الجير استاناسىنىڭ تۇرعىندارى 82 جاستاعى پرەزيدەنت ابدەلازيز بۋتەفليكيدىڭ وتستاۆكاسىن تويلاۋعا كوشەگە شىقتى دەپ جازادى Qamshy.kz اقپارات اگەنتتىگى.
كۇنى كەشە الجير پرەزيدەنتى بەسىنشى رەت پرەزيدەنت سايلاۋىنا تۇسپەيتىنىن مالىمدەگەن ەدى.
♦82 جاستاعى پرەزيدەنت سايلاۋعا تۇسپەيتىنىن مالىمدەدى
جاڭالىقتى ەستي سالا تۋ ۇستاعان حالىق قالانىڭ ورتالىق اۋداندارىنا شىعىپ «حالىق جەڭدى! حالىقتىڭ قولىنان كەلدى!» دەپ ۇرانداتۋدى باستاپ كەتتى.
10 اقپاندا الجير پرەزيدەنتى ابدەلازيز بۋتەفليكا ساۋىردە وتەتىن سايلاۋعا قاتىساتىنىن جاريالاعان. ونىڭ جازباشا مالىمدەمەسىن مەملەكەتتىك تەلەارنالاردىڭ ءبىرى تاراتتى. وسىدان كەيىن ەلدە جاستار جاپپاي نارازىلىققا شىعىپ، بۋتەفليكانىڭ بيلىكتەن كەتۋىن تالاپ ەتىپ جاتىر. 2 ناۋرىزدا مىڭداعان ادامنىڭ نارازىلىعىن پوليسيا كۇشپەن باسۋعا تىرىسقان. پوليسيامەن قاقتىعىستا 180-گە جۋىق ادام زارداپ شەككەن.
بۋتەفليكا بۇعان دەيىن ءتورت رەت سايلاۋعا ءتۇسىپ، جەڭىسكە جەتكەن. 2013 جىلى ينسۋلت الىپ، سودان بەرى جۇرت الدىنا شىقپادى. مالىمدەمەلەرىن ەلدەگى تەلەارناداعى تەلەجۇرگىزۋشىلەر نەمەسە ماڭايىنداعى كومەكشىلەرى وقىپ ءجۇر. حالىقارالىق اقپارات اگەنتتىكتەرى بۋتەفليكانىڭ ءقازىر شۆەيساريادا ەمدەلىپ جاتقانىن حابارلاعان. ول 11 ناۋرىزدا شۆەيساريادان ەلگە ورالعان. الەمدىك اقپارات قۇرالدارىنىڭ جازۋىنشا، التى جىل بۇرىن ينسۋلت العان بۋتەفليكانىڭ ءجۇرىپ-تۇرۋى قيىن.
1991 جىلى الجيردە يسلاميستىك توپتار مەن بيلىك اراسىندا ازاماتتىق سوعىس باستالدى. بۋتەفليكا بيلىككە ەلدەگى ازاماتتىق سوعىس كەزىندە، 1999 جىلى، كەلدى. ول الجيردەگى ازاماتتىق سوعىستى توقتاتىپ، ەلدە بەيبىتشىلىك ورناتتى. ءقازىر نارازىلىققا شىققانداردىڭ اراسىندا "پرەزيدەنتكە قارسى ەمەسپىز، ول الجير ءۇشىن كوپ ءىس تىندىردى. ءبىراق ءقازىر پرەزيدەنت بولۋعا دەنساۋلىعى كەلمەيدى" دەيتىندەر دە بار.
ۇسىنعان: گۇلىم جاقان
