ەل استاناسى كاراكاستا ساياسي تەكەتىرەس ءورشىپ تۇر. تولاس تاپقان جوق. ءبىر ەلدە – ەكى پرەزيدەنت. ءبىرى نيكولاس – مادۋرو، ەكىنشىسى – حۋان گۋايدو. ءقازىر ەكەۋى دە ەلدە بىلگەنىن ىستەپ جاتىر. گۋايدونى اقش پەن ونىڭ وننان استام وداقتاستارى قولدايدى جانە ولار ىقپالىن اشىق كورسەتىپ وتىر. ال مادۋرونىڭ جاعىندا رەسەي، جۇڭگو باستاعان  بەس-التى مەملەكەت بار. ازىرگە تەكەتىرەس ءورشىپ تۇر.

اقش بيلىگى ۆەنەسۋەلانىڭ PDVSA مۇناي كومپانياسىنىڭ اكتيۆىندەگى 7 ميلليارد دوللارىن بۇعاتتاۋ تۋرالى شەشىم قابىلدادى جانە اتالعان كومپانيامەن كەلىسىمشارت جاساۋعا تىيىم سالدى. وعان جاۋاپ رەتىندە ۆەنەسۋەلا پروكۋراتۋراسى اقش قولداپ وتىرعان كانديدات گۋايدونىڭ جولىن كەستى. ەندى ۇلتتىق اسسامبلەيانىڭ باسشىسى گۋايدو ەلدەن ەشقايدا شىعا المايدى. ال انگليا بيلىگى مادۋرونىڭ يەلىگىندەگى التىنداردى بۇعاتتادى. ءسويتىپ، قازىرگى ۋاقىتتا مادۋرو مەن گۋايدونىڭ اراسىندا قاراما قايشى تەكەتىرەس ءجۇرىپ جاتىر. ءبىراق بۇل قانشا ۋاقىتقا دەيىن سوزىلادى؟ ءبىر ايعا، جوق الدە ءبىر اپتاعا ما؟ بۇعان قاتىستى ساراپشىلار نە دەيدى؟ ەگەر بۇل جولى نيكولاس مادۋرو پرەزيدەنت رەتىندە ءوز ورنىن ساقتاپ قالسا، وندا مۇنى رەسەيدىڭ جەڭىسى دەپ بولجام جاساۋعا بولار. ويتكەنى ۆەنەسۋەلا ەكونوميكاسىنا  رەسمي ماسكەۋ 17 ميلليارد دوللار اقشا سالعان. بۇل ەلدە سونداي-اق قىتايدىڭ دا مۇددەسى بار. ويتكەنى قىتايعا مۇناي كەرەك.  اقش-تىڭ دا كوزدەپ وتىرعانى – قارا التىن.

امەريكالىق مەملەكەتتەر ۇيىمىنىڭ جاڭا وكىلى گۋستاۆا تاررە «جۇڭگو ءبىزدىڭ ەلدە بيزنەسىن جۇرگىزىپ جاتسا، ال رەسەيدىڭ گەوساياسي امبيسياسى بار. سوندىقتان مادۋرونى بارىنشا ساقتاپ قالۋعا تىرىسادى» دەپ مالىمدەدى.  انىعىنا كەلگەندە،  ۆەنەسۋەلاداعى داعدارىستىڭ باستالعانىنا 9 كۇن بولدى. ءبىراق باستى اڭگىمە مادۋرونىڭ قانشالىقتى ورنىن ساقتاپ تۇرا الاتىندىعىندا. رەسەي عىلىم اكادەمياسىنىڭ لاتىن امەريكا ينستيتۋتى ديرەكتورىنىڭ مىندەتىن اتقارۋشى دميتريي رازۋموۆسكيي «مادۋرو ۇزاق ۋاقىت ورنىن ساقتاپ قالا الادى» دەگەنگە سەنبەيدى.

–قىسقا مەرزىم ۋاقىت ارالىعىندا ول پرەزيدەنت رەتىندە جۇمىسىن جالعاستىرا بەرەدى. ءبىراق ۇزاق ۋاقىت بيلىكتە بولادى دەۋ سەنىمسىز. ءقازىر ول ءوزىن سەنىمدى سەزىنىپ وتىر، ويتكەنى ەلەكتوراتتىڭ جارتىسى ونى قولداپ وتىر. ەكىنشىدەن، ەلدىڭ قارۋلى كۇشتەرى ءالى نيكولاس مادۋرونىڭ جاعىندا،–دەيدى رەسەيلىك ساراپشى.

ءبىراق دميتريي رازۋموۆسكيي «ەڭ ارى كەتكەندە مادۋرو التى اي عانا بيلىكتە شىدايدى» دەگەن پىكىردە. ارى قاراي مادۋرونىڭ ساياساتىن جالعاستىرۋشى ادام بيلىككە كەلۋى مۇمكىن. ءبىراق بۇل بولجامنىڭ جۇزەگە اسۋى قيىنداۋ. بۇگىنگى كۇنى اقش قولداپ وتىرعان حۋان گۋايدونىڭ  ساياسي امبيسياسى جوعارى تۇر...