ۋكراينادا پرەزيدەنتتىك سايلاۋ جاقىنداعان سايىن پەتر پوروشەنكو دا ءوز ىشىنەن گورى سىرتقى قولداۋشىلارىنىڭ ىقىلاسىن قاجەت ەتە باستاعانداي. وسى اپتادا ول بۇۇ باس اسسامبلەياسىندا سويلەگەن سوزىندە «رەسەي كەز كەلگەن ۋاقىتتا ۋكرايناعا سوققى بەرۋگە دايار ەكەندىگىن» ءمالىم ەتتى.
–ورىستار ۋكرايناعا كەڭ اۋقىمدا كەز كەلگەن ۋاقىتتا سوققى بەرۋگە دايار تۇر. جالپى ايتقاندا، قازىرگى كەزدە رەسەي-ۋكراينا شەكاراسىندا ورىستاردىڭ 87 مىڭ اسكەرى تۇر. سونىمەن قاتار، رەسەيدىڭ زاڭسىز تۇردە قارۋلانعان 35 مىڭ سودىرلارى ۋكراينا تەرريتورياسىندا اسكەري قيمىل كورسەتە الادى. سوندىقتان ورىستارمەن بولۋى مۇمكىن سوعىسقا ءبىز دايار بولۋىمىز كەرەك جانە حالىقارالىق قوعامداستىق تا كومەك كورسەتۋى ءتيىس،–دەپ مالىمدەدى پەتر پوروشەنكو بيىك مىنبەردەن.
جالپى ۋكراين پرەزيدەنتىنىڭ ايتىپ وتىرعانى بۇل ءبىرىنشى رەت ەمەس. وسىعان دەيىن ول نەمىس تەلەارناسىنا بەرگەن سۇحباتىندا «رەسەي بەرديانسك مەن ماريۋپولعا باسىپ كىرۋى مۇمكىن. ويتكەنى بۇل ەلدىمەكەندى باسىپ العان جاعدايدا قىرىمعا قاراي قۇرلىق اسكەرلەرى ءۇشىن ءدالىز اشىلادى. رەسەيدىڭ بولاشاقتا كوزدەگەن ماقساتى دا وسى» دەگەنى بەلگىلى.
ال رەسەيدىڭ ۋكراين شەكاراسى ماڭىندا اسكەر شوعىرلاندىرىپ جاتقانى راس پا؟ بۇل رەتتە ۋكراينا پرەزيدەنتى وبسە باقىلاۋشىلارى جيناعان دەرەكتەردى دە مىسالعا كەلتىرەدى. وندا ورىس اسكەرلەرىنىڭ ۋكراين شەكاراسى ماڭىنا اسكەرلەرىن شوعىرلاندىرىپ جاتقانى ايتىلعان. شىندىعىندا سولاي ما، جوق پا، ول جاعى بەلگىسىز. ءبىراق ورىستارمەن اراداعى قاتىناس وڭباي تۇرعانى ول ەندى اقيقات.
بۇۇ باس اسسامبلەياسىنىڭ مىنبەرىندە ءسوز سويلەگەن پەتر پوروشەنكو «وسىعان بايلانىستى بۇۇ قاۋىپسىزىدك كەڭەسىندە رەسەيدى داۋىس بەرۋ قۇقىنان ايىرۋ كەرەك» دەپ ەسەپتەيدى.
ارينە، پوروشەنكونىڭ جانايقايىن ءتۇسىنۋ دە كەرەك شىعىر. 2014 جىلدان بەرى ەكى ەل اراسىنداعى قارىم-قاتىناس ۋشىقتى. رەسەي قىرىمدى اننەكسيالادى، دونباسس اۋماعى ۋكراينانىڭ بيلىگىنە باعىنباي تۇر. ارا قاتىناستى جاقسارتۋ، مامىلەگى كەلۋ تۋرالى «مينسك كەلىسىمى» جۇمىس ىستەمەي قالدى. ەندى قايتپەك كەرەك؟
31 ناۋرىزدا ۋكراينادا –پرەزيدەنتتىك سايلاۋ. پەتر پوروشەنكوعا تاعى دا تاقتا قالۋى كەرەك. ونىڭ باستى باسەكەلەسى – «باتكوۆششينا» پارتياسىنىڭ باسشىسى يۋليا تيموشەنكو. كىم جەڭەدى؟ ونى ۋاقىت كورسەتەدى.
