سوڭعى كەزدە، شامامەن، ءبىر جىل كولەمى بولدى-اۋ، ءسىرا، وسىنداي گۇل قونجىقتار كۇللى الەمدە قاپتاپ كەتتى! ءوزى ەرەكشە! نازىك جاندىلاردىڭ كوڭىل قىلىن شەرتەر تاپتىرماس سىيلىق! ال، ءبىراق ءدال وسى قارا لەنتالى، كوزسىز، گۇلدى قونجىقتاردى قىتايدا و دۇنيەلىك بولعان بالالاردىڭ قابىرىنە قوياتىنىن ەستىپ پە ەدىڭىز؟ ءيا، قابىرگە قويادى! ءارى كىشكەنتاي بالانىڭ!

"فلوريستەر فواميران گۇلدەرىنەن جاسالعان سۇيكىمدى قونجىقتاردىڭ نەگىزگى «مىندەتى» - ەرتە كەتكەن بالاقايلاردىڭ ءقابىرىن كۇزەتۋ ەكەنىن بىلمەگەن دە شىعار. "سوڭعى 1-2 اپتا ىشىندە ءدال وسى قونجىقتاردى جەرلەۋ راسىمىندە سىيلايدى" دەگەن اقپارات عالامتوردى شۋلاتىپ جىبەردى. راسىمەن دە سولاي ما؟ ەندەشە، سولاي ويلاتىنداردىڭ دالەلىن كەلتىرەيىك.

1.قونجىقتىڭ كوزى، اۋزى جوق.

2.موينىندا قارا لەنتا بايلانعان.

3.اقپاراتتى كەيبىر فلوريستەر راستاپتى.

4.عالامتورعا «جەرلەۋ راسىمىنە ارنالعان گۇلدى قونجىقتار» دەپ جازساڭىز، بىردەن وسى قونجىقتار شىعادى.

"ال، ەندى ول جاي عانا باسەكەلەستەردىڭ قيتۇرقى ارەكەتى" دەپ، بۇل اقپاراتتى جوققا شىعارعانداردىڭ ناقتى دالەلدەرىن كەلتىرسەك.

1. كەيبىر فلوريستەر بۇل اقپاراتتى راستامادى.

2. جۇڭگو سالت-داستۇرىندە گۇلدەن جاسالعان قونجىقتار تۋرالى ءبىر دە ءبىر جەردە جازىلماعان، ايتىلماعان. جەرلەۋ راسىمىنە اكەلەتىن جان-جانۋارلاردىڭ ءبارى دە جۇڭگو كۇنتىزبەسىنە ساي. ول تىزىمگە قونجىق كىرمەيدى. ەگەر الدەبىر قىتايلىق دوسىنىڭ قابىرىنە جانۋاردىڭ ءمۇسىنىن اكەلگىسى كەلسە، وندا ول تەك مارقۇمنىڭ تۋعان جىلىنا ساي جانۋاردى الىپ كەلەدى.

3.قىتايدا قايعىنى بىلدىرەتىن ءتۇس – اق ءتۇس.

4.قارا لەنتاداعى «Happy everyday»  دەگەن جازۋ «ءارقاشان باقىتتى» دەگەن ماعىنانى بىلدىرەدى، ياعني، «كۇندە باقىتتى» دەگەن ءسوز." (دەرەككوز: semicvetic.com)

دەمەك، بۇل ەشقانداي دا جەرلەۋ راسىمىنە ارنالعان قونجىق ەمەس. جاي عانا ادەمى سىيلىق ءتۇرى. تالعامعا تالاس جوق. مۇنى دا ەرەكشە ۇناتاتىن "جانكۇيەرلەر" بارشىلىق. 

عالامتوردان قازاقستان بويىنشا ىزدەسەڭىز، نەشە ءتۇرىن تابا الاسىز. باعاسى كولەمىنە بايلانىستى. 2000-2500-دەن باستالادى.

مىسالى، شامامەن:
25 سم - 9.900 تەڭگە.
40 سم - 14.900 تەڭگە.
60 سم - 26.900 تەڭگە.
70 سم - 42.900 تەڭگە.

ءتۇسى دە سان الۋان. قالتاڭىز قالىڭ بولسا، قاندايىن قالاساڭىز دا، تابىلادى. ناقتى قاي جەردەن الاتىنىڭىزعا بايلانىستى. قارا بازاردا، ءسوزسىز، ارزان. ال قالا ىشىندە، ارنايى ورىنداردى اناعۇرلىم قىمباتتاۋ بولادى. تاڭداۋ سىزدە.

نەگىزى مەن بۇل سىيلىقتى الاتىن ادامداردى دا تۇسىنبەيمىن. قولونەرمەن اينالىساتىندىقتان، باسىندا قىزىعۋشىلىق تانىتتىم. ءتىپتى، جاساعىم كەلدى. ماتەريالدارى دا قولجەتىمدى. ەسەسىنە، ءبىراز تابىس تابۋعا بولاتىن سياقتى.

ءبىراق مەنى توقتاتقان مىنا وي بولدى. بىرىنشىدەن، مۇنىمەن نە ىستەۋگە بولادى؟ شىن گۇل ەمەس، ءيىسى جوق. نە ءتاتتى ەمەس، جەپ، راحاتتاناتىن. نە جۇمساق ويىنشىق ەمەس، جاستانىپ جاتاتىن. ەكىنشىدەن، تۇك پايداسى جوق زاتقا سونشا اقشا شىعارىپ ساتىپ الاتىن ادامدارعا وبال عوي. تابىسى بەكەرگە كەتەدى. دەمەك، مەنىڭ دە تابىسىمدا بەرەكە بولمايدى. ودان دا ونىڭ ورنىنا جەيتىن، نە پايدالاناتىن بىرنارسە السا... تىم قۇرىعاندا، ۋاقىت وتە كەلە سولىپ قالاتىن ءتىرى گۇل بولسا دا. ول دا ءبىراز ۋاقىت يىسىمەن، تۇرىمەن اينالاسىنا ادەمىلىك سىيلاپ تۇرماي ما؟ ال مىنا قونجىقتاردى ءبىر كورگەندە «پاھ، شىركىن!» دەيسىڭ، سوسىن ارى كەتسە بىرنەشە رەت سۋرەتكە تۇسەسىڭ، الەۋمەتتىك جەلىگە سالۋ ءۇشىن. بولدى. سوسىن شاڭ باسىپ تۇرادى. سونى ويلادىم دا، "جاسامايمىن" دەپ تۇبەگەيلى شەشىم قابىلدادىم. باستىسى – نيەت. كىمگە، نە سىيلاساڭ دا، نيەتىڭ ءتۇزۋ بولسا بولعانى...

ايتپاقشى، وسىنداي قونجىق العان نازىك جاندىلارعا ءبىر كەڭەس. ۋاقىت وتە كەلە قونجىقتىڭ «ءمانى» كەتە باستاعاندا، گۇلدەرىن الىپ، اينانىڭ شەتىنە ەرنەۋ قىلىپ جابىستىرىپ، باسقا تاعاتىن اشەكەي جاساپ، رەزەڭكەگە تىگىپ، ءتىپتى بولماسا، اياق كيىم جاشىگىن تۇگەلدەي وسى قونجىقتىڭ گۇلدەرىمەن قاپتاپ تاستاساڭىز، ىشىنە اساي-مۇسەي سالۋعا ارنالعان كەرەمەت جاشىك بولىپ شىعا كەلەدى. سولاي...

ۇسىنعان: ماقپال سەمباي