بۇگىندە الەمگە مارتەبەلى مەملەكەت رەتىندە تانىلعان قازاق ەلىنىڭ تاريحى تەرەڭ، مادەنيەتى ماۋەلى، ءداستۇرى قالىپتاسقان ەل ەكەنى وسكەلەڭ ۇرپاقتىڭ ساناسىنا ءسىڭىرىپ، جادىندا جاتتاتۋ – بارشامىز ءۇشىن ۇلكەن جاۋاپكەرشىلىك.  ەلباسى ءوزىنىڭ «ۇلى دالانىڭ جەتى قىرى» اتتى تاريحي ەڭبەگىندە وسى ۇلى باعىتتاردى ايقىنداپ بەردى.

كەشە استانادا تانىستىرىلىمى وتكەن «التىن تاق» ءفيلمىن تاماشالاعاننان كەيىن ءبارىمىزدىڭ بويىمىزدا ەرەكشە رۋحاني سەرپىلىس پايدا بولدى. بۇعان دەيىن قازاق حاندىعىنىڭ 550 جىلدىعىنا ورايلاستىرىلىپ تۇسىرىلگەن «الماس قىلىش» ءفيلمىنىڭ زاڭدى جالعاسى بولىپ تابىلاتىن بۇل تۋىندىنى كورگەننەن كەيىن شىن مانىندە دۇنيەگە قازاق بوپ تۋعانىڭدى ماقتانىش ەتەدى ەكەنسىڭ. مادەنيەت جانە سپورت ءمينيسترى ارىستانبەك مۇحامەدي ۇلىنىڭ تىكەلەي جەتەكشىلىگىمەن سوڭعى 4 جىل كولەمىندە تۇسىرىلگەن بۇل ءفيلمدى الەمدىك كينو ونەرىنە قوسىلعان بىرەگەي شىعارما دەپ باعالاۋعا بولادى. قازاق حاندىعىنىڭ ىرگەسىن قالاعان ۇلى حاندار كەرەي مەن جانىبەكتىڭ سوڭىنان ەرگەن الاش ۇلىسىن شاشىراتىپ جىبەرمەي، ۇلتتىڭ بىرلىگىن ساقتاپ، سىرتقى جاۋعا قايمىقپاي قارسى تۇرىپ، بۇگىنگىدەي ۇلان-بايتاق دالامىزدى قورعاپ، قازىرگى ۇرپاققا امانات ەتىپ قالدىرعانى فيلم جەلىسىندە بارىنشا شەبەرلىكپەن اشىپ كورسەتىلەدى. فيلمدەگى اكتەرلەردىڭ وتە  جوعارى دەڭگەيدەگى ويىنىن، 15-عاسىرداعى قازاق حالقىنىڭ تۇرمىس-سالتىن كوز الدىڭا كەلتىرەتىن دەكوراسيانى، تاريحي شىتىرمان وقيعالارمەن ورىلگەن سيۋجەتتى – تۋىندىنىڭ باسىە بيىكتەتكەن جەتىستىكتەرىنىڭ قاتارىنا ەنگىزۋگە بولادى. اسىرەسە، قازاقتىڭ بايىرعى استاناسى سىعاناق قالاسىن شايبانيدتەردەن قايتا الىپ، مەملەكەتتىلىكتىڭ سيمۆولى التىن تاقتى قايتارۋى  ءبىزدىڭ ماڭگىلىك ەل بولۋداعى اسقاق مۇراتىمىزعا جەتۋ جولىنداعى تاريحي كۇرەستەردىڭ ايشىقتى كورىنىسى دەۋگە بولادى.

فيلم كورسەتىلىمىنەن كەيىن جۇرتشىلىق الدىنا شىققان رەجيسسەر رۇستەم ابدىراشيەۆ، سەناريي اۆتورى، بەلگىلى جازۋشى سماعۇل ەلۋبايەۆ، ءماجىلىس دەپۋتاتى، قوعام قايراتكەرى بەكبولات تىلەۋحان بۇل كينوتۋىندى «تار جول تايعاق كەشىپ» بۇگىندە ەڭسەسى بيىك ەلگە اينالعان قازاق ۇلتىنىڭ رۋحاني شەجىرەسى ەكەنىن اتاپ ءوتىپ،  وسى جوبانى ازىرلەۋگە باستاما جاساعان ەلباسىنا جانە ءتۇسىرىلىمىن تىكەلەي ۇيلەستىرگەن مادەنيەت جانە سپورت مينيسترلىگىنە العىستارىن ايتتى. «التىن تاق» ءفيلمى ۇلتتىق رۋحىمىزدىڭ تاعى ءبىر جەمىسى مەن جەتىستىگى دەپ اۋىز تولتىرىپ ايتا الامىز.

بەرىك ءابدىعالي ۇلى