«شەشەڭ ەلدىڭ تۇكىرىك-قاقىرىعىن جۋادى. نەسىنە ءماز بولاسىڭ؟!» الماتى وبلىسىندا اسىلىپ قايتىس بولعان 15 جاستاعى وقۋشىنى ۇلكەندەر وسىلاي دەپ قورلاعان. 9-سىنىپتىڭ وقۋشىسىن تارتىپكە سالماق بولعان ۇستاز جاس ورەندى كوپتىڭ كوزىنشە ۇرىپ-سوعىپ، تىزەرلەتىپ كەشىرىم سۇراتسا، جابىرلەنۋشى بالانىڭ جاقىنى مەكتەپتىڭ ەدەنىن جۋاتىن اناسىنا ءتىل تيگىزىپ، اسلاندى تىكەلەي قورلاعان. ول نامىستانىپ، ۇيگە كەلە سالا اسىلىپ قالدى دەپ وتىر بالاسىنىڭ ولىمىنە ءمۇعالىمدى كىنالاعان قايعىلى وتباسى. ال مەكتەپ ديرەكتورى بولسا «تەرگەۋ توقتامايىنشا، ەشتەڭە تۇسىندىرە المايمىز» دەپ ات-توندارىن الا قاشۋدا. تالعار اۋدانىندا ورىن العان قايعىلى جاعدايدان سوڭ جاڭادان اشىلىپ جاتقان اقپاراتتاردى Almaty.tv ءتىلشىسى تىڭداپ كەلگەن دەپ جازادى Qamshy.kz اقپارات اگەنتتىگى.

اسلاننىڭ 8 ناۋرىزدا اناسىنا تارتۋ رەتىندە بەرمەك بولىپ جاساتقان سۋرەتتەرىن جەرلەۋ كۇنى سىنىپ جەتەكشىسى جەتكىزگەن. ۇلدىڭ كەنجەسى، ءۇيدىڭ ءتورتىنشى بالاسى مەكتەپ قابىرعاسىندا وزىنەن تومەنگى سىنىپتىڭ ەكى وقۋشىسىن دوسىمەن بىرگە بوپسالاعان كورىنەدى. ال كىشكەنتاي تەنتەكتەرگە ۇستاز ءتارتىپ ورناتپاق بولعان.

«ساقينامەن ۇرعان، سودان مىنا جەرى قاناعان. سودان كەيىن ونى كورگەن قارىنداسى دا جىلاعان. مەنىڭ قاينىم دا جىلاعان. قاينىم «اقبوتا، جىلاما» دەپ ايتىپ، ءوزى دە كوز جاسىن سۇرتكەن. قاسىندا تۇرعان اتا-انا «سەنىڭ ماماڭ قاقىرىق-تۇكىرىك جۋىپ ءجۇر» دەپ ايتقان»، – دەيدى مارقۇم ا. عازيزوۆتىڭ جەڭگەسى ايكەرىم سەكەن.

«اينالىپ كەلىپ مەنىڭ بالامدى ۇرا بەرگەن عوي. سپورت زالعا اپارىپ تاعى دا ۇرىپ، سول جەردە ۇرسىپ، مىنا بالانىڭ الدىنا بارىپ تىزەرلەپ كەشىرىم سۇرا دەگەن. مەن كەتكەن سوڭ بالاما «شەشەڭ ەلدىڭ قاقىرىعىن جۋادى، سەن نەسىنە ءماز بولاسىڭ؟!» دەگەن»، – دەپ كوز جاسىن ءسۇرتتى مارقۇم ا. عازيزوۆتىڭ اناسى باقىت سەيسەنبينوۆا.

ۇيىنە اشۋ-ىزاعا بۋلىعىپ كەلگەن اسلان اۋلاسىنداعى مال قوراعا تىزەرلەي وتىرىپ، اسىلىپ قالعان. اكەسى بۋىنعان ءجىپتى قيىپ، شوپكە جاتقىزعاندا دەنەسى سۋىماعان ۇلىنىڭ انا دۇنيەگە الدەقاشان ءجۇرىپ كەتكەنىن ءبىر-اق ءبىلىپتى. وتپەلى كەزەڭدە قورلانىپ، ءوزىن ولىمگە قيعان وركەننىڭ ءومىرى الدا، ارمانى – 9-سىنىپتان سوڭ مۋزىكا جاعىن تەرەڭدەتىپ وقۋ ەدى دەيدى قايعىلى اتا-انا.

اسىلىپ قايتىس بولعان مارقۇم اسلان سىنىپتىڭ بەلسەندىسى بولعان. ۇنەمى الدىڭعى پارتادا وتىرعان وقۋشى ءان ايتىپ، مەكتەپتىڭ مادەني شارالارىنان قالمايتىن كورىنەدى. ال قايعىلى وقيعا بولاتىن كۇنى وتىز جىلدان اسا بيولوگيا پانىنەن ساباق بەرگەن ءمۇعالىم ءوزىنىڭ 7-سىنىبىنداعى وقۋشىلارىن قورعاماق نيەتتە اسلانعا كوپتىڭ كوزىنشە ۇرىسقان كورىنەدى.

450-دەي وقۋشىسى، 55 ۇستازى بار مەكتەپتىڭ ديرەكتورى «ەسەڭگىرەپ، ەسىمىزدى ءالى جيناي الماي ءجۇرمىز، تەرگەۋ توقتاماي تۇيتكىلدى تۇسىندىرە المايمىز» دەپ وتىر. ال زەينەت جاسىنا جاقىنداپ قالعان كەزىندە قايعىلى جاعدايعا قالاي تاپ بولعانىن بىلمەي قالعان 7-سىنىپتىڭ جەتەكشىسى اۋرۋحاناعا جاتىپ قالعان.

«وسى جەردە ءبىرىنشى سىنىپتان باستاپ وقىپ كەلە جاتىر ەدى. اتا-اناسى – وسى اۋىلدىڭ تۇرعىلىقتى ادامدارى. مىنەزىنە كەلسەك، بالا ءبىرقالىپتى بولاتىن، ەشقانداي باسبۇزارلىعى جوق ەدى. مەكتەپتەگى بەلسەندى بالالاردىڭ ءبىرى بولىپ، رەسپۋبليكالىق، وبلىستىق دەڭگەيدە ءان بايقاۋلارىنا قاتىسىپ جۇرەتىن. ءقازىر تەرگەۋ امالدارى ءجۇرىپ جاتىر. وعان ەشقانداي پىكىر بىلدىرە المايمىن»، – دەدى الماتى وبلىسى تالعار اۋدانى تۋعانباي اۋىلىنداعى №30 ورتا مەكتەپتىڭ ديرەكتورى دانيار امانجولوۆ.  

ۇلدارىنىڭ ولىمىنە بيولوگيا ءپانىنىڭ ءمۇعالىمىن كىنالاعان اتا-انانىڭ ارىزى بويىنشا ۇستازدىڭ ۇستىنەن قىلمىستىق ءىس قوزعالعان. ق ر قىلمىستىق كودەكسىنىڭ 105-بابى، ياعني ءوز-وزىن ولتىرۋگە  دەيىن جەتكىزۋ بويىنشا تاعىلعان ايىپ تولىق دالەلدەنسە، عۇمىرىن اعارتۋشىلىققا ارناعان جان ءۇش جىلدان جەتى جىلعا دەيىن جازا ارقالاۋى مۇمكىن.

ۇسىنعان: گۇلىم جاقان