"مەن ومىرىمدە باقىتتى ميلليونەردى كورمەپپىن. مۇنى ومىردەن كورگەن-بىلگەنى كوپ ادام رەتىندە ايتىپ تۇرمىن". بۇل تۋرالى مەملەكەت باسشىسى «100 جاڭا ەسىم» جوباسىنىڭ ەكىنشى كەزەڭىنە وتكەن ازاماتتارمەن كەزدەسۋ كەزىندە ايتقان بولاتىن.
راسىندا دا ميلليونداعان ءتىپتى ميللياردتاعان اقشاسى بار ادامنىڭ ءوزى باقىتسىز عۇمىر كەشەدى دەگەنگە سەنەسىز بە؟ ەگەر اقشادان قينالىپ، ايلىقتان ايلىققا دەيىن ءومىر سۇرەتىن ادام بولساڭىز «اقشاسى بار ادامنىڭ ومىردەن تۇڭىلۋىنە نە سەبەپ؟» دەگەن سۇراق قويعان شىعارسىز. ءيا سىرتتاي قاراعاندا ىشكەنى الدىندا، ىشپەگەنى ارتىندا، اقشانى وڭدى-سولدى جۇمساي الاتىن جان نەگە باقىتسىز؟ ءبىر عانا جاۋاپ بار: ءومىردىڭ ءمانىن تۇسىنبەگەندىكتەن. ءومىردىڭ بار قىزىعى اقشا ەمەس ەكەنىن بىلگەن ساتتە ميلليونەر بولسىن ءتىپتى ميللياردەر دە باقىتسىزدىققا ۇشىرايدى. قالايشا؟
ويلانىپ كورىڭىزشى، ءبىر تاس كەدەي باي بولسام دەپ ارماندايدى. ونداعان جىلدار بويى سول ارمانىن ىسكە اسىرۋ ءۇشىن ەڭبەك ەتەدى، تەر توگەدى. تالاي رەت جىلايدى، قۇلايدى الايدا ماقساتى ءۇشىن ءومىر ءسۇرىپ، سول ماقساتقا جەتۋ ءۇشىن بارىن سالادى. ءۇمىتىن ۇزگىسى كەلمەيدى. ال سول ماقساتىنا جەتكەن ساتتە تاس كەدەي بولعان ادام نە ىستەيدى؟ قۋانىپ، باقىتتان باسى اينالىپ بىرنەشە كۇن، مۇمكىن اي جۇرەر... سودان كەيىن ول وزىنە سۇراق قويا باستايدى. «مەن ەندى نە ىستەيمىن؟»، دەپ اينانىڭ الدىنا كەلىپ ويلانادى. مىقتى ادامدار تاعى ءبىر ماقسات قويىپ سونى ورىنداۋعا كىرىسەدى. ءبىراق باي ادامداردىڭ دا ءالسىزى بولادى. سونداي بايلار ءتىرى ولىككە اينالادى. باي ادامداردى نەگىزىنەن 2-گە ءبولىپ قاراستىرساق: اقشانى جۇرەگىندە ۇستايتىندار جانە قولىندا ۇستايتىندار. جۇرەككە كەرەگى بايلىق ەمەس... سول سەبەپتى اقشانى جۇرەگىندە ۇستايتىندار باقىتسىزدىققا ۇشىرايدى.
ال كەيبىرى توقشىلىقتا ءومىر سۇرۋگە ەتى ۇيرەنىپ قالادى. ميلليونەردىڭ كوبىسى ءوز بايلىعىنان ايىرىلىپ قالعانىن بىلگەن كەزدە وز-وزىنە قول سالعان. كوبى «ءومىردىڭ ءمانى – بايلىقتا» دەپ ويلاعاندىقتان وسىنداي قادامعا بارادى. ولار ءۇشىن اقشاسىز ءبىر كۇن ءومىر ءسۇرۋ توزاقپەن تەڭ بولىپ كورىنەدى. ءبىرى ءوزىن اتىپ ولتىرەدى، ەندى ءبىرى ۋ ءىشىپ ولەدى...
Qamshy.kz اقپارات اگەنتتىگى ءتۇرلى قيىندىققا توتەپ بەرە الماي، ومىردەگى قيىندىقتى ءولىم ارقىلى شەشكىسى كەلگەن ميلليونەرلەردىڭ ءتىزىمىن وقىرمان نازارىنا ۇسىنادى.
دجوناتان رەيس
بريتاندىق دجوناتان رەيس وتە تابىستى ءارى تانىمال بيزنەسمەن بولاتىن. 35 جاسىندا ميلليونەر اتاندى. ول ولەر الدىن اكەسىنىڭ بيزنەسىن 45 ملن دوللارعا ساتىپ جىبەرگەن. نەگىزى اكەسىنىڭ بيزنەسىن ساتقان دجوناتان ءوز ءىسىن ارمەن قاراي جالعاستىرسا تابىسى ءتىپتى ارتار ەدى. جورا-جولداستارى دا، باسەكەلەستەرى دە وسىلاي ويلاپتى. الايدا 2009 جىلى ول وز-وزىنە قول سالدى. ءتىپتى ولەر الدىن حات تا قالدىرماعان. جاس ميلليونەردىڭ مۇنداي قادامعا بارۋىنا نە تۇرتكى بولعانى بەلگىسىز. تۋىستارىنىڭ ايتۋىنشا، دجوناتانعا اكەسىنىڭ ينسۋلت العانى وعان قاتتى اسەر ەتكەن.
ەلي بلەك
بلەك تابىستى امەريكالىق بيزنەسمەن بولدى. ول «United Brand» اتتى كومپانيانى باسقاردى. ەلي بلەكتىڭ كاسىبى العاشقى ۋاقىتتا وتە ءساتتى باستالعان. سەبەبى ول وتە تالانتتى ەدى، كەز كەلگەن كەلىسسوزدى ءوز پايداسىنا اسىراتىن. ءوز باسەكەلەستەرىنىڭ اراسىنداعى ەڭ قۋى دا ەلي بلەك بولدى. ءبىراق گوندۋراس پرەزيدەنتىنە باناندى ەكسپورتتاۋ ءۇشىن 2،5 ملن دوللار كولەمىندە پارا بەرگەن كەزدەن باستاپ ونىڭ ءومىرى كۇرت وزگەردى. ونىڭ بىلىعى اشكەرە بولعان سوڭ، ماسقارالىققا شىداي الماعان 53 جاستاعى ەلي بلەك وز-وزىنە قول سالدى.
كريستوفەر فوستەر
2008 جىلى تانىمال كاسىپكەر ءوزىنىڭ قىزى مەن ايەلىن ءولتىردى. كەيىن ۇيىمەن بىرگە ءوزىن دە ورتەپ جىبەرگەن.
بيزنەسمەننىڭ مۇنداي قاتىگەزدىككە بارۋىنا سوت وتىرىسى سەبەپ بولعان. سوت وتىرىسىندا تابىستى بيزنەسمەننىڭ كوك تيىنسىز قالۋى مۇمكىن ەكەنى ايتىلدس. سەبەبى ونىڭ Ulva كومپانياسى قۇردىمعا كەتىپ، بانكروت بولىپ، قارىزعا بەلشەدەن باتقان. سوت وعان 4 ملن دوللار ايىپپۇل سالدى. سونداي-اق بيزنەسمەننىڭ مال-مۇلكىن تاركىلەمەك بولادى. ونىڭ ءۇيى 2،4 ملن دوللارعا باعالانىپتى. وسى جايتتان كەيىن ونىڭ جۇيكەسى سىر بەرىپ، اشۋ-ىزامەن ايەلى مەن قىزىن ولتىرگەن. كەيىن وز-وزىنە قول سالعان.
دجون لوۋرەنسون
تانىمال بيزنەسمەن 1،8 ملن دوللارعا باعالانعان ۇيدە تۇرعان. ول وتە باي جانە سىرتتاي باقىتتى بولىپ كورىندى. ءيا ول وتە باقىتتى ەدى. تەك ءوزىنىڭ سۇيىكتى ايەلى قاتەرلى ىسىككە شالدىققان. 47 جىل بىرگە تۇرعان ەرلى-زايىپتىلار مەكسيكادان تاپسىرىسپەن الىنعان زاتقا ۋلانىپ ولگەن. لوۋرەنسون ولەر الدىندا حات قالدىرىپ كەتىپتى. ول حاتىندا، ايەلىنسىز ءبىر ءسات تە ءومىر سۇرە المايمىن دەپ جازعان. سول سەبەپتى ول ءوز ايەلىمەن بىرگە ولۋگە شەشىم قابىلداپتى.
حۋبەرت بوۋمەستەر
اتاقتى بانكير نيدەرلاندياداعى "ABN Amro" بانكى ديرەكتورلار كەڭەسىنىڭ مۇشەسى بولعان. ول 49 جاسىندا ءوزىنىڭ باسىنان اتىپ، ومىردەن ءوتتى. بانكيردىڭ مۇنداي قادامعا بارۋىنا جۇمىستان ايىرىلۋى سەبەپ بولىپتى. ول جۇمىس ىستەگەن بانك باكروتقا ۇشىراعان سوڭ "Artemis Assets Management" كومپانياسىندا جۇمىس ىستەگەن. الايدا ولەر الدىندا بۇل كومپانيادان شىعىپ كەتكەن. ولەر الدىنداعى حاتىندا «مەن بۇلاي ءومىر سۇرە المايمىن»، دەپ جازعان.
P/S: ال ەندى ءومىردىڭ ءمانى دەگەن نە؟ ومىردە بايلىقتان دا ماڭىزدى دۇنيە بار. ونى اركىم ءارقالاي تۇسىنەدى. بىرەۋىڭىز وتباسىڭىزدى، ەندى ءبىرىڭىز اتا-اناڭىزدى ءومىردىڭ ءمانى دەپ تۇسىنەسىز. ءبىراق بۇل ماڭىزدى دۇنيەلەردىڭ دە جوعالاتىن كەزى بولادى ەمەس پە؟! ال ءسىز ويلاپ جۇرگەن ءومىردىڭ ءمانى ءبىر كۇنى بولسىن ءىز-تۇسسىز جوق بولاتىن بولسا نە ىستەيسىز؟ ءومىرىڭىزدىڭ سوڭىنا دەيىن ولمەيتىن، وشپەيتىن ماڭىزدى دۇنيە بار ما؟
پىكىر قالدىرۋ