وتكەن جىلدىڭ 29 جەلتوقسانىندا الماتىدا ورىن العان جانتۇرشىگەرلىك جول اپاتى جايىندا بارشا حالىق بىلەدى. ءۇش ادامنىڭ ءومىرىن جالماپ، تاعى بىرەۋىن اۋرۋحانا كەرەۋەتىنە تاڭىپ قويعان بۇل قازالى وقيعاعا كىنالى دەپ تانىلعان دۇنگەن ازاماتى يلياس كار وقيعا ورنىنان قاشىپ كەتىپ، ەرتەسىنە قولعا تۇسكەن بەلگىلى. ءبىر ايدان اسا جۇرگىزىلگەن تەرگەۋ ناتيجەسىندە ونىڭ ءىسى سوتقا جونەلتىلدى. دەگەنمەن سوت وتىرىسى قاشان بولاتىنى ءالى بەلگىسىز. بۇل ءىس ق ر ىشكى ىستەر مينيسترلىگىنىڭ ءجىتى باقىلاۋىنا الىنعان. قىلمىسكەر ۇستالدى، ءىسى سوتقا كەتتى. دەسە دە، قايعىلى وقيعادا قازا تاپقان جانداردىڭ تۋىستارى تەرگەۋ ءىسىنىڭ كەيبىر تۇستارىنا كەلىسپەي، شاعىمدارىن جەتكىزىپ وتىر.

قاڭتار ايىندا Qamshy.kz رەداكسياسىنا حابارلاسقان مارقۇم دينارا حاميتوۆانىڭ ءىنىسى ازامات حاميتوۆ ساراپتاما قورىتىندىسىنىڭ سونشالىقتى ۇزاق ۋاقىت جۇرگىزىلگەنىنە كۇمانمەن قاراپ، كۇدىكتىنىڭ قانىنىڭ قۇرامىندا الكوگولدىڭ تابىلماعانىن ايتىپ شاعىمدانعان بولاتىن. ال الماتى قالالىق ىشكى ىستەر دەپارتامەنتىنىڭ باسپا ءسوز حاتشىسى سالتانات ازىربەكوۆا بۇل اقپاراتتىڭ شىندىققا ساي كەلمەيتىنىن جانە ونىڭ ماس كۇيىندە كولىك ايداعانى راستالعانىن ايتقان.

ال بۇگىندە مارقۇم حاميتوۆانىڭ بولەسى اسەل ەسىمجان قىزى ءوزىنىڭ جەلىدەگى پاراقشاسىندا ساراپتاما قورىتىندىسى مەن تەرگەۋ جۇمىسىنا قاتىستى ولقىلىقتاردى ايتىپ، ساراپتاما ناتيجەسى كورسەتىلگەن قۇجاتتا «كىنالى جۇرگىزۋشىنىڭ قانىنىڭ قۇرامىندا الكوگولدى زات بولمادى» دەگەن جەرىن ناقتى كورسەتىپ دابىل قاعۋدا.

«الماتى قالاسىندا بولعان قازالى وقيعاعا كىنالى كىم ەكەندىگىن ءدۇيىم جۇرت بىلەدى. بريفينگتە پوليسيا قىزمەتكەرلەرى ءۇش ادام قازا تاپقان بۇل جول اپاتىنىڭ ءىىم-نىڭ جەكە باقىلاۋىنا الىنعانىن ايتقان بولاتىن. ءيا، قىلمىسكەر كوپ ۇزاماي قولعا ءتۇستى. ءبىراق، ءبىر تۇسىنبەيتىنىم – ساراپتاما ناتيجەسىندە ونىڭ قانىنىڭ قۇرامىندا الكوگولدى زاتتىڭ بولماۋى. دەمەك ساراپتاما قورىتىندىسى Gelendwagen جۇرگىزۋشىسىنىڭ ماس كۇيىندە كولىك باسقارعانىن جوققا شىعارىپ وتىر ما؟

بۇگىندە كار يلياستىڭ ءىسى سوتقا جىبەرىلدى، ءبىراق مارقۇم بولعان جانداردىڭ تۋىستارىنا بەرىلگەن قۇجاتتاردا كەيبىر فاكتىلەر وسى ۋاقىتقا دەيىن جاريالانعان اقپاراتتارعا سايكەس كەلمەيدى.

بىرىنشىدەن، جوعارىدا ايتىپ وتكەنىمدەي، ساراپتاما قورىتىندىسى جۇرگىزۋشىنىڭ قانىنىڭ قۇرامىنان الكوگولدى زاتتىڭ بولماعانىن كورسەتىپ وتىر.

سونداي-اق، كىنالى ازامات 30 جەلتوقسان كۇنى ۇستالىپ، ساراپتاما جاساۋعا ءدال سول كۇنى قان الىنعان بولاتىن. ءبىراق ساراپتاماعا 2019 جىلدىڭ 4 قاڭتارىندا جىبەرىلگەن. ال ناتيجەسى 11 قاڭتاردا بەلگىلى بولدى. دەمەك، ونىڭ قانىنىڭ قۇرامىن زەرتتەۋ ءۇشىن 10 كۇننەن اسا ۋاقىت كەتكەن.

ەكىنشىدەن، ناركولوگيالىق ساراپتامانى دەرەۋ جاساۋ ءۇشىن العاشىندا الىنعان قان جەتكىلىكسىز بولىپتى. سوندا تەرگەۋشىلەر مۇنداي ىسپەن ءبىرىنشى رەت اينالىسىپ وتىر ما؟ تاجىريبەلى تەرگەۋشى ءوزىنىڭ جۇمىسىن ۇمىتىپ قالىپ، قاندى از الىپ قويعان با؟ الدە، مۇنىڭ ءبارى تەك رەسميلىك ءۇشىن بە؟

تەرگەۋ ىسىندە بۇل وقيعاعا قاتىستى ولقى تۇستار وتە كوپ. دەگەنمەن، ەڭ باستى نازار اۋدارارلىق ماسەلە – اپاتتى وقيعاعا كىنالى تاراپ بارىنشا جاۋاپكەرشىلىكتەن جالتارۋدىڭ جولىن قاراستىرۋدا»، - دەپ جازادى مارقۇمنىڭ تۋىسى.

ەستەرىڭىزگە سالا كەتسەك، ب ا ق بەتتەرىندە جاريالانعان اقپاراتتاردا كار يلياستىڭ اپات بولعان كۇنى Grand Opera كلۋبىنان شىعىپ، ماس كۇيىندە كولىك ايداعانى ايتىلعان بولاتىن. "جەل تۇرماسا، ءشوپتىڭ باسى قيمىلدامايدى" دەگەن تاعى بار... مارقۇم جانداردىڭ تۋىستارى بەكەردەن-بەكەر دابىل قاعىپ جاتپاسا كەرەك.

ايتا كەتەيىك، قايعىلى وقيعادا امان قالعان اكتريسا ايزادا ساتىبالدييەۆا جاقىن كۇندەرى اۋرۋحانادان شىعىپ، ۇيىنە ورالادى.