استانالىق كاسىپكەر قالا شەتىندە بولمە جالداپ وتىرعان كوپبالالى انا جانار ۋزدەنبايەۆاعا 3 بولمەلى پاتەر سيلادى. قايىرىمدى جان انونيم قالعىسى كەلدى. بۇل تۋرالى جاڭا تۇرعىن ۇيلەردىڭ ءبىرىنىڭ Instagram جەلىسىندەگى پاراقشاسىندا جاريالاندى، - دەپ حابارلايدى Qamshy.kz اقپارات اگەنتتىگى Tengrinews.kz سايتىنىڭ دەرەگىنە سۇيەنىپ. 

كومپانيا وكىلدەرىنىڭ ايتۋىنشا، مۇنىڭ الدىندا شاعىن جانە ورتا بيزنەسى بار كاسىپكەر قىمبات كولىك ساتىپ العالى جۇرگەن. ءبىراق ءورت شىققان وقيعادان كەيىن ليۋكس اۆتوسالوننان جينالعان 17 ميلليون تەڭگەسىن قايتارىپ الىپ، ولاردى قۇرىلىس كومپانياسىنىڭ ساتۋ بولىمىنە الىپ كەلگەن. 

"بۇل سوما 3 بولمەلى پاتەرگە جەتپەيتىندىكتەن، كومپانيا ۇستىنە 7 ميلليون تەڭگە قوسىپ، ۋزدەنبايەۆتار كوكتەمدە دايىن تۇرعىن ۇيگە كوشە الۋ ءۇشىن جوندەۋ جۇمىستارىن دا موينىنا الدى"، - دەپ ناقتىلادى كومپانيا وكىلدەرى.⠀

"بۇل جاڭالىقتى حابارلاعاندا سەنبەدىم. ءتۇس دەپ ويلادىم. ال ساتۋ بولىمىنە اپارعاندا (...)، قۋانىشىمدا شەك بولمادى. بارىنەن قىزدارىم باقىتتى. ەندى ولاردا ارمانداعانداي ءوز بولمەسى بولادى. بارلىعىنا كوپ راحمەت"، - دەيدى جانار ۋزدەنبايەۆا كوز جاسىن تيا الماي. 

ايتا كەتكەن ءجون، ايەل جالعىز ءوزى التى بالا تاربيەلەپ وتىر. كۇيەۋى 2015 جىلى جانار ەڭ كىشى بالاسىنا جۇكتى بولعاندا قايتىس بولعان. وسىدان كەيىن ول 85 مىڭ تەڭگەگە 1 بولمەلى تۇرعىن ءۇي جالداپ تۇرۋعا ءماجبۇر بولعان. 

جارتىسىن اپكە-قارىنداستارى تولەۋگە كومەكتەسكەن. ايەلدىڭ تۇراقتى جۇمىسى جوق، سەبەبى ەڭ كىشىسى نەبارى 3 جاستا. ول اي سايىن بالالارى ءۇشىن 78 000 جانە 28 000 تەڭگە الەۋمەتتىك كومەك الادى. ءبىراق بۇل جەتكىلىكسىز، - دەيدى "كۇمىس القا" مەدالىنىڭ يەگەرى، - سەبەبى قاراجاتتىڭ كوبى ءبىر بالانىڭ كورۋ قابىلەتىن تۇزەتۋگە جانە ەكىنشىسىنىڭ سويلەۋىن دامىتۋعا جۇمسالادى. اكەسى قايتىس بولعاننان كەيىن بالا سويلەمەيدى"، - دەلىنگەن جاريالانىمدا.

ۇسىنعان: نازەركە لابيحان