قاشان دا ءوزىنىڭ ءبىرجاقتى پىكىرلەرىمەن جۇرتشىلىققا تانىس لدپر كوسەمى ۆلاديمير جيرينوۆسكيي مەملەكەتتىك دۋمادا سويلەگەن سوزىندە تمد اۋماعىنداعى كەيبىر ەلدەردى رەسەي قۇرامىنا كىرۋگە شاقىردى. ول ءۇشىن الدىمەن كونستيتۋسيانى وزگەرتۋ كەرەك، سوسىن ولاردى قوسىپ الۋ قاجەت.

«ورىس الەمىن كەڭەيتۋ كەرەك» دەگەن جيرينوۆسكيي مۇنداي تاجىريبەنىڭ ومىردە بار ەكەنىن ايتتى. زاڭدىق تۇرعىدان كەلگەندە، 2014 جىلى قىرىم رەسپۋبليكاسىنىڭ حالقى تاڭداۋ جاساپ، رەسەيگە قوسىلاتىنىن ءمالىم ەتكەن. ءبىراق انىعىنا كەلگەندە، رەسەي قىرىمدى اننەكسيالادى ەمەس پە؟ ءبىراق وعان قاراپ وتىرعان لدپر كوسەمى جوق.

بۇل جەردە ۆلاديمير جيرينوۆسكيي نەنى مەڭزەپ وتىر؟ ناقتى ايتساق، گرۋزياداعى وڭتۇستىك وسەتيا مەن ابحازيا، ۋكرايناداعى دونەسك مەن لۋگانسك، مولدوۆاداعى پريدنەستروۆە مەن بەلورۋسسيانىڭ باتىس ايماعىندا ءقازىر رەسەيدىڭ ىقپالى كۇشتى. ءبىراق مۇنىڭ بارلىعى دا ورىستاردىڭ قولىمەن «وت كوسەپ»، «ىستىق نۇكتەگە» اينالعان  ايماقتار ەكەنىن ۇمىتپاعانىمىز ءجون. رەسەيدىڭ زاڭ شىعاراتىن مەملەكەتتىك دۋماسىنىڭ مىنبەرىنەن ءسوز سويلەگەن جيرينوۆسكيي كونستيتۋسياعا وزگەرىستەر ەنگىزە وتىرىپ، اتالعان ايماقتاردى ءبىرجولاتا رەسەيگە قوسىپ الۋ كەرەك دەپ وتىر. ورىس الەمىنىڭ كوكجيەگىن وزگەرتىپ، گەرگرافيالىق كارتاسىنىڭ اۋماعىن كەڭەيتكىسى كەلىپ وتىرعانى دا سودان.

–ءبىز قالاي ايتقاندا دا، رەسەيدىڭ كونستيتۋسياسىن وزگەرتۋىمىز كەرەك. الەم تاريحىندا مۇنداي وقيعا بولعان. 1990 جىلى گەرمانيا فەدەراتيۆتىك رەسپۋبليكاسى (فرگ) وزدەرىنىڭ كونستيتۋسياسىن وزگەرتە وتىرىپ، گدر –دى قۇرامىنا قوسىپ الدى. دەمەك، بىزگە دە مۇمكىندىك بار، –دەدى ۆلاديمير جيرينوۆسكيي.

قاشان دا ورىس ءشوۆينيزمىن تۋ ەتىپ كوتەرىپ جۇرگەن جىندىنىڭ بۇل ساندىراعى جۇرتقا جاعا قويماس. ءبىراق ورىس بيلىگىنە سوناۋ 1991 جىلدان بەرى مەملەكەتتىك دۋمادا ماڭگىلىك دەپۋتات بولىپ كەلە جاتقان جيرينوۆسكييدىڭ ايتقاندارى ۇنەمى جاعادى...ويتكەنى يمپەريالىق پيعىلى جامان ورىسقا جيرينوۆسكييلەر ءار ۋاقىتتا كەرەك.