ەڭبەك جانە حالىقتى الەۋمەتتىك قورعاۋ ءمينيسترى مادينا ءابىلقاسىموۆا بلوگەر دەنيس كريۆوشەيەۆتىڭ سۇراعىنا جاۋاپ بەردى، دەپ جازادى Qamshy.kz اقپارات اگەنتتىگى.

بلوگەر كريۆوشەيەۆ مينيستردەن تىرىدەي ورتكە ورانىپ قازا تاپقان 5 بالاعا قاتىستى ساۋال قويعان. ال مينيستر ءوز كەزەگىندە بلوگەرگە بىلاي دەپ جاۋاپ بەرىپتى:

«بۇل قايعىلى وقيعا تەك ءبىر عانا وتباسىنىڭ ەمەس، بارشا حالىقتىڭ قابىرعاسىن قايىستىرىپ، جۇرەگىنە جارا سالدى. بارلىق تۋىستارى مەن اتا-اناسىنا قايعىرا كوڭىل ايتامىن. مەن دە انامىن، قانداي قيىن ەكەنىن بىلەمىن، بۇل – ورنى تولماس قازا. جاراتقان وتباسىنا جار بولسىن.

وسىعان بايلانىستى ءبىزدىڭ مينيسترلىك الداعى ۋاقىتتا قوسىمشا الەۋمەتتىك كومەك پەن تۇرعىن ۇيگە قاتىستى كومەگىن ۇسىنادى. الەۋمەتتىك جاعدايى تومەن بارلىق وتباسىعا ءتيىستى كومەك كورسەتىلەتىن بولادى».

كەشە ۇكىمەتتىڭ سەلەكتورلىق جينالىسىندا ۆيسە-مينيستر سۆەتلانا جاقىپوۆا ءوز سوزىندە "مينيستر ءابىلقاسىموۆانىڭ قايعىلى جاعدايعا دۋشار بولعان اتا-اناعا بارىپ كوڭىل ايتتى" دەگەن بولاتىن. بەلگىلى بولعانىنداي، اتالمىش مينيسترلىك بۇل وتباسىعا ماتەريالدىق جانە مورالدىق تۇرعىدا كومەك كورسەتىپتى. قازىرگى ۋاقىتتا ەڭبەك جانە حالىقتى الەۋمەتتىك قورعاۋ مينيسترلىگى ەلىمىزدەگى بارلىق كوپبالالى جانە جاعدايى تومەن وتباسىلارعا الەۋمەتتىك كومەك كورسەتۋ ماسەلەسىن قاراسىتىرۋدا.

ۇسىنعان: نازەركە لابيحان