بىلتىر شەلەك اۋىلىنداعى ورتالىق اۋرۋحانادا قۇدىققا ءتۇسىپ قازا تاپقان ەكى سانتەحنيكتىڭ جاقىندارى ولاردىڭ ولىمىنە باسشىلىقتى كىنالايدى دەپ حابارلايدى Qamshy.kz اقپارات اگەنتتىگى كتك ارناسىنا سىلتەمە جاساي وتىرىپ.

«ءومىرباي قۇدىققا تۇسكەن بويدا جان تاپسىرعان. ءبىراق، ول جانساقتاۋ بولىمىندە التى ساعات جاتتى. ءولىپ قالعان سوڭ، ونى قاسىنداعى ارىپتەسىمەن بىرگە بالكونعا شىعارىپ تاستاعان ەكەن. اۋرۋحاناعا قىزىمىز ەكەۋىمىز بارعاندا بىزگە ءمان-جايدى ەشكىم تۇسىندىرگەن جوق»، – دەيدى مارقۇم ءومىرباي ەستەمەسوۆتىڭ ايەلى ەلميرا.

مارقۇمنىڭ اپكەسى دە ءىنىسى بولعان جايتقا شەلەك اۋرۋحاناسى اۋىلشارۋاشىلىق ءبولىمىنىڭ مەڭگەرۋشىسى اركەن ءۇشۇروۆتى كىنالاپ وتىر.

«قۇدىققا ەڭ ءبىرىنشى مەنىڭ باۋىرىم ءتۇسىپ كەتتى. تەحنيكانىڭ دامىعان زامانىندا كارىز قۇدىعىنا ادامدى ءتۇسىرىپ ءولتىرۋ نە سۇمدىق؟ اركەن ۇشىروۆ ءىنىمنىڭ جۋاستىعىن پايدالانىپ، ونى ءارتۇرلى جۇمىستارعا جۇمسايتىن. ءتىپتى ءۇيىنىڭ جۇمىسىنا دەيىن ىستەتكەن. مەن ءىنىمنىڭ ءمايىتىن كوردىم، ءۇستى-باسى كوگەرىپ كەتكەن. نەگە بۇلار سۋ قۇبىرىن قارايتىنداردى بۇرىننان شاقىرماعان؟ ءبىز ولىمگە كىنالىلەردىڭ ءوز جازاسىن العانىن قالايمىز. ءبىراق بۇلار قىلمىستى اقىرىندا جاۋىپ تاستاي ما دەپ قورقامىز»، – دەيدى مارقۇم ەستەمەسوۆتىڭ اپكەسى.

الايدا، اۋرۋحانا اۋىلشارۋاشىلىق ءبولىمىنىڭ مەڭگەرۋشىسى اركەن ءۇشۇروۆ كارىز قۇدىعىنا ءتۇسىپ، گازدان ۋلانىپ قازا تاپقان ەكى سانتەحنيكتىڭ قازاسىنا ءوزىن كىنالى سانامايتىنىن ايتادى. ءقازىر اركەن ءۇشۇروۆ جۇمىسسىز. ول بىلتىر قىركۇيەك ايىندا ءوز ەركىمەن جۇمىستان كەتۋگە ءوتىنىش جازعان.  

ۇسىنعان: فاريزا جومارت قىزى