كەيبىر ەلدەر جاڭبىردان كەيىنگى ساڭىراۋقۇلاقتاي قاپتاعان بوسقىنداردى قۋىپ شىعا الماي جاتسا، وزگە ەلدەر وزدەرىنە جاڭا تۇرعىنداردى شاقىرۋمەن الەك. Qamshy.kz اقپارات اگەنتتىگى وقىرماندار نازارىنا «تەك وسىندا كوشىپ كەلسەڭ بولدى، سول ءۇشىن ساعان اقى تولەيمىز، ءۇي بەرەمىز، جۇمىسقا ورنالاستىرامىز» دەيتىن الەمدەگى 14 ەلدىڭ ءتىزىمىن ۇسىنادى.
شەتەلدە تۇرىپ، ءارى سول ءۇشىن اقى الۋدى ارماندايسىز با؟ الەمدە جاڭا تۇرعىندارعا قاتتى مۇقتاج، ءتىپتى سول ءۇشىن اقى تولەۋگە دايىن باسشىلارى بار ەلدەر دە بار. ونىڭ سەبەبى تىم قاراپايىم. ول ەلدى-مەكەندەردە تۇرعىنداردىڭ سانى كۇرت ازايىپ كەتكەن. سول سەبەپتى، تۇرعىنداردىڭ سانىن ارتتىرۋ ماقساتىندا جەرگىلىكتى بيلىك باسىنداعىلار «باسكە قوماقتى قارجى تىگىپ» وتىر. مۇنداي ەلدەردىڭ تىزىمىنە امەريكا، كانادا، يسپانيا، نيدەرلاندى سەكىلدى ەلدەر دە كىرەدى.
دەترويت قالاسى، ميچيگان شتاتى، اقش
«باتىستىڭ ءپاريجى»، «اقش-تىڭ اۆتوموبيل استاناسى». قاڭىراپ بوس قالۋدىڭ از-اق الدىندا تۇرعان بۇل قالا حح عاسىردىڭ ەكىنشى جارتىسىنان باستاپ اتالمىش اتاعىنان ايىرىلىپ قالعان. قازىرگى ۋاقىتتا سول ءبىر داڭقىن قايتارۋ ءۇشىن بار كۇشىن سالۋدا. جەرگىلىكتى بيلىك «دەترويدقا شاقىرۋ» (Challenge Detroit) دەگەن جاڭا باعدارلاما ۇسىندى. باعدارلاما بويىنشا قالادا تۇرىپ، جۇمىس ىستەيتىن يندۋستريانىڭ ءارتۇرلى سالاسىنداعى ماماندارعا 2500 دوللار «سىياقى» ۇسىنعان.
الياسكا، اقش
ەگەر قىستى، قىس كورىنىستەرىن، باياۋ سىرعيتىن ءومىر اعىسىن جاقسى كورىپ، سۋىق اۋا-رايىنا سەلت ەتپەيتىن بولساڭىز، وندا الياسكاداعى ءومىر ناعىز سىزگە ارنالعان دەي الامىز. ارنايى ۇكىمەت قورى تۇرعىندار سانى كۇرت كەمىپ جاتقان ەلدى-مەكەندەرگە، اۋداندارعا بارىپ جۇمىس ىستەيمىن دەگەن ماماندارعا قوماقتى قاراجات بولگەن. ەڭ باستى شارتى – الياسكادا كەم دەگەندە ءبىر جىل تۇرۋىڭىز كەرەك.
ساسكاچيەۆان پروۆينسياسى، كانادا
كانادا پروۆينسياسى جاقىندا عانا جوعارى وقۋ ورنىن ءبىتىرىپ، ارى قاراي نە ىستەۋ كەرەكتىگىن بىلمەيتىن ماماندارعا كەرەمەت مۇمكىندىك ۇسىنىپ وتىر. پروۆينسيادا 7 جىل تۇرامىن، جۇمىس ىستەيمىن دەگەن ىنتالى جاستارعا 20 مىڭ كانادا دوللارىن تولەيدى.
نياگارا سارقىراماسى، اقش
تاعى ءبىر شىندىققا جاناسپايتىنداي كورىنەتىن عاجايىپ مۇمكىندىك! الەمدەگى ەڭ ادەمى جەرلەردىڭ بىرىندە تۇرىپ، ءارى سول ءۇشىن اقى الۋ دەگەن... بيلىك باسىنداعىلار جەرگىلىكتى كاسىپورىنداردا جۇمىس ىستەيمىن دەگەن جوعارى وقۋ ورىن تۇلەكتەرىنە 7 مىڭ دوللار ۇسىنىپ جاتىر.
پونگا، استۋريا، يسپانيا
يسپانيانىڭ سولتۇستىك-باتىسىنداعى بۇل كىشكەنتاي اۋىل اتالمىش ەلدەگى ەڭ ەسكى ەلدى-مەكەننىڭ ءبىرى. كوشىپ كەلەمىن دەگەن "جاڭا" تۇرعىنداردى قىزىقتىرىپ، ەكونوميكانى كوتەرۋ ءۇشىن جەرگىلىكتى بيلىك باسىنداعىلار وسى اۋىلعا كوشىپ كەلۋگە نيەتتى جاس جۇبايلارعا 3 مىڭ ەۆرو ۇسىنىپ جاتىر. بۇل دەگەن ەكولوگياسى تازا، وتە ادەمى جەردە تۇرۋعا تاپتىرماس مۇمكىندىك.
ۋترەحت، نيدەرلاندى
نيدەرلاندى الەمگە گۋمانيتارلى جانە الەۋمەتتىك عىلىمدى زەرتتەۋ سالاسى بويىنشا تانىمال. ەندەشە، الەۋمەتتىك تاجىريبەنىڭ بىرىمەن تانىستىرايىق: ءبىر قالادا تۇراتىن تۇرعىننىڭ ءبارى $1 مىڭ الاتىن بولسا، ءسىزدىڭ ويىڭىزشا، جاعداي قانداي بولادى؟
كەرتيس، نەبراسكا، اقش.
قالانى كوركەيتۋ ءۇشىن جەرگىلىكتى بيلىك تۇك تە جاسامايدى دەپ ءارقايسىمىزدىڭ شاعىم ايتقان كەزىمىز بولعانى انىق. امەريكانىڭ كەرتيس اتتى قالاسى مىنانداي مۇمكىندىك ۇسىندى. ەگەر كىم دە كىم قالانىڭ ينفراقۇرىلىمى مەن مادەنيەتىن كوركەيتۋگە قانداي دا ءبىر كەرەمەت وي ۇسىنسا، اتالمىش قالانىڭ كەز كەلگەن جەرىنەن جەر تەلىمىن تەگىن الا الادى.
نيۋ-حەيۆەن، كوننەكتيكۋت
نيۋ-حەيۆەن – بۇل قالاعا دەگەن قىزىعۋشىلىقتى وياتۋ ءۇشىن قۇرىلعان مەملەكەتتىك باعدارلاما. ەگەر ءسىز وسى جەردەن ءبىرىنشى رەت ءۇي ساتىپ الساڭىز، سىزگە قارىزعا پايىزسىز $10 مىڭ بەرەدى. ەگەر سول ۇيدە بەس جىلدان ارتىق تۇرساڭىز، وندا نەسيەڭىز تولىقتاي جابىلادى. سونىمەن قاتار، ءۇيىڭىزدى زاماناۋي ەنەرگيا ۇنەمدەگىش قىزمەتتەرمەن جابدىقتاۋ ءۇشىن ءسىز تاعى دا $30 مىڭ الا الاسىز. ال، سول ۇيدە ون جىل تۇرساڭىز، قارىزدى قايتارماي-اق قويساڭىز دا بولادى.
بالتيمور، مەريلەند
بۇل امەريكاداعى ەڭ ءقاۋىپتى قالالار تىزىمىندە جەتىنشى تۇرعان قالا. ءبىراق ول وزگەرگىسى كەلەدى. سول سەبەپتى، قالانىڭ كەز كەلگەن جەرىنەن ءۇي ساتىپ الىپ، كوشىپ كەلەمىن دەۋشىلەرگە 5 مىڭ دوللار ۇسىنىپ جاتىر. ەگەر بۇعان كوڭىلىڭىز تولماسا، بوس تۇرعان تاعى ءبىر ءۇيدى ساتىپ الۋ ارقىلى باعانى ەكى ەسەلەپ الساڭىز دا بولادى. ءيا، دۇرىس ويلادىڭىز! جوندەۋ جۇمىستارىن قاجەت ەتەتىن قاڭىراپ بوس تۇرعان ءۇيدى تەگىن الاسىز!
كانزاس شتاتىنىڭ ۇلكەن ايماعى
ەگەر ءسىز لينكولن قالاسىنا (حالقى شامامەن 3500 ادام) كوشىپ بارساڭىز، سىزگە اقى تولەۋگە دايىن. مىسالى، ءۇي سالۋعا تەگىن جەر بەرەدى. ەگەر لينكولن ءسىز ءۇشىن تىم ۇلكەن بولسا، 600 عانا تۇرعىنى بار ماركەتت قالاسىنان جەر الساڭىز دا بولادى. ول ازداي، 5 جىلعا كىرىس سالىعىنان بوساتىلاسىز نەمەسە جوعارى وقۋ ورنىنداعى 15 مىڭ دوللار كولەمىندەگى وقۋ نەسيەڭىزدى جاۋىپ بەرەدى.
پايپستوۋن، مانيتوبا
كانادانىڭ پايپستوۋن قالاسىندا جەردى تەگىن بەرمەيدى. ءبىراق ول جەردە ءبىر جىلداي تۇرامىن دەسەڭىز، كەرەمەت جەڭىلدىكتەر ۇسىنادى. ودان بولەك، ەگەر كاسىپ باستاعىڭىز كەلسە قالا بيلىگى 32 مىڭ كانادالىق دوللارعا دەيىن (24 مىڭ دوللار) گرانت ۇسىنادى.
ماتسايكەر ارالى، تاسمانيا
ەگەر اقش پەن كانادا ءسىزدى شابىتتاندىرماسا، وندا تاسمانياعا قالاي قارايسىز؟ تاسمانيانىڭ جاعالاۋىنداعى ماتسايكەر ارالىندا تۇرامىن دەۋشىلەرگە جەر مەن جۇمىس ۇسىنادى. قويىلاتىن تالاپ – شامشىراق قىزمەتىن اتقارۋ، مەتەوروگيالىق مالىمەتتەر بەرىپ تۇرۋ، جەر مەن قۇرىلىس جۇمىستارىنا باس-كوز بولۋ.
ميسيما، جاپونيا
جالعىزسىز با؟ وندا ءسىزدى جاپونيانىڭ ميسيما اۋىلى (ميسيما قالاسىمەن شاتاستىرماۋ كەرەك) كۇتىپ ءجۇر. اۋىل كىشىگىرىم ءۇش ارالدان تۇرادى. تۇرعىن سانى بار-جوعى 400 ادام. كوبىنەسە، تەك زەينەتكەرلەر. ميسيما جاپوندىقتارعا كوشىپ كەلۋگە كەتەتىن شىعىندى جابۋعا جانە وسى اۋىلدا تۇرعان العاشقى ءۇش جىلدا اي سايىن جاردەماقى رەتىندە 100 مىڭ يەن (شامامەن، 840 دوللار) بەرەمىز دەدى. مۇندا ءۇش جاتىن بولمەسى بار ءۇيدى 23 مىڭ يەنگە (207 دوللار) جالداي الاسىڭ. جانە ەڭ سوڭعى كومەك ول – سيىر. ءبىر سيىردى تەگىن بەرەدى!
پيتكەرن ارالى، تىنىق مۇحيتىنىڭ وڭتۇستىك بولىگى
ەگەر ءسىز الەمدەگى ەڭ شالعايداعى ارالدىڭ بىرىندە تۇرۋدى ارمانداساڭىز، وندا پيتكەرن ارالى ءدال سىزگە ارنالعان! مۇندا بار-جوعى 50-اق ادام تۇرادى. سول سەبەپتى، ءاربىر كوشىپ كەلۋگە نيەتتى جان بۇل جۇماق مەكەننەن قالاعان جەردى تەگىن الا الادى. الايدا، وكىنىشكە وراي، 2015 جىلدان بەرى ول جەرگە تەك ءبىر ادام عانا كوشىپ باردى. بالكىم، بار گاپ اپتاسىنا تەك ءۇش كۇن عانا اشىق تۇراتىن جالعىز دۇكەندە شىعار؟ ءبارىن الدىن الا جاڭا زەلانديادان تاپسىرىس بەرۋگە تۋرا كەلەدى. دەگەنمەن، جاعالاۋ مەن جالعىزدىق جانىڭىزعا جاقىن بولسا، وندا ءسىز ول جەرگە كوشىپ بارعان ەكىنشى ادام بولۋعا مۇمكىندىگىڭىز بار!
بورميدا اۋىلى يتاليانىڭ سولتۇستىك-شىعىسىندا ورنالاسقان
تاۋلى ايماقتاعى بورميدا اۋىلى يتاليانىڭ سولتۇستىك-باتىسىنداعى ساۆونا پروۆينسياسىندا، گەنۋيدەن شامامەن 80 شاقىرىم جەردە ورىن تەپكەن. اۋىل تاۋدىڭ بيىك جەرىندە، ءبىراق تەڭىزگە جاقىن ماڭدا ورنالاسقان. سوندىقتان، ول جەردىڭ اۋاسى وتە تازا!
بورميدانىڭ اكىمى اۋىلىنا كوشىپ كەلگەن ءار ادامعا 2 مىڭ ەۆرو بەرەمىن ۋادە ەتىپ وتىر. وعان قوسا، كوشىپ كەلگەندەرگە اسبولمەسى، جۋىناتىن، قوناق كۇتەتىن بولمەسى، كولىكجايى، جەرتولەسى جانە ءتورت جاتىن بولمەسى بار پاتەردى جالعا الۋ قۇنى ايىنا بار بولعانى 50 ەۆرو. ال ەڭ قىمبات تۇرلەرى ارى كەتسە، 120 ەۆرو بولادى.
اتالمىش ۇسىنىستار ءارتۇرلى ەلدەگى كوپتەگەن ادامنىڭ قىزىعۋشىلىعىن وياتتى. الايدا، ءبىر كەمشىن تۇسى بار. اۋىلدا جۇمىس اتاۋلى مۇلدەم جوق دەۋگە بولادى. تۇرعىندار نەگىزىنەن فەرمەرلىكپەن اينالىسادى، ءۇي جانۋارلارىن باعادى. قىسقاسى، اۋىلسۇيەر قاۋىمدى بۇل دا توقتاتا المايدى. كوپشىلىگى قاشىقتىقتان-اق جۇمىس ىستەي بەرۋىنە بولادى. سوندىقتان، كوشىپ ارۋعا نيەتتى جانداردى ول اۋىلداردا عالامتورعا جوعارى جىلدامدىقتا قوسىلۋ مۇمكىن بە دەگەن ساۋال قىزىقتىرادى.
دەرەككوز: hyser.com.ua
ۇسىنعان: ماقپال سەمباي
پىكىر قالدىرۋ