق جاراقاتىن العان 37 جاستاعى باسپانا يەسىنىڭ جانسىز دەنەسى تابىلعان. قاسكۇنەم ونىڭ بەتىن دە اياۋسىز تىلگىلەپ تاستاعان. وبلىستىق پوليسيا دەپارتامەنتىنىڭ مالىمەتىنشە، 45 جاستاعى ەر ادام ول ايەلمەن زاڭدى نەكەدە بولماعان، الايدا بىرنەشە جىلدا بەرى بىرگە تۇرىپ كەلىپتى. قازىرگى تاڭدا ول ۋاقىتشا ۇستاۋ يزولياتورىنا قامالدى.

«قازاقستان رەسپۋبليكاسى قىلمىستىق كودەكسىنىڭ 99- بابىنا سايكەس، ادام ءولتىرۋ دەرەگى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. وقيعا ورنىنان تابىلعان قىلمىس قۇرالى بولۋى مۇمكىن دەگەن اس ءۇي پىشاعى تاركىلەندى. تاركىلەنگەن پىشاق قازىرگى تاڭدا ءىس ماتەريالدارىنا ايعاق زات رەتىندە تىركەلدى» - دەيدى وبلىستىق پوليسيا دەپارتامەنتى باسپا ءسوز قىزمەتىنىڭ رەسمي وكىلى ايگەرىم كوپبايەۆا.  

ۇسىنعان: نازەركە لابيحان