يلياس كار بۇگىنگى سوتتا جول اپاتىنىڭ قالاي بولعانىن ايتىپ بەردى دەپ حابارلايدى Qamshy.kz اقپارات اگەنتتىگى. 

— "گراند وپەرادان" ايەلىممەن ۇرىسىپ شىققان ەدىم. كەيىن ناۋرىزباي باتىر كوشەسىمەن جوعارى كوتەرىلىپ، اباي كوشەسىنە جەتىپ وڭعا بۇرىلدىم. سول كەزدە باعدارشامدا جاسىل ءتۇس جانىپ تۇرعان بولاتىن. "ءوتىپ ۇلگەرەم" دەپ ويلادىم دا، جىلدامدىقتى كوبەيتتىم. كەيىن قىزىل ءتۇس جانعان كەزدە توقتاپ ۇلگەرە المايتىنىمدى ءبىلدىم. "سوسىن اۆتوبۋستى اينالىپ ءوتىپ ۇلگەرەمىن" دەپ ويلاعان ەدىم. ءبىراق ونىڭ ارعى جاعىنداعى ميتسۋبيسي كولىگىن كورمەدىم. سودان كەيىن قاتتى جىلدامدىقپەن كەلىپ جەڭىل كولىككە سوعىستىم. ءدال ورتا تۇسىنان سوعىپپىن، كولىك اينالىپ كەتتى. دەرەۋ كولىگىمنەن ءتۇسىپ جاڭاعى كولىككە قاراي باردىم. رۋلدە ءبىر ەر ادام قاسىندا ءبىر ايەل مەن ارتقى ورىندىقتا ەكى ايەل وتىر ەكەن. ءبارى دە ەس ء-تۇسسىز بولدى، دەيدى كۇدىكتى.

سونداي-اق يلياس كار وقيعا ورنىندا بولعانىن ايتتى. 

— سالدەن سوڭ ادامدار جينالىپ قالدى. جان-جاقتان كەلىپ جەڭىل كولىكتەگى ادامداردى شىعارىپ، جەدەل جاردەم شاقىرىپ جاتتى. كەيىن بىرنەشەۋى مەنىڭ كولىگىمە قاراي بارىپ "جۇرگىزۋشى قايدا؟" دەپ ءتۇرلى بىلاپىت سوزدەر ايتتى. ولار "گەلەندۆاگەن" كولىگىنىڭ جۇرگىزۋشىسى مەن ەكەنىمدى بىلمەدى. "كوشەدەگى كومەكتەسىپ جاتقان ادام" دەپ ويلادى.  مەن دە "گەلەندۆاگەننىڭ" جۇرگىزۋشىسى ەكەنىمدى ايتپادىم. سودان اباي كوشەسىنەن ءوتىپ، سەيفۋللين كوشەسىنىڭ بويىمەن تومەن قاراي ءجۇردىم دە، ۇيلەردىڭ اراسىندا ءبىراز ۋاقىت وتىردىم. ءبىراز ۋاقىت وتكەن سوڭ، ماسانچي كوشەسىنەن تاكسي ۇستاپ وزىمە سىرت كيىم مەن اياق كيىم الۋعا باراxولكاعا باردىم. سىرت كيىمىم كولىكتە قالعان بولاتىن. ال اياعىمدا جازدىق اياق كيىم بولدى.
باراxولكادا ءجۇرىپ ءبىر تانىسىما حابارلاستىم، - دەيدى يلياس كار.  

سونىمەن قاتار ايىپتالۋشىنىڭ 16 جىلدىق جۇرگىزۋشىلىك تاجىريبەسى بار ەكەن. وسى ۋاقىتقا دەيىن بىردە ءبىر رەت جول اپاتىنا ۇشىراماعان. 

سونداي-اق يلياس كار پروكۋروردىڭ سۇراقتارىنا جاۋاپ بەرۋ بارىسىندا 6 جىلدان بەرى ىشپەيتىنىن ايتتى. 

— مەن ىشىمدىك ءىشىپ كولىك جۇرگىزدى دەگەن ايىپتى مويىندامايمىن. مەن 6 جىلدان بەرى ىشىمدىك ىشپەيمىن"، دەيدى يلياس كار. 

يلياس كار ءوزىنىڭ نە سەبەپتى وقيعا ورنىنان قاشىپ كەتكەنىن ءتۇسىندىردى. 

— جول اپاتى بولعاننان سوڭ ادامدار كوپتەپ جينالا باستادى. "سول جەردەگى ادامداردىڭ وزدەرى مەنى جازالايدى" - دەپ قورىقتىم. سەبەبى كوپشىلىگى مەنى ىزدەپ جاتقان ەدى"، - دەيدى ايىپتالۋشى. 

ۇسىنعان: اسەل بولات قىزى