ناۋرىز ايىنىڭ باسىندا "تاجىكستان بيلىگى ۇرلاپ، ازاپتادى" دەپ مالىمدەگەن بەلگىلى تاجىك وپپوزيسيونەرى شاروفيددين گادويەۆ تاجىكستان بيلىگىنىڭ 2020 جىلعا بەلگىلەنگەن پرەزيدەنت سايلاۋىندا پرەزيدەنت ەمومالي راحموننىڭ ۇلىن قولدايسىڭ دەپ قىسىم جاساعانىن دا ايتادى. بۇل تۋرالى Qamshy.kz اقپارات اگەنتتىگى ورتالىق ازيا جاڭالىقتارى قىزمەتىنىڭ دەرەگىنە سىلتەمە جاساپ حابارلايدى.
تاجىكستاندا تىيىم سالىنعان "24 توبى" وپپوزيسيالىق قوزعالىسىنىڭ مۇشەسى شاروفيددين گادويەۆ بۇل مالىمدەمەسىن امستەردامدا ازاتتىق تىلشىسىنە بەرگەن سۇحباتىندا ايتقان.
اقپان ايىندا رەسەيدە ۇستالىپ، تاجىكستانعا دەپورتاسيالانعان بەلسەندىنىڭ ەۋروپاعا كەتۋىنە تاجىكستان بيلىگى قۇقىق قورعاۋشىلار ارالاسقاننان كەيىن رۇقسات ەتكەن. بۇعان دەيىن نيدەرلاندى وعان بوسقىن مارتەبەسىن بەرگەن.
"ولار مەنى تاجىكستانعا كەلىپ، كەيىنىرەك پرەزيدەنت راحمون مەن ونىڭ [ونىڭ ۇلى] رۋستام ەموماليدىڭ ساياساتىن قولداعان "24 توبىنىڭ" 17 مۇشەسىنە جەتەكشى ەتكىسى كەلدى. ولار رۋستام ەمومالي 2020 جىلعى سايلاۋعا قاتىسادى جانە ءسىز ونى قولدايسىز دەدى" دەيدى بەلسەندى. گادويەۆ مۇنداي نۇسقاۋلىقتىڭ مەملەكەتتىك ۇلتتىق قاۋىپسىزدىك كوميتەتىنىڭ ءتوراعاسى سايمۋمين ياتيموۆتان كەلگەنىن ايتتى.
ەمومالي راحمون تاجىكستاندى 1992 جىلدان بەرى باسقارىپ كەلەدى. قۇقىق قورعاۋشىلار ونىڭ ەلدەگى پىكىر الۋاندىعىن جويىپ، ساياسي وپپونەنتتەرىن قۋداعالاعانى ءۇشىن سىنايدى. ەلدەگى كوپ ازاماتتار ونىڭ 31 جاستاعى ۇلى رۋستام ەموماليدى مۇراگەر رەتىندە اتايدى. ول 29 جاسىندا دۋشانبە مەرى بولىپ تاعايىندالعان.
ۇسىنعان: گۇلىم جاقان
