قازاقتىڭ بەلگىلى ءانشىسى، كومپوزيتور باتىرحان شۇكەنوۆتىڭ ەستەلىك مەدالى ونىڭ اناسىنا تابىستالادى، دەپ جازادى Qamshy.kz اقپارات اگەنتتىگى ق ر مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.

"15 اقپان كۇنى ساعات 13:00-دە «قازاقستان» ورتالىق كونسەرت زالىندا قازاقستاننىڭ ەڭبەك سىڭىرگەن قايراتكەرى، اتاقتى ءانشى جانە كومپوزيتور باتىرحان شۇكەنوۆتىڭ «اۋعان سوعىسىنىڭ ارداگەرى»، «كەڭەس وداعى اسكەرىنىڭ اۋعان جەرىنەن شىعارىلۋىنىڭ 30 جىلدىعىنا وراي» ەستەلىك مەدالدارىنىڭ تاپسىرىلۋ سالتاناتى وتەدى.

ەستەلىك مەدالدار كەڭەس وداعى اسكەرىنىڭ اۋعان جەرىنەن شىعارىلۋىنىڭ 30 جىلدىعىنا وراي ارنايى تاپسىرىسپەن ازىرلەنگەن. مەدالمەن اسكەري قىزمەتكەرلەرگە عانا ەمەس، سوعىس الاڭىندا قىزمەت ەتكەن ازاماتتار دا ماراپاتتالعان. 80-جىلداردىڭ ەكىنشى جارتىسىندا باتىرحان شۇكەنوۆ جاۋىنگەرلەردىڭ رۋحىن كوتەرۋ ماقساتىندا كونسەرت بريگاداسىمەن اۋعان جەرىندە ونەر كورسەتكەن. ءبىراق ءانشىنىڭ تىعىز گاسترولدىك كەستەسىنە بايلانىستى اتالمىش مەدالدار ۋاقىتىلى يەسىنە تابىستالماي قالعان. وسىعان بايلانىستى، ەستەلىك مەدالدار ۇزاق جىلدار بويى ورتالىق مەملەكەتتىك ارحيۆتە ساقتالعان" - دەلىنگەن حابارلامادا.

بەلگىلى بولعانىنداي، ءوزىنىڭ شىعارماشىلىق جولىن «قازاقكونسەرت» گاسترولدىك كونسەرتتىك بىرلەستىگىندە باستاعان باتىرحان شۇكەنوۆتىڭ مەدالى ۇزاق جىلدار بويى ورتالىق مەملەكەتتىك ارحيۆتە ساقتالعان. ال، قاڭتار ايىندا ەلوردامىزداعى «قازاقكونسەرت» مەملەكەتتىك كونسەرتتىك ۇيىمىنىڭ ديرەكتورى ج.سەيدۋللاۇلىنا تاپسىرىلدى. ەندى اناسى ديليارا يبراگيم قىزى شۋكەنوۆاعا سالتاناتتى تۇردە  تابىستالماق.  

دوڭگەلەك ۇستەل فورماتىندا وتەتىن ءىس-شارادا قازاقستاننىڭ ەڭبەك سىڭىرگەن قايراتكەرى، اتاقتى ءانشى جانە كومپوزيتور باتىرحان شۇكەنوۆتىڭ شىعارماشىلىعىن ەسكە الىپ، ءانشىنىڭ اناسىنان ەكسكليۋزيۆتى سۇحبات الۋ مۇمكىندىگى تۋىپ وتىر. ءىس-شارا بارىسىندا «قازاقكونسەرتتىڭ» ارتيستەرى باتىرحان شۇكەنوۆتىڭ اندەرىن جاندى داۋىستا شىرقايدى.  

ۇسىنعان: نازەركە لابيحان