اۋىل شارۋاشىلىعى مينيسترلىگىنە قاراستى سۋ رەسۋرستارى كوميتەتىنىڭ 62 جاستاعى باسشىسى يسلام ابيشيەۆ 60 ميلليون تەڭگە پارا العان دەگەن كۇدىككە ءىلىندى. ەگەر الىنعان اقشانىڭ كولەمى قوماقتى بولماسا، وندا يسلام ابىشيەۆ 2 ايدان كەيىن زەينەتكە شىعا الادى دەپ حابارلايدى  Qamshy.kz اقپارات اگەنتتىگى ۆرەميا گازەتىنە سىلتەمە جاساي وتىرىپ.

ەسكەرتە كەتسەك سۋ رەسۋرستارىن يسلام ابىشيەۆ  جەتى جىلدان استام باسقارعان. ال وعان دەيىن تۇركىستان وبلىسىنا قاراستى ورداباسى اۋدانى مەن شىعىس قازاقستان وبلىسىنىڭ اكىمى قىزمەتتەرىن اتقارعان. وسكەمەن وبلىسىن باسقارىپ تۇرعان كەزدە قالا حالقى ونى ەرەكشە قۇرمەتتەگەن. ءتىپتى بەردىبەك ساپاربايەۆ: يسلام ابىشيەۆتى وڭتۇستىكتەن الىپ كەلىپ، وسكەمەننىڭ تىزگىنىن ۇستاتقاندا قاتەلەسپەگەن ەكەنمىن. ءۇش جىلدا وسكەمەننىڭ ءوڭى كىرىپ، گۇل جايناپ، قۇلپىرىپ شىعا كەلدى. ۇيقىسىز-كۇلكىسىز، تاڭدى-تاڭعا ۇرىپ، تالماي ىستەگەن الاپات بەينەت، قارانارلىق قايرات پەن  قارا تەر حالىقتىڭ  اپپاق ىقىلاسى بولىپ قايتا ورالدى. ماڭدايدان توگىلگەن تەر  مارجانعا اينالىپ،  مايتالمان  اكىم  مارقاسقا قايراتكەرگە اينالدى - دەپ باعا بەرگەن.  

ايتا كەتەيىك، «سۋ رەسۋرستارى كوميتەتىن جەتى جىلداي باسقارىپ كەلگەن يسلام ابىشيەۆتى سول كەزدەگى مينيستر اسىلجان مامىتبەكوۆ تاعايىنداعان بولاتىن. بۇل جاعدايعا بايلانىستى مامىتبەكوۆ ءىستىڭ تەك وڭدى شەشىلگەن جاعدايدا عانا ابىشيەۆتىڭ زەينەتكە شىعا الاتىندىعىن ايتادى. 

بۇل جاعداي سولتۇستىك قازاقستان وبلىسىنىڭ قىزىلجار اۋدانىندا سۋ قۇبىرى مەن اۋىلدىق جەردەگى سۋ تاراتۋ جۇيەسىنىڭ قۇرىلىسىن جاڭعىرتۋ ءۇشىن جالپى قۇنى شامامەن 6 ملرد تەڭگە كولەمىندە كونكۋرس ۇيىمداستىرۋ جۇمىسىنان باستالعان.  ابىشيەۆ الدى دەپ ايىپتاپ وتىرعان 60 ميلليون تەنگە سول 6 ميلليارد تەڭگەنىڭ 1 پايىزى بولسا كەرەك. 

يسلام ابىشيەۆ 60 ميلليون تەڭگەنى تىكەلەي ءوزى الماعاندىعىن ايتادى. جىل باسىندا ءوزى باسشىلىق ەتەتىن "قازاق كۇرەسى" فەدەراسياسىنىڭ ۆيسە-پرەزيدەنتى سەرىك توكەيەۆكە 1،5 ميلليون تەنگە بەرگەن. ال،  60 ميلليون تەڭگەنىڭ ەڭ سوڭعى بولىگى، ياعني، 50 ميلليون تەڭگەنى 14 ناۋرىز كۇنى يسلام ابىشيەۆتىڭ ءىنىسى، تۇركىستان وبلىسىنىڭ بيزنەسمەنى قانىبەك ابىشيەۆكە بەرىلگەن كورىنەدى. سودان سوڭ سۋ رەسۋرستارى كوميتەتىنىڭ ءتوراعاسى قاماۋعا الىنعان.

اۋدارعان: فاريزا جومارت قىزى