اتىراۋدا وتكەن سەنبىلىكتە وزەن جاعالاۋىنان 52 توننا قوقىس، 4،3 توننا ءولى بالىق جينالدى، دەپ حابارلادى Qamshy.kz اقپارات اگەنتتىگىنە اتىراۋ وبلىستىق وڭىرلىك كوممۋنيكاسيالار قىزمەتى.
«تازا جاعالاۋ» سەنبىلىگىنە 2600-دەن استام تۇرعىن قاتىسىپ، 9 بىرلىك ارنايى تەحنيكا تارتىلدى.
16 ناۋرىزدا “Nur Otan” پارتياسى اتىراۋ فيليالى مەن وبلىستىق اكىمدىكتىڭ ۇيىمداستىرۋىمەن جالپىقالالىق سەنبىلىك ءوتتى.
اۋقىمدى شاراعا 2600-دەن استام قالا مەن سەلولىق وكرۋگتەردىڭ تۇرعىندارى، مەملەكەتتىك مەكەمەلەردىڭ قىزمەتكەرلەرى، قوعامدىق ۇيىمداردىڭ وكىلدەرى، ستۋدەنتتەر قاتىستى.
-سەنبىلىككە قاتىسقاندار قاتارى كوپ بولدى، 52 توننا قوقىس جينالدى. كەلەسى جولى دا بارلىق تۇرعىنداردى وسى باستامانى قولداۋعا، جاعالاۋدى تازارتۋعا قاتىسۋعا شاقىرامىز، -دەدى ازاماتتىق ورتالىقتىڭ مەديا ءبولىمىنىڭ مەڭگەرۋشىسى سىمبات جانداربەك.
سونىمەن قاتار، سەنبىلىك قورتىندىسى بويىنشا 4،3 توننا ءولى بالىق جينالدى، بالىقتاردىڭ سالماعى ەسەپتەلىپ، قىلمىستىق ءىس ماتەريالىنا تىركەلدى.
10 جەلتوقسان 2018 جىلدان باستاپ «كازگيدرومەت» رمم جايىق وزەنىندەگى سۋ جاعدايىنا مونيتورينگ جۇرگىزىپ كەلەدى. زەرتحانالىق سىنامالار لاستانۋدىڭ جوعارى جانە وتە جوعارى دەڭگەيىن كورسەتكەن جوق. ءقازىر قازگيدرومەت مونيتورينگ اياسىندا شتاتتىق رەجيمدە اپتا سايىن سىناما الىپ وتىر. سۋ سىناماسىن ەكولوگيا دەپارتامەنتى مەن تۇتىنۋشىلار قۇقىعىن قورعاۋ دەپارتامەنتى دە جۇرگىزۋدە.
بۇگىنگە دەيىن 200-دەن استام سىناما الىندى. بۇل وزەننىڭ جاعدايىنا مونيتورينگ ءۇشجاقتى جۇرگىزىلىپ جاتقانىن جانە وزەن جاعدايى قالىپتى ەكەنىن كورسەتەدى.
ايتا كەتۋ كەرەك، قىرىلعان بالىقتاردىڭ باسىم بولىگى (102،862 توننا) جاساندى تۇردە وسىرىلگەن، ياعني وزەندەگى بەكىرە تۇقىمداس بالىقتاردىڭ تابيعي پوپۋلياسياسىنا قاتىسى جوق. جايىقتاعى بالىق قورىنىڭ تابيعي پوپۋلياسياسىنا جينالىپ الىنعان جالپى سالماعى 11،3 توننا چاستيك تۇقىمداس بالىقتار جاتادى.
سونىمەن قاتار، ق ر ەنەرگەتيكا مينيسترلىگى اتىراۋ وبلىستىق اكىمدىگىمەن بىرلەسىپ تۇراقتى تۇردە ايماقتىڭ ەكولوگيالىق احۋالىن جاقسارتۋ جونىندەگى كەشەندى جوسپاردى دايىنداۋدا. جاعدايعا مەملەكەتتىك ورگاندارمەن بىرگە «Nur Otan» پارتياسىنىڭ وبلىستىق فيليالى، اتىراۋ وبلىستىق اكىمدىگى مونيتورينگ جۇرگىزىپ وتىر. «Nur Otan» پارتياسىنىڭ فيليالىمەن قاتار ىشكى ىستەر ورگاندارىنىڭ قىزمەتكەرلەرى، ق ر اۋىل شارۋاشىلىعى مينيسترلىگى ۆەتەرينارلىق قاداعالاۋ كوميتەتى قىزمەتكەرلەرى ساۋدا ورىندارىنداعى بالىق ساتاتىن نۇكتەلەرگە كۇن سايىن تەكسەرۋ جۇمىستارىن جۇرگىزەدى.
اتىراۋ وبلىستىق اكىمدىگى جايىق وزەنىنە عىلىمي زەرتتەۋ جۇرگىزۋگە 80 ملن تەڭگە ءبولدى.
ۇسىنعان: نازەركە لابيحان
پىكىر قالدىرۋ