الماتى وبلىسىنداعى ەكپىندى اۋىلىنىڭ تۇرعىندارى اكىمدەرىن جەر-كوكتەن تاپپاي، تەلەارنا ارقىلى ىزدەۋ جاريالادى. تەك كوكتەمگى سۋ تاسقىنىندا كورىنەتىن شەندىلەر ەسەپتەرىنە دە وزدەرىنە ىڭعايلى جۇرتتى شاقىرىپ كۇيدىرەدى، دەيدى. سوندىقتان سۋ، جارىق، جول ماسەلەلەرىن ايتا الماي قينالادى ەكەن. حالقى ءتۇرىن ۇمىتقان وكرۋگ باسشىسىن ءبىز دە كورگىمىز كەلىپ ەدى، الايدا، شەنەۋنىك وبلىس اكىمى باتتالوۆتىڭ ەرتەڭگى جينالىسىنا الدىن الا تالدىقورعانعا كەتىپتى. ايتپەسە، تومەندەگى بۇقارانىڭ بازىناسىن بەسكە ءبىلىپ وتىر، تەك جوعارىداعى باسشىسى ماڭىزدىراق سەكىلدى. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنىڭ دەرەگىنە سۇيەنىپ حابارلايدى. 
 
“اكىم دەگەندى كورمەيمىز دە، تانىمايمىز دا”. 

“ مەن بىلمەيمىن، اكىمدى تانىمايمىن دا”.

ءبىر ەمەس مىنا جينالعان ەكپىندىلىكتەردىڭ كوبى اكىمدەرىنىڭ ءتۇرىن ۇمىتقان. بارسا تاپپايدى، شاقىرسا كەلمەيدى. تەك كوكتەمدە سۋ تاسىپ، مازالارىن العاندا نوكەرلەرىن جىبەرەتىنگە ۇقسايدى. ال، اشەيىن كۇندە شامشىراقپەن ىزدەسەك تە، الدىمىزدان ەشكىم شىقپايدى دەيدى. حالىقتىڭ جاعدايىن سۇراماعاننىڭ كەسىرى، پروبلەما اۋىلدا شاش ەتەكتەن. مىسالى...
 
“ون بەس جىل بولدى قونىستانعانىمىزعا. ءالى ءبىر ۆودوپروۆود سۋ المادىق. ءبىز دە قارا جەردەن سۋ ءىشىپ وتىرمىز. ءوزىمىز سۋى جوق جەردەن كەلىپ ەدىك. بىزگە ءبىرىنشى ماسەلە سۋ كەلسىن، - دەپ ايتتى تۇرعىن زەينەش شەكتىبايەۆا.
 
“ ءتورت جىل سۆەتسىز وتىردىق. 2011 جىلدان بەرى ءارقايسىمىز اقشا جيناپ، 35 مىڭنان ترانسفورماتور ساتىپ الدىق. مىنا باعانانى اقشيدان الدىق. 57 جىلعى باعاناسى بۇل”، - دەيدى تۇرعىن قونىسباي ەسبوسىنوۆ.

بىرەۋدىڭ ەسكى باعاناسىنان توق تارتىپ جۇرگەندەرى ازداي، ۇرىلار دا سورلاتادى جۇرتتى. اۋىلدىڭ 70 پايىز وتباسىن اككىلەر تۇگەل توناپ ۇلگەرگەن. قوراداعى مال تاۋسىلعان سوڭ، ۇيدەگى تەحنيكاعا دانىگىپ الىپتى بۇل كۇنى. پوليسەيگە شاعىمدانادى. ءبىراق ون جىل بۇرىنعى ارىزدارىمىزدىڭ ءوزى ءالى كوتەرىلمەگەن، اشىلماعان دەپ كۇيىنەدى.

“پوليسيا سوناۋ  گرەس-تەن كەلەدى. ول ەكى ساعاتتا كەلەدى. وعان دەيىن ۇرى الماتىدان شىعىپ كەتەدى. مىنا جەردەگى ۋچاسكوۆىيعا ايتساق، ءبىزدىڭ مىندەت ەمەس. سوندا ول نە ءبىتىرىپ، نە ىستەپ ءجۇر. ادام بىلمەيدى”، - دەدى تۇرعىنداردىڭ ءبىرى جاسان جاقسىلىقوۆ.

ەكپىندى الماتىدان استاناعا اپارار كۇرە جولدا ورنالاسقان. سول اسفالت اۋىلدى ەكىگە قاق جارىپ تۇر. جولدا بىردە ءبىر بەلگى جوق. ءبىراق كولىك ۇزدىكسىز. تالاي بالانىڭ ءومىرى قىرشىننان قيىلىپ، تالاي ادام مۇگەدەك بولعان. ول دا ەشتەڭە ەمەس، ەكپىندىنىڭ ارعى بەتى قاراساي، بەرگىسى ىلە اۋدانىنا قاراستى. حالىق بولىنبەگەنىمەن، حالىققا قىزمەت ەتەتىندەر ءبولىنىپ، بالە بولدى، - دەيدى. 

“ ىلە جاعىنا كەلەتىن جەدەل جاردەم قاراسايدىڭ اۋرۋىن المايدى. قاراسايعا كەلگەندەر ىلەنىكىن المايدى. امەريكا مەن سوۆەت وداعى بولىپ تۇرمىز اۋ، شاماسى. ەگەمەندىك العانىمىز قايسى؟ ەكى رەسپۋبليكادامىز. ءبىر اۋىل. ءبىر جول”، - دەدى اۋىل تۇرعىنى ءتاربيا ساپاربايەۆا.

ءبىر اۋىلدى ەمەس، ءبۇتىن ءبىر وكرۋگتى «بيلەپ» وتىرعان اكىمدەرى ەكپەندىدەن 12 شاقىرىم جەردە وتىرادى. الىس تا ەمەس. باردىق. تەك، حالىق كورمەگەن باسشىنى ءبىز دە كورە المادىق. ەرتەڭگى وبلىس اكىمىنىڭ ەسەبىنە ەرتەرەك كەتىپتى. ون مينۋتىن قيماعان شەندى ورىنباسارىنان سالەمدەمە جىبەرىپتى. ءبارى وتىرىك، -دەيدى. 

“حالىق تانىمايمىز اكىمدى دەيدى. نەگە تانىمايدى؟ ءبىز ۇنەمى بارامىز. ال كورمەدىك دەگەن وتىرىك اڭگىمە. ءوزىم قانشا كورىپ ءجۇرمىز عوي. سۋ كوتەرىلەتىن كەزدە كوكتەمدە مىندەتتى تۇردە  بارامىز”، - مەجدۋرەچەنسك اۋىلدىق وكرۋگى اكىمىنىڭ ورىنباسارى باتىرحان ءادىلوۆ.

كوكتەم دە جاقىندادى. "اكىم كەلەدى" دەگەن ۇمىتپەن جۇرت تاعى قالدى. "ايتپاقشى، سۋ تارتۋ جۇمىسى اۋدان بيۋدجەتىنە بايلانىستى"،- دەدى شەنەۋنىك. جارىقتى دا جوندەۋدى سول ارىپتەستەرى شەشەدى ەكەن. "، جولدا بەلگىلەر بار، تەك حالىقتىڭ ءوزى ابايلاپ جۇرمەيدى، كولىكتەردىڭ جۇيتكۋىنە ءبىز جاۋاپتى ەمەسپىز" دەپ اقتالدى. ۇرىلارعا قاتىستى ءسوزى دە اكىمدىككە ايتىپ ەشتەڭە ۇرلامايدى دەگەنگە سايادى. سونىمەن، «بورىكتىلەر» مەن بۇقارانىڭ ءسوزى ەكىگە قاق ءبولىندى، ەكپىندى اۋىلىنىڭ ءوزى قۇساپ...

ۇسىنعان: نازەركە لابيحان