رەسەي بەلارۋس ەلىن باتىستىڭ قۇشاعىنا ءوزى تىقپالاپ بەردى. مۇنداي پىكىردى ايتقان بەلارۋسيا پرەزيدەنتى الەكساندر لۋكاشەنكو. سەيسەنبى كۇنى ەۋروپالىق ۇيىمدارمەن ينتەگراسيالىق قۇرىلىمدار جانە ىنتىماقتاستىققا قاتىستى كەڭەستە ايتىلدى بۇل ءسوز.
"ۋكراينسكايا پراۆدا" باسىلىمىنىڭ حابارلاۋىنشا، بەلارۋس رەسەي تاراپىنان بولىپ جاتقان شەكتەۋدىڭ سالدارىنان باتىسپەن سەرىكتەستىكتى نىعايتۋعا ءماجبۇر.
«باتىسپەن سەرىكتەستىكتىڭ ورناۋى ءبىزدىڭ باستى سەرىكتەسىمىز – رەسەي فەدەراسياسىنىڭ كوڭىلىنە جاقپاي قالىپتى. ءتىپتى اشۋى قارا قازانداي ەكەن. نەسىنە بۇلقان-تالقان بولىپ جاتىرسىزدار؟ ءبىزدىڭ ءونىمدى نارىققا جىبەرمەيدى، ارامتاماق دەيدى، كەز كەلگەن مۇمكىندىكتى پايدالانىپ، قىسىم جاسايدى، باسىپ-جانشۋعا دايىن تۇرادى، كەۋدەلەرىنەن يتەرەدى. ەندى نە ىستەيمىز؟ جەر استىنا جاسىرىنىپ الىپ، شىقپاي وتىرعانىمىز كەرەك پە؟»، - دەدى اشۋعا مىنگەن لۋكاشەنكو.
بەلارۋسيا ءۇشىن ءبىر ەسىك جابىلسا، ول ەكىنشى ەسىكتى ىزدەۋگە ءماجبۇر بولادى. وسىلاي دەگەن ەل پرەزيدەنتى رەسەيدەن بەلارۋستىڭ مۇنداي قادامدارىن ايىپتاماۋدى تالاپ ەتتى.
«ءبىز ەشقايدا بۇرىلمايمىز، بۇرىلاتىن جەر دە جوق. باسىمىزدى اينالدىرساق بولعانى، سەبەبى ءبىز جاعدايدىڭ ورتالىعىندا – ەۋروپانىڭ ورتالىعىندا ورنالاسقانبىز»، - دەپ مالىمدەدى ول.
«الىستان اربالاعانشا، جاقىننان دوربالا. ەگەر رەسەيمەن قارىم-قاتىناسىمىز قالىپتى بولسا، ەگەر وداقتىق مەملەكەتتەرمەن ەركىن كەلىسىمدەرگە كەلە الساق، ەركىن ساۋدالاسساق، ءبىزدى قورلاماسا، باقىتتى الىستان ىزدەپ نەمىز بار؟»، - دەدى پرەزيدەنت اشۋلى سوزىندە.
ال ەلدىڭ ەۋروپالىق وداقپەن كەلىسىمگە كەلۋىندەگى العاشقى مىندەت – ۆيزالىق رەجيمدى جەڭىلدەتۋ. ونىڭ ۇستىنە ەو-مەن تىعىز قارىم-قاتىناستاعى رەسەيگە مىناداي رەنىشىن تاعى ءبىلدىردى.
«رەسەي ەۋروپالىق وداقپەن، اقش-پەن، ناتو-مەن تىعىز قارىم-قاتىناستا. ءبىز وسى ءۇشىن رەسەيدى ايىپتادىق پا؟ بۇل كەلىسىمدەر تەك ءوز پايدامىز ءۇشىن جاسالدى. ەشكىمگە بوگەت كەلتىرىپ وتىرعان جوقپىز، دۇشپاندارىمىزدىڭ قاتارىنا قوسىپ قويمادىق. رەسەيدىڭ دە ارەكەتى وسىنداي بولسا يگى. سونى سوزبەن ەمەس، ىسپەن كورسەتسە ءتىپتى جاقسى بولار ەدى»، - دەدى لۋكاشەنكو.
لۋكاشەنكونىڭ ايتۋىنشا، بەلارۋس ەكىنشى ءىرى سەرىكتەسى ەۋرووداقپەن وڭتايلى ديالوگ ورناتىپ كەلەدى. ينۆەستيسيالار ءوسىپ، سىرتقى ساۋدا ۇلعايدى، بايلانىستار كەڭەيدى.
ال رەسەيلىك ب ا ق لۋكاشەنكونىڭ بۇل ارەكەتىن كورەالماۋشىلىق، ءىشتارلىق سالدارىنان تۋعان دەپ بولجادى.
گۇلىم جاقان
پىكىر قالدىرۋ