ءبارى دە،وتان، سەن ءۇشىن! 
ماۋەلەپ تۇرعان جەمىسىم،
ەسەلەپ جاتقان جەڭىسىم-
ءبارى دە وتان، سەن ءۇشىن! 

بىرەۋگە بەرسەڭ جەڭ-ۇشىن، 
بەرەمىن مەن دە جەڭ-ۇشىن. 
بەرمەسەڭ ءوزىڭ كەلىسىم، 
بەرمەيمىن مەن دە كەلىسىم!

كىندىگىم ماڭگى بايلانعان، 
كيەلى مەنىڭ ءورىسىم! 
قيلى ءبىر قيىن شاقتا دا، 
وزىڭدەي جانىم -اققالا. 

الا ءجىبىن ەشكىمنىڭ ، 
باسا كوكتەپ، اتتامان. 
دوسىما كوزىمدى الارتىپ، 
جۇدىرىق تۇيمەن جاتقا دا.
الدىڭدا اق قوي، اق بالاڭ... 
اق بالاڭ،وتان! 
اق بولام!!! -دەپ ۇلى اقىن، وتانىن ءومىر بويى جىرلىپ وتكەن ەدى.

مۇقاڭ، مۇقاعالي! قازاقتىڭ ءدۇلدىل اقىنى! 88 دەگەن شىڭنىڭ باسىندا حان تاڭىرىنە قاراپ كوز جەتپەيتىن بيىكتەن مەنمۇندالاپ تۇر. "ەكى سەگىز" شەكسىزدىكتىڭ ەگىزىندەي بولسا كەرەك. ارينە،تۋعان جەرى قاراسازدا ەلى ەسكە الىپ، ۇلى اقىنعا لايىقتى قۇرمەت جاساپ "تۋعان كۇنى" ناعيمان انامىزبەن ماقاتاي اتامىزعا دا قۇران باعىشتاپ جاتقان بولار. اۋا-رايى دا استاناداعىداي ەمەس، كۇننىڭ شۋاعى مولايىپ حالىقتىڭ مەيىرىمىنە ۇلاسقان شىعار. بىزدە دە استانادا كەشەگىدەي قاتاڭ سۋىق سىنعانداي،ايازدىڭ بەتى باسقا جاققا بەتتەگەندەي... 

استانادا دا اقىن جانىن تۇسىنەتىن جان بولسا ەگەر... ولار استانا سۋرەتشىلەر وداعى قازمەديا ورتالىعىمەن بىرلەسىپ مۇقاعاليدىڭ تۋعان كۇنىنە ارناپ كورمە ۇيىمداستىردى. تانىمال سۋرەتشى، گرافيك، كەسكىندەمەشى قازاقستان رەسپۋبليكاسىنىڭ "ەرەن ەڭبەگى ءۇشىن" مەدالىنىڭ يەگەرى الماس بولاتحان ۇلى سىرعابايەۆتىڭ شىعارمالارى كوپشىلىككە بۇرىننان تانىمال. بۇل جولى الماس مۇقاعالي جىرلارىنا ارنالعان كوركەم تۋىندىلارىن كورمەگە قويدى. سۋرەتشى جانىن تۇسىنەتىن مۇقاڭ ءتىرى بولسا، "الماسجان ساعان ارنادىم" دەپ جىر جولدارىنان شاشۋ شاشار ەدى-اۋ. الماستىڭ بۇل شىعارمالارى كەلەشەك ۇرپاققا، ءتىپتى مىڭداعان جىلدارعا وشپەيتىن ەسكەرتكىش ەكەنىن بىرەۋ بىلسە، بىرەۋ بىلمەس. مەنىڭ ايتارىم: "الماس، سەن ماڭگىلىككە مۇقاعالي ماقاتايەۆتى تاعى دا ءبىر قىرىنان تانىتا ءتۇستىڭ. "وتانىم، ساعان ايتامىن"  تولعاۋىن الماسجان سەن جالعاستىردىڭ جانە جالعاستىرا بەرۋىڭە تىلەكتەسپىن!" - دەپ اعىنان جارىلا جازعان ەكەن جانۇزاق ءمۇساپىر فەيسبۋك پاراقشاسىندا.

ەندەشە، سول كورمەدەن بىرنەشە سۋرەتتى نازارلارىڭىزعا ۇسىنايىق.

ۇسىنعان: ماقپال سەمباي