قىمبات ءابىلدينا دەپۋتات گۇلجان قاراعۇسوۆانىڭ قارتتارعا ءۇي سالۋ ۇسىنىسىنا جاۋاپ بەردى، دەپ جازادى Qamshy.kz اقپارات اگەنتتىگى Stan.kz سايتىنا سىلتەمە جاساپ.

"گۇلجان قاراعۇسوۆانىڭ اۋزىمەن ايتىلعان مىنا جاڭالىققا قاتىستى ءبىز تەرەڭ فيلوسوف، ۇلى ماتەماتيك پيفاگوردان ارتىق ايتا المايمىز: "مىقتى زاڭىڭ بولعانشا، مىقتى ءسالت-داستۇرىڭ بولسىن". ال ەندى ءداستۇردىڭ كوكەسى ول - اتا ءداستۇر. ول قانمەن كەلەتىن دۇنيە، سوناۋ سەن ۇلت بولىپ قالىپتاسۋىڭ - ەركىڭنەن تىس نارسە. جاراتىلىستىڭ كۇشىمەن قازاق دەگەن ۇلتتىڭ وكىلى بولىپ تۋعانبىز. ال ەندى قازاق دەگەن بارلىق باقىتىن ۇرپاعىمەن عانا بايلانىستىرىپ قويعان.

مەن وسى بيلىكتەگى بيلىكتىڭ ءدامىن تاتىپ الىپ، بيلىكتىڭ مايلى جىلىگىنەن ءدام كورگەن، وزدەرى قارتايىپ، شارۋاسى ءبىتىپ تۇرسا دا، سول بيلىكتەن ايىرىلعىسى كەلمەيتىن، سول ءبىر كەزدە بيلىكتە بولعانىن ولە-ولگەنشە ايتىپ، سونى ءبىر وزدەرىنە داڭق كورىپ، مانساپ كورىپ، سونى ب ا ق كورەتىن ادامدارعا مەن تۇسىنبەيمىن (گۇلجان قاراعۇسوۆا 9 قىركۇيەكتە 69 جاسقا كەلەدى).

ول ءوزىنىڭ بالاسىنا دەر كەزىندە كوڭىل بولمەگەن، اتا-اناسىنا كوڭىل بولمەگەن، سولاردىڭ قاس-قاباعىنا قاراماعان، سولاردىڭ جانارىنداعى شۋاقتى، مەيىرىمدى، اينالالايىندى، شارشاپ وتىرعان ءحالدى كورمەگەن، قاس-قاباعىنا قاراماعان ادامدار وسىلاي ەسەپتەيدى دەپ ويلايمىن. مۇمكىن جەتپەي وتىرعان وتباسىندا وتىرعانشا وكىمەت جاعدايىن جاساپ قويعان جەردە وتىرۋدى ول كەرەمەت دەپ ويلار. ءبىراق، ول ءبىزدىڭ قانىمىزعا كەلمەيدى عوي.

ادام دەگەن تەك ىشكەنىمەن، جەگەنىمەن عانا جاقسى ءومىر سۇرمەيدى. ءومىرىنىڭ ءمان-مازمۇنىن تەك سونىمەن عانا باعالامايدى عوي. كەز-كەلگەن جاراتىلىس يەسى، جوعارعى سانا يەسى ادام عانا ەمەس، اناۋ باۋىرىمەن جورعالايتىن كىشكەنتاي جورعالاۋشىلاردان، جاندىكتەردەن، نازىك گۇلگە دەيىن، قىسقاسى تىرشىلىك يەسىنىڭ بارلىعىندا ءبىر-اق مۇرات بولادى. ول مۇرات - ءوسۋ، وركەندەۋ، ءوز ۇرپاقتارىن كورۋ. ول حايۋاناتتاردىڭ دا ارمانى، قۇستاردىڭ دا ارمانى.

مەن تۇسىنبەيمىن، سوندا ءسىز بالاڭىزدى وسىرەدى ەكەنسىز، بالام ءۇشىن-بالام ءۇشىن دەپ جانتالاسادى ەكەنسىز، ال سوسىن قارتايعاندا بالاڭنان ءبولىنىپ الىپ تۇرۋ دەگەندى مەن كوز الدىما ەلەستەتە المايمىن. قازاقتىق قاسيەتتى تۇسىنبەيتىن، قازاقي قاسيەتتى باعالاي المايتىن، اتا-اناسىنىڭ قاس-قاباعىنا قاراماعان، اتا-انانىڭ تەك ىشىپ-جەپ، تويعانىنا عانا ەمەس، اتا-انانىڭ كوزىندە نە بار، جۇرەگىندە نە بار، تىلەگىندە نە بار دەپ، اتا-اناسىنان حال سۇراماعان، جانارىنا قاراماعان، اتا-اناسىنىڭ كوڭىلىن، قۋانىشىن ءتۇسىنىپ كورمەگەن ادامدار عانا مۇنداي تىرلىك جاسايدى مەنىڭ ۇعىمىمدا.

مەن مىسالى ءۇشىن ءقازىر تىرىدەي جۇماققا ۇلپىلدەتىپ اپارام دەسە، بەينەتىمنەن بارىنەن الىپ كەتىپ، تويعان جەرىڭە وتىرعىزام دەسە كەلىسپەيمىن، مەن تويعان جەردە جۇرەتىن يت ەمەسپىن عوي، مەن ۇرپاعىمنىڭ وسكەنىن كورگىم كەلمەي ما، مەن وسى ۋاقىتتا قارتتىق-قازىنالىققا جەتكەنىمدە، ومىردەن تۇيگەن-بىلگەنىمدى، سۇيگەنىمدى، قازاقتىڭ جاقسىلىعىن ۇرپاعىما ەرتەگى عىپ، ماقال-ماتەل قىلىپ، شەشەندىك ءسوز قىلىپ ايتپايمىن با؟ ەتىنەن وتكىزىپ، سۇيەگىنە جەتكىزىپ، قازاقتىڭ قاسيەتىن جاس قازاققا جەتكىزبەيمىن با، مەنىڭ ۇلكەندىگىم سول ەمەس پا؟

مەن نەگە ول جەردە جاعدايىم جاقسى بولسا بولدى، بالام ماعان تاماق ىستەپ بەرمەي-اق قويسىن، كەلىنىم مەنى جاقتىرماي-اق قويسىن دەپ، نەگە مەن ءبارىن اقشاعا تىرەپ قويۋىم كەرەك؟ اقشادان باسقا قۇندىلىق جوق پا؟ تەك قانا اتا-انانىڭ ءقادىرىن بىلمەيتىندەر عانا وسىنداي قادامعا بارادى دەپ ەسەپتەيمىن، بۇل مەنىڭ كوزقاراسىم"، - دەيدى قىمبات ءادىلبينا.

ۇسىنعان: نازەركە لابيحان