الماتى وبلىسىنداعى تۇرگەن اۋىلىنىڭ تۇرعىنى قاقاعان ايازدا پاكەتكە سالىنىپ، قاقپادا ءىلىنىپ تۇرعان نارەستە وقيعاسى جايلى بايانداپ بەردى. كەلىنشەك كىشكەنتاي ءسابيدى قالاي تاۋىپ العانىن جەتكىزدى دەپ حابارلايدى Qamshy.kz اقپارات اگەنتتىگى ەۋرازيا ءبىرىنشى ارناسىنىڭ دەرەگىن نەگىزگە الىپ.
ايەل ادام بۇل كۇندى ماڭگى ەسىندە ساقتاپ قالاتىنى ءسوزسىز. ول قاقپادا ءىلۋلى تۇرعان قىزىل پاكەتتە بالا جاتىر دەپ مۇلدە ويلاماعان.
«پاكەتتى ۇيگە كىرگىزدىم دە، اشا باستادىم. ىشىنەن بالانىڭ قولى شىقتى. مەن شوشىپ كەتتىم، ارى قاراي اشا بەردىم. شارف قان-قان بولدى. سەبەبى، ءسابي جاڭا تۋىلعان»، - دەپ ەسىنە الدى ساۋلە.
بالانىڭ قاسىنا ەشقانداي حات قالدىرماعان. ول جۇپ-جۇقا جازدىق ورامالعا ورالىپتى. ساۋلە بىردەن جەدەل جاردەمدى شاقىرتقان.
وقيعا ورنىنا كەلىپ جەتكەن دارىگەر بالانىڭ كىندىگىن كەسىپ، ونى پەرزەنتحاناعا الىپ كەتكەن. دارىگەرلەردىڭ ايتۋىنشا، ەگەر بالا بۇل ۋاقىتتان كەش تابىلعان جاعدايدا ونى قۇتقارۋ مۇمكىن ەمەس بولاتىن ەدى.
«نارەستە قاتتى توڭىپ قالعان. اسا اۋىر دەڭگەيدەگى گيپوتەرميا، دەنە قىزۋى 32 گرادۋس»، - دەدى فەلدشەر ايبەك ءشىرىنوۆ.
ول ءسابيدىڭ ءولىم اۋزىنان امان قالعانىن ايتادى. دۇنيە ەسىگىن ەندى اشقان قىز سۋىقتان كوز جۇمۋعا از قالعان.
پەرزەنتحانا قىزمەتكەرلەرى نارەستەنىڭ تۋىلا بىتكەن ينفەكسياسى بار ەكەنىن ايتتى. ول قازىرگى تاڭدا، بارلىق قاجەتتى ەمدى الىپ جاتىر. دارىگەرلەردىڭ دە وعان قاتىستى بولجامى جاقسى.
ءتارتىپ ساقشىلارى بولسا ءسابيدىڭ اناسىن ىزدەستىرىپ الەك.
«وقيعاعا قاتىستى سوتقا دەيىنگى تەرگەۋ جۇمىستارى جۇرگىزىلۋدە. ءىس قىلمىستىق كودەكستىڭ 119 بابى بويىنشا قوزعالعان»، - دەدى الماتى وبلىسىنىڭ پوليسيا دەپارتامەنتىنىڭ رەسمي وكىلى ەرنار ءسايدىلدين.
بۇگىنگى كۇنى نارەستە ەسىك پەرزەنتحاناسىندا جاتىر. ونىڭ ەمى اياقتالعان سوڭ بالالار ۇيىنە جىبەرەدى.
ۇسىنعان: اسەل بولات قىزى
