بۇگىن الماتىداعى المالى اۋداندىق سوتى 3 ادام قازا تاپقان جول اپاتىنا سەبەپكەر بولعان يلياس كارعا ۇكىم شىعاردى. سوت شەشىمى بويىنشا يلياس كار 10 جىلعا باس بوستاندىعىنان ايىرىلدى.

ال جابىرلەنۋشى تاراپ سوتتان قىلمىسكەردىڭ جازاسىن جەڭىلدەتۋدى سۇراعان. سەبەبى كار 4 جابىرلەنۋشىنىڭ مورالدىق شىعىنىن وتەپ بەرگەن. بۇل تۋرالى Qamshy.kz اقپارات اگەنتتىگىنىڭ تىلشىسىنە مارقۇم بولعان جۇرگىزۋشى باقىتنۇردىڭ قۇناپيا ۇلىنىڭ ادۆوكاتى ەرجىگىت نۇرتاي ۇلى ايتتى. 

"سوت شەشىمى قاناعاتتاندىردى. مارقۇم باقىتنۇردىڭ اعالارى قىتايدان كەلدى.جابىرلەنۋشى جاق 3 ملن تگ. مورالدىق شىعىن تالاپ ەتتى. تالابىمىزدى ورىندالدى. شىعىندى تولەپ بەردى. سوت شەشىمى قىلمىسكەرگە ماكسيمالدى تۇردە 10 جىل بەرىپ وتىر. ءبىز ماتەريالدىق شىعىن تالاپ ەتكەننەن كەيىن، قىلمىسكەردىڭ جازاسىن جەڭىلدەتۋىن سۇرادىق. سوت  ونى ەسەپكە العان جوق. ەڭ جوعارعى جازانى بەردى"، –دەدى الماتى وبلىسى ادۆوكاتتار القاسىنىڭ ادۆوكاتى ەرجىگىت نۇرتاي ۇلى. 

ەسكە سالا كەتەيىك، الماتى قالاسىندا وتكەن جىلدىڭ 29 جەلتوقسانىندا جانتۇرشىگەرلىك جول اپاتى بولىپ، ءۇش ادام قازا تاپقان بولاتن. بۇكىل ەلدى ەسەڭگىرەتكەن بۇل وقيعاعا Gelendwagen ماركالى كولىك مىنگەن كاسىپكەر يلياس كار سەبەپكەر بولعان.

ول 120 كم/ساع جىلدامدىقپەن باعدارشامنىڭ قىزىل تۇسىنە ءوتىپ كەتىپ، Mitsubishi كولىگىن سوعىپ وتكەن ەدى. جانتۇرشىگەرلىك جول اپاتىندا قازا تاپقان اكتريسا شولپان ەلگەزەكوۆا مەن ونىڭ قۇربىسى دينارا حاميتوۆا جانە تاكسي جۇرگىزۋشىسىنىڭ تۋىستارى اپاتقا كىنالى دۇنگەن ازاماتىن سوتقا بەرىپ، تەرگەۋ جۇمىستارى ءبىر ايدان اسا ۋاقىت جۇرگىزىلىپ، جاقىندا ونىڭ سوتى باستالىپ، بۇگىن اياقتالدى.