بيىل ەلىمىزدە 200 جىلدىعى تويلانىپ جاتقان كۇي اتاسى – قۇرمانعازىنىڭ ءومىرىن ايتپاعاندا، ءولىمىنىڭ ءوزى دە قۇپيا سىرعا تولى.  سونىڭ ءبىرى  – قۇرمانعازىنىڭ  مۇردەسىن قازۋعا بايلانىستى. 1967 جىلى اتاقتى گەراسيموۆتىڭ شاكىرتى، انتروپولوگ نوەل شاياحمەتوۆ قۇرمانعازىنىڭ ءقابىرىن اشىپ، ەل اۋزىندا ايتىلىپ جۇرگەن اڭىزعا ساي، الدىمەن يەسىمەن بىرگە كومىلگەن اتىنىڭ باسىن جانە قۇران كىتابىن تابادى. شىنىندا دا، كۇيشىنىڭ قولدارى ەكى تىزەسىنە جەتەتىندەي ۇزىن بولىپتى  جانە جون ارقاسىندا جالى بار ەكەن. ەل ىشىندە «جالدى قۇرمانعازى» اتالۋى وسىلايشا راسقا شىققان. كۇيشى ەسىر ايشۋاق ۇلى «جالدى قارا» كۇيىن وسى قۇرمانعازىعا ارناعان. ال قۇرمانعازىنىڭ قازىرگى بىزگە تانىس پورترەتى كۇيشىنىڭ باس سۇيەگىنە قاراپ سالىنعان. ۇلى كۇيشىنىڭ دەنە سۇيەكتەرى الماتىعا زەرتتەلۋ ءۇشىن اكەتىلىپ، شەبەرحانا مەن مۇراجايدا ءبىراز جىلدار جاتىپ قالادى. وتكەن عاسىردىڭ سەكسەنىنشى جىلدارىندا عانا قايتا جەرلەۋ ءۇشىن كۇيشى سۇيەگى اتىراۋدان استراحاننىڭ التىنجارىنا قاراي اپارىلادى. كۇزدىڭ جاۋىن-شاشىنى كەدەرگى بولىپ، سۇيەكشىلەر جولدا ايالداپ، كۇيشى دەنەسىن اۋداندىق ميليسيانىڭ ارناۋلى كامەراسىنا تاپسىرادى. وزدەرى ءبىر ۇيگە قوناققا كەتەدى. ءبىر ۋاقىتتا كامەرانىڭ قوڭىراۋى ەش سەبەپسىز قوسىلىپ كەتىپ، بەزىلدەپ قويماي جاتقانى جايىندا جايسىز حابار تۇسەدى. شوشىنعان جۇرت اس تا توك جايىلعان داستارقاندى تاستاي ساپ، ميليسيا ۇيىنە شاۋىپ كەلسە، بەزىلدەگەن قوڭىراۋ ءۇنى باسىلماپتى. امالسىز مۇردە جاتقان وڭاشا بولمەنى اشتىرادى. ەشكىم تيمەگەن، قۇلىپ تا، كىلت تە ورنىندا. كامەرا قايتا جابىلىپ، ەسىك قايىرا قۇلىپتالىنادى. بىرەر ساعاتتان كەيىن قوناقتا وتىرعاندارعا دابىل قاققىشتىڭ قايتا قوسىلىپ كەتكەنى جايىندا حابار تۇسەدى. جۇرت جىلى ورنى مەن ەندى ىشكەلى وتىرعان اششى سۋلارىن  تاستاي ساپ، قايتا شاۋىپ بارسا، كەزەكشى ميليسيونەردىڭ ەكى كوزى اتىزداي بولىپ كەتىپتى. دابىل قاققىش بەزىلدەۋىن قويار ەمەس. مۇردە جاتقان ەسىكتى اشسا، قوڭىراۋ ءۇنى ساپ تىيىلادى. «بۇل تەگىن ەمەس، «تەزدەتىپ ماڭگىلىك مەكەنىمە جەتكىزىڭدەر» دەپ ارۋاقتىڭ مازاسىزدانىپ جاتقانى عوي» دەگەن شەشىمگە كەلگەن جۇرت ميليسيا بولىمشەسىندە تاڭ اتقانشا كوزدەرىن ىلمەي، كۇيشى سۇيەگىن كۇزەتىپ شىعادى.  سودان سۇيەكشىلەر ارۋاقتى ادامنىڭ  دەنەسىن رەسەيدىڭ استراحان وبلىسىنداعى التىنجارداعى قابىرىنە امان-ەسەن قويعاننان كەيىن عانا دەمدەرىن ءبىر-اق باسىپتى.  ۇلى كۇيشى ءوزىنىڭ  ارۋاقتى ادام ەكەنىن وسىلاي اڭعارتسا كەرەك.