نازارلارىڭىزعا مەنىڭ ءبىر تانىسىمنىڭ وقيعاسىن ۇسىنباقپىن.

ءوزى باتىس قازاقستان وبلىسىنىڭ ارۋى، الايدا تاعدىردىڭ ايداعانى عوي، وڭتۇستىكتىڭ جىگىتىن ءسۇيىپ قالىپ، سوعان تۇرمىسقا شىقتى. ءقازىر ءبىر قىز ءوسىرىپ وتىرعان اتا-انا. كۇيەۋىنىڭ وتباسىمەن استانادا تۇرادى.

الگى تانىسىمنىڭ كەلىندىك ءومىرى قالاي ءوتىپ جاتىر دەيسىزدەر عوي: ۇيقىسىنان تاڭعى 5-تە تۇرادى دا، قايىن اتاسىنا، ەنەسىنە، كۇيەۋىنە جانە ونىڭ باۋىرىنا تاڭعى اس ازىرلەيدى. داستارحان جايناپ تۇرۋى ءتيىس: سامسا، قۋىرداق، شاي، نان، تاتتىلەر... ءبارى جاڭادان پىسكەن بولۋى ءتيىس. ول ءۇشىن كەلىن، ارينە، 1-2 ساعات بۇرىن ەرتە تۇرادى.

ءسويتىپ اتا-ەنەسىنەن وزگەسىنىڭ ءبارى جۇمىستارىنا اتتانادى. مەنىڭ تانىسىم ەكى جەردە جۇمىس ىستەيدى: كەڭسە تازالاۋشى ءارى مەيرامحانادا ىدىس جۋۋشى. جۇمىستان ۇيگە شارشاپ، قاجىپ قايتادى. ۇيىنە كەلەدى دە تاعى سول جۇمىسى باستالادى. تاماق ازىرلەۋ، ىدىس جۋۋ، ءۇي جيناۋ. ايتپاقشى، ۇيىندە نە كىر جۋۋ ماشينەسى، نە شاڭسورعىشى جوق. ءبارىن ءوز قولىمەن جۋادى. وتباسىندا وزگە ءبىر دە ءبىر جان ءۇي تىرشىلىگىنە ارالاسپايدى. كەشكە تاماقتانادى، شاي ىشەدى، تەلەديدار قارايدى، ەرەر قاۋىمى فۋتبول تاماشالايدى، ەنەسى سەريال كورەدى. ال كەلىن بارىنە قىزمەت جاسايدى. وتباسىنىڭ ءاربىر مۇشەسىنىڭ ءار كيىمىن، سەنەسىزدەر مە، ءتىپتى ءىش كيىمىن دە قولىمەن جۋادى. كەپكەن سوڭ ۇتىكتەيدى، سورەلەرىنە جيناستىرادى. ال مۇنىڭ بارىنە تۇندە، تاماق ءىشىلىپ، ىدىس جۋىلىپ بولعان سوڭ كىرىسەدى. تاڭعى 5-تە قايتادان تۇرادى.

وسىعان قاراماستان كەلىننىڭ ورنى تومەندە، وتباسىنىڭ باقىتى، بەرەكەسى ءۇشىن تاڭنان كەشكە دەيىن شاپقىلاپ جۇرگەن تانىسىم وتباسى مۇشەلەرىنەن تومەن سانالادى. ماسەلەن، ول ۇستەل باسىندا وزگەلەردىڭ اڭگىمەسىنە ارالا المايدى. ءۇنسىز عانا شايىن ءىشىپ وتىرۋى ءتيىس. وتىراتىن ورنى، البەتتە، بوساعادا، ساماۋرىننىڭ جانىندا. ول اتا-ەنەسىنىڭ كوزىنە تىك قاراماۋى ءتيىس، ءتىپتى قايىندارىنىڭ دا... وتباسى توي-تومالاققا نەمەسە تابيعاتقا دەمالۋعا شىققاندا كەلىن ۇيدە قالادى. وعان دەمالۋعا بولمايدى، ءۇي شارۋاسىن قاداعالاۋى ءتيىس.

تانىسىمنان بىردە «نەگە قۇل سەكىلدى ءومىر ءسۇرىپ ءجۇرسىڭ، نەگە كۇرەسپەيسىڭ؟» دەپ. راس قوي، تۇرمىسقا شىعاردا، وسىنداي ءومىردى ارمانداماعان بولار؟ ءوز ەركىمەن ءوزىن قالايشا قۇلدىققا يتەرمەلەدى؟

«بىلمەمىن» دەيدى. ايتۋىنشا، بىردەن بۇلاي بولا قويماعان. جاڭا وتباسى كەلىنىن مۇنداي ومىرگە بىرتە-بىرتە ۇيرەتە باستاعان. ال ءقازىر شارۋاعا بويى ۇيرەنىپ تە قالىپتى. سەبەبى، قىزمەت ەتىپ جۇرگەن ادامدارى – ءوزىنىڭ وتباسى.

ءبىراق باسقاشا دا ءومىر سۇرۋگە بولادى عوي، ەركىن، وزگەلەرمەن تەڭ ايەل بولۋعا ۇمتىلۋ كەرەك قوي. ءتىپتى نە دەپ جاۋاپ بەرەتىنىن دە بىلمەيدى. ونىڭ ۇستىنە كۇيەۋىنىڭ ماحابباتىنا سەنەدى، ءوزى دە سۇيەمىن دەپ ويلايدى. نە بولماسا ءوز ويىنان ءوزى قورقادى: ءقازىر اجىراسىپ كەتسە، ەشقاشان تۇرمىسقا شىعا الماي قالادى، قوعامدا مارتەبەسى تۇسەدى، تانىستارى ءسوز ەتەدى. ەركىن ءارى جالعىز بولعانشا، ءوز وتباسىندا قۇل بولعانى ارتىق. مىنە، ونىڭ ويى – وسىنداي.

-ايتشى، - دەدىم ءتوزىمىم تاۋسىلعان مەن، - اتا-ەنەڭ جاستارى كەلىپ، ءبىر كۇنى ومىردەن وتەر، بالالارىڭ ەر جەتىپ، بوي جەتەر. سول كەزدە سەندە وسى ءداستۇردى جالعاستىراسىڭ با ؟ سەن دە كەلىنىڭدى قۇلشا جۇمسايسىڭ با؟

بۇل سۇراعىم دا جاۋاپسىز قالدى. سەبەبى ءوزىن ءبىر ءۇيدىڭ يەسىندەي سەزىنە المايدى ءالى.

ال نازىك قانا قۇربىمنىڭ سونداي قاتال، اياۋسىز بولىپ كەتەتىنىنە سەنە الماي مەن تۇرمىن.

مارات تولىبايەۆتىڭ Facebook-تەگى پاراقشاسىنان

ۇسىنعان: گۇلىم جاقان