«قازپوشتا» اق تولەم كارتالارىن ۇستاۋشىلار ءۇشىن post.kz ارقىلى تولەمدەرگە كوميسسيانى جويدى. بۇل تۋرالى «قازپوشتا» اق باسقارما ءتوراعاسى ساكەن سارسەنوۆ ءوزىنىڭ Facebook پاراقشاسىندا جازدى.

اتالعان جاڭالىق تۇتىنۋشىلار تاراپىنان تۋىنداعان پىكىرلەردەن سوڭ جۇزەگە اسقان.

«مەن پوشتا بولىمشەلەرىنە كەلىپ، وندا كەزەككە تۇرىپ كوممۋنالدىق نەمەسە سالىق تولەمدەرىن جاساۋدى ۇناتپايتىن ادامداردىڭ پىكىرىن جەلىدە ءجيى كورەم. ونداي ونلاين قىزمەت الۋعا ۇيرەنگەن ءموبيلدى ازاماتتارىمىز ءۇشىن post.kz پورتالىن ىسكە قوسىپ دامىتىپ جاتقانىمىزدى ايتقىم كەلەدى»، – دەيدى س. سارسەنوۆ.

وسىلايشا، تولەم كارتالارىن قولداناتىن پوشتا تۇتىنۋشىلارى post.kz ارقىلى زەينەتاقى جارنالارىن، مىندەتتى مەديسينالىق ساقتاندىرۋ جارنالارىن، الەۋمەتتىك تولەمدەردى، كوممۋنالدىق جانە باسقا دا تولەمدەردى كوميسسياسىز تولەي الادى. بۇل تولەم كارتالارى بارلارعا عانا قاتىستى. ال وزگە كليەنتتەر ءۇشىن كوميسسيا كولەمى وزگەرەك.

«پورتالدىڭ قىزمەتتەرىن پايدالاناتىن قالعان كليەنتتەرىمىز ەندى ۇيالى بايلانىس ءۇشىن 50 تەڭگە، كوممۋنالدىق تولەمدەر ءۇشىن - 100 تەڭگە، زەينەتاقى جارنالارى، مىندەتتى مەديسينالىق ساقتاندىرۋ جانە الەۋمەتتىك تولەمدەر ءۇشىن - 1%، ءبىراق 100 تەڭگەدەن كەم ەمەc كوميسسيا تولەيدى»، – دەپ جازدى ول.

اقپارات ءۇشىن ايتا كەتسەك، post.kz-تا سالەمدەمەلەردى قاداعالاۋعا، پوشتاماتقا جىبەرۋگە، پوشتا بولىمشەسىنە بارۋ ۋاقىتىن برونداۋعا بولادى. سونداي-اق، پوشتالىق جانە قارجىلىق قىزمەتتەر ءۇشىن دە ءتۇرلى تولەمدەر جاساي الاسىز.