فيليپپين باتىرى مەنني پاكياو كاسىپقوي بوكستان 8 سالماق دارەجەسىندە الەم چەمپيونى اتانعان جەر شارىنداعى ازىرگە جالعىز بوكسشى. بۇل سپورتشى 1998-2018 جىلدارى WBO، IBF، WBC، WBA، TYE RING تۇجىرىمدارى بويىنشا دۇنيە جۇزىندە الدىنا جان سالماي تۇردى. بۇل ايتۋعا عانا وڭاي. مۇنداي اسقارالى بەلەسكە جەر جۇزىندە ساۋساقپەن سانارلىق بوكسشى عانا جەتۋى مۇمكىن. ال مەننيدىڭ سەگىز سالماقتاعى چەمپيوندىق رەكوردى جاقىن ارادا بۇزىلا قويۋى ەكىتالاي.

پاكياو سالعان پاكمان ۆيللاج اۋىلىنىڭ ۇيلەرى

بالالىق شاعىندا جوقشىلىق  تاۋقىمەتىن تارتقان پاكياو بوزبالا كەزىندە اقش-قا جالاڭاياق بارىپ، كاسىپقوي بوكستىڭ سوڭىنا تۇسەدى. سودان باعى جانىپ، بەس قۇرىلىققا كەڭىنەن تانىمال بولدى. مەنني پاكياو رينگتەن تاپقان اقشاسىن بىرەۋلەر ءتارىزدى جامباسىنا باسىپ، جاتىپ العان جوق. ساقي جىگىت ءوزىنىڭ تۋعان اۋىلى تانگوداعى 1000 كەدەي وتباسىنا تۇرعىن ءۇي سالىپ بەردى. بۇعان قوسا پاكياو اۋىلداستارى ءۇشىن اشىق جانە جابىق سپورت الاڭىن، كوپشىلىككە ارنالعان ساياباق، كوپ فۋنكسيونالدى ورتالىق  تۇرعىزىپ بەرىپتى.

مەنني ايقاس ۇستىندە

«بولار بالا بوعىنان» دەيدى اتام قازاق. پاكياو بالا كەزىندە تاڭعى ساعات تورتتە ويانىپ، جۇگىرۋگە شىعادى ەكەن. ون ەكى جاسىنان توقاش ساتىپ، ءناپاقاسىن ەڭبەگىمەن تاۋىپ داعدىلانعان مەنني ءقازىر فيليپپين پارلامەنتىنىڭ دەپۋتاتى. وسى ەلدەگى ەڭ بەدەلدى ادامنىڭ ءبىرى. «مەملەكەتتىك قىزمەتكەر رەتىندە نە ءبىتىردىڭ، دەگەن ساۋالعا ءۇن قاتپاعانىم ءۇشىن سىنعا ۇشىرادىم. ەلىم ءۇشىن نە ىستەگەنىمدى جاريا قىلىپ ەدىم، تاعى دا سىننىڭ استىندا قالدىم»، دەيدى مەنني پاكياو. جالپى، بۇل جالعاندا ادام بالاسىنىڭ كوڭىلىن تابۋ قيىننىڭ قيىنى.

ءبىر جولى وركوكىرەكتەۋ قارسىلاسى: «مەن سەنەن كۇشتىمىن! ەكپىنىمە شىداۋىڭ وڭاي بولماس»، دەدى وكتەم داۋىسپەن. سوندا مەنني پاكياو سابىرلى قالپىن بۇزباي، ءۇنى ءدىرىل قاقپاستان اقىرىن عانا: «كەۋدەسىن ءجونسىز كوتەرگەن ادامدى قۇداي ساباسىنا تۇسىرەدى. ال اقىلمەن سويلەپ، جونىمەن جۇرگەن ادامدى كوككە كوتەرەدى»، دەدى. تۇسىنگەن ادامعا وسى ءبىر اۋىز ءسوزدىڭ وزىنەن پاكياونىڭ كىم ەكەنى كورىنىپ تۇرعان جوق پا؟!

قىدىربەك رىسبەك