كونگو ازاماتشاسى مونيكا كامۋكەندج كامگانزا ەكسپو-2017 كەزىندە قازاقستانعا كەلىپ، قازاقتان ءسابي ءسۇيىپ، وسىندا قالۋ ءۇشىن بارىن سالىپ جاتىر. ناۋرىز ايىنىڭ باسىندا افريكالىق ايەلگە بوسقىن مارتەبەسىن بەرە مە، الدە وتانىنا قايتارىپ جىبەرە مە – بەلگىلى بولادى. ءقازىر ايەل قىزى بلەسسينگ-ماشامەن بىرگە انا ۇيىندە تۇرادى دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ. 

جاڭا ءومىر

ەلوردالىق انالار ۇيىندە مونيكا مەن قىزىنان باسقا 16 انا مەن بالا تۇرادى. ەكى قاباتتى ءزاۋلىم ءۇيدىڭ تۇرعىندارىنىڭ ءبارى تاعدىر تالكەگىنە ۇشىراعان جاندار. ءبىراق ءارقايسىسى بۇل ءۇيدى التى اي عانا پانالاي الادى.

مەكەمەنىڭ ءوز ءتارتىبى بار ەكەن. تاڭعى توعىزدا ۇيقىدان تۇرىپ، تاڭعى اس ىشەدى، كەيىن انالار بالالارىمەن سەرۋەنگە شىعادى، سودان سوڭ تۇسكى اس ءىشىپ، بالالاردى ۇيىقتاتادى. ءارى قاراي اقىل-ويدى دامىتاتىن ويىندار ويناتىپ، ساعات 11-گە دەيىن كەشكى اس ءىشىپ، ۇيقىعا جاتادى. ءۇي تۇرعىندارى كەزەكتەسىپ اس ازىرلەيدى، ءۇي جينايدى. سونىمەن بىرگە، انالار مەن بالالاردى كۇن سايىن مەدبيكەلەر مەن پسيحولوگتار باقىلاپ وتىرادى ەكەن.

ماماندار مەن حالىقتىڭ قولداۋى ءبىزدىڭ كەيىپكەرىمىزگە جاقسى كومەكتەسكەن. ءبىرىنشى سۇحباتتان بەرى ءتورت اي ءوتتى. مونيكا قاتتى وزگەرىپ كەتىپتى: ۇزىن، ورىلگەن شاشىن قيىپ، ارتىق سالماقتان ارىلعان. ەڭ باستىسى، ول بۇرىنعىداي قايعى-مۇڭعا بەرىلىپ، كوز جاسىن كولدەتپەيدى.

"بۇرىن ۇنەمى كۇيزەلىپ جۇرەتىنمىن، ءبارىن ويلاپ ۋايىمدايتىنمىن. ءقازىر جاناشىر ادامداردىڭ قامقورلىعىن سەزىنىپ، جامان ويدان بويىمدى اۋلاق ۇستايمىن، قازاقستاندا قالۋىما رۇقسات بەرەدى دەپ سەنەمىن"، - دەيدى مونيكا.

وسى ازعانتاي ۋاقىت ىشىندە افريكالىق ايەل تىلدەردى دە مەڭگەرىپ قالىپتى. ءقازىر قازاقشا، ورىسشا جاقسى تۇسىنەدى، بىلگەنىنشە جاۋاپ بەرەدى.

كىشكەنتاي بلەسسينگتىڭ العاشقى ءسوزى "دا" بولۋى دا تاڭعالارلىق جايت ەمەس. بوبەك "نە بولدى، ماشا؟" دەپ سۇراسا، كادىمگىدەي ىم-يشارا تانىتىپ، جاۋاپ بەرگەندەي بولادى.

كونگولىق ايەل قازاقستاندىق كەلىنشەككە اينالدى

قازاقستاندا جۇمىس ىستەۋگە رۇقسات جوق بولسا دا، مونيكا قول قۋسىرىپ وتىرعان جوق. قازاقستاندىقتار اراسىندا كەڭ تارالعان تاعام تۇرلەرىن ازىرلەۋدى ۇيرەنىپتى. اسىرەسە ءارتۇرلى كوجە مەن پالاۋدى ءدامدى پىسىرەدى.

ءقازىر مونيكا مەن بلەسسينگكە قۇجاتتاردى رەسىمدەۋ ءۇشىن كومەك كورسەتىلىپ جاتىر. "قورعاۋ استانا" قورى مەن ادام قۇقىعى بيۋروسىنىڭ زاڭگەرلەرىنىڭ ارقاسىندا بلەسسينگ-ماشا تۋۋ تۋرالى كۋالىك الىپتى. 16 جاسىندا قازاقستان ازاماتىنىڭ ءتولقۇجاتىن جاساتا الادى.

ءبىراق مونيكانىڭ قۇجاتتارىن جاساۋ قيىنعا سوعىپ تۇر. ىشكى ىستەر مينيسترلىگى بوسقىن مارتەبەسىن بەرۋدەن باس تارتقان، ءقازىر بۇل شەشىمگە تۇسىرىلگەن شاعىم قارالىپ جاتىر. 8 ناۋرىزدان كەيىن كونگولىق ايەلدىڭ تاعدىرى شەشىلەدى. تاعى باس تارتىلسا، جوعارى سوتقا ارىز بەرە الادى.

جاس انانىڭ اڭساعان ارمانى

افريكالىق ايەل قۇجاتتارىن رەسىمدەپ، جۇمىسقا شىعۋدى ارماندايدى. ءبىراق ەندى مەرەكەلىك شارالاردا بي بيلەپ، ءناپاقا تابۋدى ويلاپ جۇرگەن جوق. مونيكا بولاشاقتا اسپاز نەمەسە بالا كۇتۋشى بولعىسى كەلەدى.

ءقازىر مونيكا مەن قىزى ەڭ قاجەتتى زاتتارعا مۇقتاج. ايەلدىڭ تابىس تابۋعا زاڭدى قۇقىعى جوق بولعان سوڭ، قايىرىمدى قازاقستاندىقتار كيىم-كەشەك، بالانىڭ كۇتىمىنە قاجەتتى كەرەك-جاراقپەن قامتاماسىز ەتىپ وتىر.

مونيكا كونگوداعى تۋىستارىمەن اراقاتىناسىن ۇزگەن. ءبىراق تىلشىلەردىڭ ارقاسىندا تۋىستارى ءبارىن ەستىپ ءبىلىپتى. ال ءسابيىنىڭ اكەسى بۇل وقيعانىڭ باق-تا كەڭ تارالعانىنا قاراماستان مونيكامەن حابارلاسپاعان.

افريكالىق ايەل قازاقستانعا قالاي تاپ بولدى

27 جاستاعى كونگولىق قىز استاناعا ەكسپو-2017 كەزىندە جۇمىس ىستەۋگە كەلگەن، الايدا قازاقستاندا ءجۇرىپ-تۇرۋىنا رۇقسات بەرەتىن قۇجاتتاردى جاساتۋدى قيىندىققا تاپ بولادى. ءسويتىپ جۇرگەندە، ايەل قازاقتان ءسابي ءسۇيىپ، نارەستەسى ەكەۋىنىڭ بارار جەر، باسار تاۋى قالماي، شاراسىز كۇيگە تۇسكەن.

جاناشىر ادامدار مونيكانىڭ بوسانۋىنىڭ اقىسىن تولەپ، افريكالىق ايەل بلەسسينگ ەسىمدى قىزىمەن "قورعاۋ استانا" قورىنىڭ قامقورلىعىندا بولادى. 2019 جىلدىڭ باسىنان بەرى انا مەن بالا ەلوردالىق انا ۇيىندە تۇرىپ جاتىر.

ۇسىنعان: اسەل بولات قىزى