27-28 اقپان كۇندەرى ۆەتنامنىڭ استاناسى حانويدا اقش پەن سولتۇستىك كورەيا پرەزيدەنتتەرى كەزدەستى. بۇل بەتپە بەت جۇزدەسۋدەن بارلىق الەم ءبىر جىلىلىق كۇتكەن. الايدا ۆەتنامداعى كەزدەسۋ ەشقانداي ناتيجە بەرگەن جوق. اقىرىندا ەكى جاقتىڭ دەلەگاسياسى قاتىسقان سامميتتە  پرەزيدەنتتەر ەشقانداي قۇجاتقا قول قويماي تاراستى. بۇل تۋرالى اق ءۇيدىڭ باسپا ءسوز حاتشىسى سارا سوندەرس ءمالىم ەتتى.

وسىدان بىرەر جىل بۇرىن اقش پەن سولتۇستىك كورەيا پرەزيدەنتتەرىنىڭ سينگاپۋردە ءبىرىنشى ءسامميتى وتكەنى بەلگىلى. ەندى مىنە سەگىز ايدان كەيىنگى جۇزدەسۋ دە ەش ناتيجە بەرمەدى.

–اقش جاعى تالاپ ەتكەن ماسەلەلەرگە سولتۇستىك كورەيا دايىن بولماي شىقتى،–دەپ جاۋاپ بەردى بۇعان قاتىستى اق ءۇيدىڭ باسپا ءسوز حاتشىسى سارا سوندەرس.

ال اقيقاتىن ايتار بولساق، بۇل قانداي ماسەلە؟  اقش تاراپى و باستان سولتۇستىك كورەيانى يادروسىز مەمەلەكەتكە اينالدىرۋدى كوزدەدى. ءبىراق يادرولىق شوقپارى بار مەملەكەت ترامپتىڭ ىڭعايىنا كونە قويسىن با؟

اقش پرەزيدەنتى دونالد ترامپ «بۇل كەزدەسۋ ناتيجەلى بولدى» دەپ قايتالاپ ايتقانىمەن، ساراپشىلار ونىڭ جەمىستى وتكەنىنە كەلىسپەيدى. سولتۇستىك كورەيادان پويىزبەن حانويعا كەلگەن كيم چەن ىن ءوز ەلىنىڭ يادروسىز مەملەكەتكە اينالۋى قالامايتىنىن دا اشىپ ايتقان. بۇل ماسەلە بۇرىننان دا بەلگىلى.

–بۇل سالادا ءبىز ۇلكەن پروگرەسكە جەتتىك. ءبىراق اقش تاراپى ءۇشىن ۇلكەن ناتيجەلى كەزدەسۋ بولا قويعان جوق. كيم چەن ىن بۇعان دايىن بولماي شىقتى. دەگەنمەن، ءالى دە جۇزدەسۋلەر جالعاسادى، –دەپ مالىمدەدى اق ءۇيدىڭ باسپا ءسوز حاتشىسى سارا سوندەرس.

ءتىپتى دونالد ترامپ پەن كيم چەن ىن جەكە كەزدەسكەندە دە، ەرتەڭىنە كەڭەيتىلگەن قۇرامداعى جۇزدەسۋدە دە ەكى جاق ەشقانداي كەلىسىمگە كەلە المادى. وسى ۋاقىتقا دەيىن سولتۇستىك كورەياعا وراسان زور سانكسيا سالىپ كەلگەن اقش بۇل جولى تاعى دا ولاردى قىسىمعا الا ما، جوق پا، ول جاعى دا بەلگىسىز كۇيىندە قالدى. سوعان قاراعاندا، كورەي تۇبەگىندەگى كۇردەلەنگەن جاعداي سول كۇيىندە قالا بەرەتىن سياقتى. دەگەنمەن، كەزدەسۋدەن كەيىن اقش پرەزيدەنتى دونالد ترامپ سولتۇستىك كورەيانى يادروسىز ەلگە اينالدىرۋ ماسەلەسى كۇن تارتىبىندە قالا بەرەتىنىن ايتتى.

–ءبىز سولتۇستىك كورەيانى يادروسىز ەلگە اينالدىرعىمىز كەلەدى. پحەنيان ەڭ مىقتى ەكونوميكالىق ەلدىڭ استاناسى بولۋى ءتيىس. مۇنى كيم چەن ىن دا ءتۇسىنىپ وتىر. بۇل رەتتە بىزگە جۇڭگو، جاپونيا، وڭتۇستىك كورەيا مەن رەسەيدىڭ كومەگى كەرەك،– دەپ مالىمدەدى دونالد ترامپ.

راسىندا دا جۇڭگو مەن رەسەي سولتۇستىك كورەيانىڭ يادروسىز مەملەكەتكە اينالۋىن قۇپتامايدى. رەسەي سىرتقى ىستەر ءمينيسترى سەرگەي لاۆروۆتىڭ ويىنشا، «ەگەر بۇلاي بولا قالعان جاعدايدا، سولتۇستىك كورەيانىڭ قاۋىپسىزدىگىنە بۇكىل مەملەكەتتەر كەپىلدىك بەرۋى ءتيىس. ءبىراق بۇل سەنىمسىز نارسە».

–رەسەيدىڭ سولتۇستىك كورەيامەن 28 ميل قاشىقتىقتا شەكارالىق شەكتەسۋى بار. مۇنىڭ ءوزى كوپ نارسەنى بايقاتادى. ءبىزدىڭ ويىمىزشا، پحەنيان رەسەيدەن كوپ كومەك الىپ وتىر. ءبىراق جاعدايدى رەتتەۋگە رەسەي بارىنشا اتسالىسىپ وتىرعان جوق. ال  سولتۇستىك كورەيا ەلگە كەرەك-جاراقتىڭ ءبارىن قىتايدان الادى. ماسەلەنى شەشۋگە قىتايدىڭ مۇمكىندىگى دە وتە ۇلكەن. سوندىقتان ءتۇيىننىڭ تەزىرەك شەشىلۋى ەڭ الدىمەن اتالعان ەكى ەلگە بايلانىستى، – دەپ اتاپ ءوتتى اق ءۇيدىڭ باسپا ءسوز حاتشىسى سارا سوندەرس.