35 جاستاعى ەرلان راحيموۆ كوپ بالالى انالاردىڭ بالالارىن تەگىن كۋرسقا شاقىرادى، دەپ جازادى Qamshy.kz اقپارات اگەنتتىگى muslim.kz سايتىنىڭ دەرەگىن نەگىزگە الىپ. ونىڭ بۇل شەشىمدى قابىلداۋىنا استاناداعى 5 بالانىڭ ءولىمى سەبەپ بولعان. ول جاعدايى ناشار كوپ بالالى انالاردىڭ بالالارىنا شەتەل ءتىلىن تەگىن ۇيرەتۋگە دايىن ەكەنىن ايتتى.
— ادامنىڭ قولىنا بالىق ۇستاپ بەرگەننەن، بالىقتى قالاي اۋلاۋ كەرەكتىگىن ۇيرەتكەن جاقسى. مەن الەۋمەتتىك جاعدايى تومەن، كوپ بالالى وتباسىنان شىققان بالالارعا تەگىن شەت ءتىلىن ۇيرەتەمىن دەپ شەشىم قابىلدادىم. بۇل بالالاردىڭ بولاشاقتا وقۋ ورنىنا ءتۇسىپ، جاقسى ءبىلىم الىپ، كاسىبىن دوڭگەلەتۋگە كومەكتەسەدى. مەنىڭ مەكتەبىمدە 3-4 توپ بار. مەن ءبىر وتباسىنان 1-2 بالانى كۋرسقا قابىلداي الامىن، - دەيدى ەرلان راحيموۆ.
ەرلان راحيموۆ الەۋمەتتىك جەلى ارقىلى ءوز مالىمدەمەسىن جاسادى. سونداي-اق ءقازىردىڭ وزىندە شەت ءتىلىن ۇيرەنگىسى كەلەتىندەردىڭ قاراسى كوپ.
— جاقىندا سال اۋرۋىنا شالدىققان قىز ءوزىنىڭ وسىنداي مۇمكىندىكتى كۇتىپ جۇرگەنىنە كوپ ۋاقىت بولعانىن ايتتى. ءبىز ونلاين تۇردە ساباق بەرەتىن بولدىق. سونداي-اق ءۇش بالا دا شەت ءتىلىن ۇيرەنۋ ءۇشىن كەلگەن. بىزدە شەت ءتىلىن ۇيرەتۋدەن بولەك باسقا دا كۋرستار بار، دەدى شەت ءتىلىنىڭ ءمۇعالىمى.
ۇسىنعان: اسەل بولات قىزى
پىكىر قالدىرۋ