زەينەتكەرلىككە شىعۋىنا نەبارى ەكى-اق اي قالعان اۋىلشارۋاشىلىعى مينيسترلىگىنە قاراستى سۋ رەسۋرستارى كوميتەتىنىڭ باسشىسى يسلام ابىشيەۆ 60 ملن. تەڭگە الدى دەگەن كۇدىككە ءىلىندى دەپ حابارلايدى Qamshy.kz اقپارات اگەنتتىگى.

يسلام ابىشيەۆ بۇعان دەيىن وڭتۇستىك قازاقستان وبلىسىنداعى ورداباسى اۋدانىنىڭ اكىمى، وقو اكىمىنىڭ ءبىرىنشى ورىنباسارى، وسكەمەن قالاسىنىڭ اكىمى قىزمەتتەرىن اتقارعان. وزىنە تيەسىلى «باتسۋ» كورپوراسياسىنىڭ پرەزيدەنتى قىزمەتىن اتقارىپ جۇرگەندە  يسلام ءالماحانۇلىن 2000 جىلى العاش رەت مەملەكەتتىك قىزمەتكە تارتىپ، ورداباسى اۋدانى اكىمى ەتىپ تاعايىنداعان. وڭتۇستىك قازاقستان وبلىسىنىڭ سول كەزدەگى اكىمى بەردىبەك ساپاربايەۆ بولاتىن. كەيىنىرەك بەردىبەك ساپاربايەۆ شىعىس قازاقستان وبلىسىنىڭ اكىمى قىزمەتىنە تاعايىندالعاننان كەيىن ي. ابىشيەۆ وسكەمەن قالاسى اكىمىنىڭ كرەسلوسىنا وتىردى.

ەستەرىڭىزگە سالا كەتسەك يسلام ءالماحان ۇلى اۋىلشارۋاشىلىعى مينيسترلىگىنە قاراستى سۋ رەسۋستارى كوميتەتىنە ءتوراعا بولىپ ەكى مارتە تاعايىندالعان. 

قانىش ساتبايەۆ اتىنداعى كانال» رمكك-نىڭ ديرەكتورى تۇرعانباي سارسەنبايەۆ:  يسلام ابىشيەۆ قاراعاندىعا كەلگەن ساپارىندا تۋعان كۇنىمە استا-توك داستارحان جاي دەگەن سوڭ 98 مىڭ تەڭگەگە داستارحان جاسادىم، ودان اكىمدىكتە وتەتىن جينالىسقا قاتىساتىن بولعاندىقتان ماعان كوستيۋم-شالبار ساتىپ الىپ بەر دەپ تىكەلەي تاپسىرما بەردى، امال جوق، كوستيۋم-شالبار الىپ بەردىم» دەپ، ايىپتاعان. دەگەنمەن، كەيىننەن بۇل ايىپتار  دالەلسىز بولىپ شىقتى.

2013 جىلدىڭ شىلدە ايىندا يسلام ابىشيەۆ سۋ رەسۋستارى كوميتەتىنىڭ ءتوراعاسى قىزمەتىنەن بوساتىلىپ قالعاننان كەيىن ءبىر جىلدان كەيىن يسلام پرەزيدەنت نۇرسۇلتان نازاربايەۆتىڭ ءوزى قابىلداپ، 2014 جىلدىڭ تامىز ايىندا قىزمەتىنە قايتا تاعايىنداعان. جالپى العاندا يسلام ابىشيەۆ وڭتۇستىكتە، شىعىستا قىزمەتتە جۇرگەندە ىسكەرلىگىمەن تانىلىپ جاڭاشىل باسشى اتانعان.

ەندى بۇل جولعى داۋدا يسلام ابىشيەۆ 60 ميلليون تەڭگەنى كونكۋرستان «وتكات» رەتىندە العان كورىنەدى. سولتۇستىك قازاقستان وبلىسى، قىزىلجار اۋدانىنداعى سوكولوۆ توپتىق سۋ قۇبىرى مەن اۋىلدىق جەردەگى سۋ تاراتۋ جۇيەسىنىڭ قۇرىلىسىن جاڭعىرتۋ بويىنشا 6 ملرد تەڭگەگە كونكۋرس ۇيىمداستىرىلعان. كوميتەت ءتوراعاسىنا بەرىلدى دەلىنگەن 60 ميلليون تەڭگە سول كونكۋرس ءۇشىن بەرىلگەن «اۋىزباستىرىق» سياقتى. سوندا ابىشيەۆكە 6 ملرد تەڭگەنىڭ 1 پايىزى بەرىلگەن بولىپ تۇر عوي.

سونداي-اق، ول «وتكاتتى» تىكەلەي ءوزى الماعاندىعى جانە ونىڭ بولشەكتەپ بەرىلگەندىگى دە ايتىلادى. العاشقى 10 ميلليون تەڭگەسى ەكى ءبولىنىپ، «قازاق كۇرەسى» فەدەراسياسىنىڭ ۆيسە-پرەزيدەنتى سەرىك توكەيەۆ ارقىلى العان. يسلام ابىشيەۆ ءدال وسى فەدەراسيانىڭ پرەزيدەنتى قىزمەتىن قوسا اتقارىپ جۇرگەن بولاتىن. 60 ميلليون تەڭگەنىڭ ەڭ سوڭعى بولىگى، ياعني، 50 ميلليون تەڭگە 14 ناۋرىز كۇنى يسلام ابىشيەۆتىڭ ءىنىسى، تۇركىستان وبلىسىنىڭ بيزنەسمەنى قانىبەك ابىشيەۆكە بەرىلگەن كورىنەدى. سودان سوڭ سۋ رەسۋرستارى كوميتەتىنىڭ ءتوراعاسى قاماۋعا الىنعان. ايتا كەتەيىك، «سۋ رەسۋرستارى كوميتەتىن جەتى جىلداي باسقارىپ كەلگەن يسلام ابىشيەۆتى سول كەزدەگى مينيستر اسىلجان مامىتبەكوۆ تاعايىنداعان بولاتىن. اۋىلشارۋاشىلىعى مينيسترلىگىنىڭ جاۋاپتى حاتشىسى قىزمەتىن اتقارىپ جۇرگەن  مامىتبەكوۆتىڭ ءوزى جاقىندا جۇمىسىنان بوساپ قالدى. ونىڭ قىزمەتىنەن كەتۋىنە بۇل جاعدايدىڭ قاتىسى بار-جوعى ازىرگە بەلگىسىز.

ۇسىنعان: فاريزا جومارت قىزى