16 ناۋرىزدا كرايسچورچدە ايماقتىق سوتتا تەراكت ۇيىمداستىردى دەپ ايىپتالعان ءۇش كۇدىكتىنىڭ ءىسى بويىنشا الاعاشقى تىڭداۋ ءوتتى. قىلمىستىق ءىس بويىنشا العاشقى سوت ءىسى بار-جوعى ءبىر مينۋت كولەمىندە ءتامامدالعان. سوت زالىندا 49 ادامنىڭ ءومىرىن جالماعان برەنتون تاررانت بولعان ىسكە ەش وكىنبەيتىنىن ايتتى دەپ حابارلايدى Qamshy.kz اقپارات اگەنتتىگى اگەنتتىگى. 

49 ادامنىڭ ءومىرىن قيعان جاڭا-زەلانديانىڭ كرايسچورچ قالاسىنداعى مەشىتتە بولعان لاڭكەستىك ارەكەتتى  28 جاستاعى اۆستراليالىق - برەنتون تاررانتتىڭ ۇيىمداستىرعانى بەلگىلى بولدى. سوعان سايكەس  سەنبى 16 ناۋرىزدا كرايسچورچتىڭ ايماقتىق سوتىندا الاعاشقى تىڭداۋ ءوتتى. "Deutsche Welle" باسىلىمىنىڭ اقپارىنا سايكەس ەكى قارۋلانعان كۇزەت قىزمەتى تارانتانى سوت زالىنا قولىنا كىسەن سالىپ كىرگىزگەن.

"The New Zealand Herald" باسىلىمىنىڭ اقپارى بويىنشا تاررانت «بولعان ىسكە ەش وكىنبەيتىنىن ءبىلدىرىپ، فوتوعا ءتۇسىرۋ بارىسىندا ۇلتشىلدىق ناقىشتاعى ارەكەتتەر جاساعان». وسىدان كەيىن ايىپتىنى تىڭداۋ زالىنان ونىڭ قورعاۋشىسىنا قۇلاق تۇرمەستەن زالدان شىعارىپ جىبەرگەن.

قىلمىستىق ءىس بويىنشا العاشقى سوت ءىسى بار-جوعى ءبىر مينۋت كولەمىندە ءتامامدالعان. كەلەسى تىڭداۋ 5 ساۋىرگە جوسپارلاندى.

لاڭكەستىك ارەكەتتەن 49 بەيبىت تۇرعىن باقيلىق بولدى

لاڭكەستىك ارەكەتتى جاساماي تۇرىپ تاررانت ءوزىنىڭ الەۋمەتتىك جەلىدەگى پاراقشاسىندا 74 بەتتەن تۇراتىن مانيفەست جاريالاعان، وندا ءوزىن اق ءناسىلدى ادامداردىڭ ارتىقشىلىعى يدەياسىن جاقتايتىن جاننىڭ ءبىرى ەكەنىن العا تارتىپ، ەۋروپادا مۇسىلماندارعا قارسى لاڭكەستىك ارەكەتكە باراتىنىن دا جايىپ سالعان ەكەن.

مۇسىلمانداردىڭ جۇماداعى قۇلشىلىعىندا بولعان لاڭكەستىك ارەكەتتىڭ تەرگەۋ ىسىنە جاۋاپتى پوليسيا كوميسسارى مايك بۋش قازىرگى ۋاقىتتا تاعى ءبىر لاڭكەستىك ارەكەت ورىن الادى دەگەن كۇدىك جوق ەكەنىن، دەگەنمەن تۇرعىنداردى ساق بولۋعا شاقىردى. جۋرناليستەردىڭ ەكى لاڭكەستىك ارەكەتتى دە ءبىر ادام جاسادى ما دەگەن سۇراعىنا جاۋاپ قايىرعان بۋش ءىستىڭ اق-قاراسىن اشىپ بەرە المايتىنىن اتاپ ءوتتى. مەشىتتەگى اتىستان كەيىن ۇستالعان تاعى ەكى كۇدىكتىنىڭ لاڭكەستىك ارەكەتكە قاتىسى بار-جوعى انىقتالۋدا.

«تاررانتانىڭ قارۋ-جاراق قولدانۋعا زاڭدى قۇقىعى بولعان»

ءوز كەزەگىندە جاڭا زەلانديانىڭ پرەمەر-مينيسترى دجاسيندا اردەرن تاررانتتىڭ قارۋ-جاراق ۇستاۋعا قۇقىعىنىڭ بار بولعانىن جانە زاڭدى تۇردە بەس قارۋ-جاراققا يەلىك ەتكەنىن اتاپ ءوتتى. پرەمەر-مينيستر اتالعان لاڭكەستىك ارەكەتتەن كەيىن جاڭا زەلانديادا قارۋ-جاراقتى قولدانۋدى شەكتەيتىن زاڭ ەنگىزىلەتىنىنە ۋادە ەتتى.

سوڭعى مالىمەتتەرگە سۇيەنسەك، جاڭا زەلانديا پوليسياسىنىڭ باسشىسى حابارلاعانداي، تەراكت بولعان جەردە تاعى ءبىر قازا تاپقان كىسىنىڭ دەنەسى تابىلدى. سونىمەن، بارلىعى 50 ادام لاڭكەستىكتىڭ قۇربانى بولعان. ال زارداپ شەككەندەر سانى – 50، ولاردىڭ 36-سى اۋرۋحانادا جاتىر: 11 زارداپ شەگۋشى اۋىر حالدە.

ۇسىنعان: فاريزا جومارت قىزى